Heilbrigðisráðherra hefur skipað vinnuhóp til að endurskoða greiðslukerfi til rekstrar hjúkrunarheimila.
Skipun hópsins er í samræmi við viljayfirlýsingu heilbrigðisráðherra í tengslum við samninga Sjúkratrygginga Íslands, Sambands íslenskra sveitarfélaga og Samtaka fyrirtækja í velferðarþjónustu um rekstur hjúkrunarheimila sem gerðir voru síðastliðið vor. Fulltrúi sambandsins í hópnum er Valgerður Freyja Ágústsdóttir, sérfræðingur á hag- og upplýsingasviði.
Samið var til þriggja ára og voru aðilar sammála um að nýta samningstímann til að vinna að bættu rekstrarumhverfi og auknum gæðum hjúkrunarheimila til framtíðar. Einn liður í því er endurskoðun á núverandi greiðslukerfi sem byggist aðallega á mælingum á hjúkrunarþyngd íbúa heimilanna og að kanna hvort tengja eigi greiðslur við gæðavísa.
Í vinnuhópnum eiga sæti:
- Heiðbjört Ófeigsdóttir, tilnefnd af Sjúkratryggingum Íslands, formaður
- Elsa B. Friðfinnsdóttir, skipuð án tilnefningar
- Linda Garðarsdóttir, skipuð án tilnefningar
- Valgerður Freyja Ágústsdóttir, tilnefnd af Sambandi íslenskra sveitarfélaga
- Sigurjón Norberg Kjærnested, tilnefnd af Samtökum fyrirtækja í velferðarþjónustu
- Varamaður: María Fjóla Harðardóttir, tilnefnd af Samtökum fyrirtækja í velferðarþjónustu
- Lovísa Agnes Jónsdóttir, tilnefnd af embætti landlæknis
Gert er ráð fyrir að vinnuhópurinn skili ráðherra niðurstöðum sínum eigi síðar en 15. maí 2023.