Húsnæðismál
Sveitarfélögin veita upplýsingar og ráðgjöf um húsnæðismál og úthluta félagslegu húsnæði samkvæmt lögum um félagsþjónustu sveitarfélaga, annast afgreiðslu húsaleigubóta og sérstakra húsaleigubóta samkvæmt lögum um húsaleigubætur. Einnig annast sveitarfélög móttöku umsókna um þjónustuíbúðir og hjúkrunarrými í þeirra eigu og samkvæmt þjónustusamningum við ríkið ef við á.
Almennar upplýsingar um húsleigubætur
Lög um húsaleigubætur nr. 138/1997 tóku gildi 1. janúar 1998. Markmið laganna er að lækka húsnæðiskostnað tekjulágra leigjenda og að draga úr aðstöðumun á húsnæðismarkaðnum. Umsókn um húsaleigubætur skal skila til lögheimilissveitarfélags umsækjanda. Hægt er að nálgast umsóknareyðublað fyrir húsaleigubætur en í sumum tilfellum, t.d. í Reykjavík hafa sveitarfélögin látið útbúa sérstök umsóknareyðublöð.
Varasjóður húsnæðismála
Hlutverk Varasjóðs húsnæðismála er meðal annars að veita rekstrarframlög til sveitarfélaga vegna hallareksturs félagslegra leiguíbúða eða íbúða sem hafa staðið auðar í lengri tíma, veita framlög til sveitarfélaga vegna sölu félagslegra eignar- og leiguíbúða á almennum markaði veita ráðgjöf og leiðbeininga til sveitarfélaga sem vilja breyta um rekstrarform félagslegra leiguíbúða eða hagræða í rekstri þeirra.
Ársskýrslur varasjóðs húsnæðismála má nálgast á vef velferðarráðuneytisins.