Eftirfarandi viðmiðunartafla er unnin á grundvelli stefnumörkunar sambandsins 2014–2018, en þar var sambandinu falið verkefni er varðar laun og starfsumhverfi kjörinna fulltrúa. Markmiðið var nr. 3.1.4 í stefnumörkuninni og hljóðaði svo:
„Sambandið skal hlutast til um að gerð verði úttekt á kjörum og starfsumhverfi kjörinna fulltrúa og ástæðum mikillar endurnýjunar í þeirra röðum. Á grundvelli hennar verði lagðar fram tillögur til úrbóta og að leiðbeinandi viðmiðum.“
Úttektin var unnin 2015-2016 og þann 24. júní 2016 samþykkti stjórn sambandsins eftirfarandi viðmið og hafa þessi viðmið verið í gildi frá þeim tíma.
| % af þingfararkaupi | % af þingfararkaupi | ||
| Íbúafjöldi | Neðri mörk | Efri mörk | Klst. til viðm. |
| 0-200 | 2,24% | 6,73% | 5-15 klst. |
| 201-500 | 5,39% | 9,88% | 12-22 klst. |
| 501-1.500 | 8,53% | 13,02% | 19-29 klst. |
| 1.501-3.000 | 11,67% | 16,16% | 26-36 klst. |
| 3.001-5.000 | 14,82% | 19,31% | 33-43 klst. |
| 5.001-10.000 | 17,96% | 22,45% | 40-50 klst. |
| 10.001-15.000 | 21,10% | 25,59% | 47-57 klst. |
| 15.001-50.000 | 24,24% | 28,73% | 54-64 klst. |
Viðmiðunarlaunataflan byggir á hlutfalli af þingfararkaupi. Þingfarakaup frá 1. janúar 2024 er 1.459.841 kr. en hægt er að nálgast upplýsingar um þingfarararkaup á vef Alþingis. Skv. lögum um þingfararkaup.
Ætla má að vinnuframlag sveitarstjórnarmanna aukist í samræmi við íbúafjölda og því sé eðlilegt að raða sveitarfélögunum eftir stærð í viðmiðunarlaunatöfluna. Vissulega geta fleiri þættir haft áhrif og þurfa sveitarstjórnir því að meta slíkt, þegar þær ákveða röðun viðkomandi sveitarfélags í töflunni. Þá getur verið hentugt að horfa á tímafjöldann sem liggur að baki þessum viðmiðum.
Áréttað er að viðmiðunarlaunataflan miðast við laun fyrir setu í sveitarstjórn án alls álags vegna oddvitastöðu í sveitarstjórn eða setu í nefndum sveitarfélagsins.
Það er algjörlega á hendi hverrar og einnar sveitarstjórnar hvort hún nýtir sér töfluna eða ekki.
Vel má sjá fyrir sér að sveitarstjórnir geti jafnframt notað viðmiðunarlaunatöfluna við ákvörðun á launum fyrir setu í nefndum sveitarfélaganna, eins og t.d. fyrir setu í bæjarráði, fræðsluráði og skipulags- og umhverfisráði. Þá þarf að meta vinnuframlagið inn í töfluna í hverju tilviki fyrir sig.