Helstu kröfur sambandsins í umsögn um fjármálaáætlun og fjárlagafrumvarp

Samband íslenskra sveitarfélaga hefur sent fjárlaganefnd umsögn um fjármálaáætlun 2021-2025 og fjárlagafrumvarp 2021. Í umsögninni er komið víða við.

Helstu kröfur sem sambandið gerir til fjárlaganefndar eru þessar:

Gerð er krafa um að fjárlaganefnd finni leiðir fyrir aðkomu ríkissjóðs að lánsfjármögnun í þágu sveitarfélaga.
Einnig er gerð krafa um að þær stuðningsaðgerðir sem fram koma í yfirlýsingu ríkisstjórnarinnar verði framlengdar til næsta árs og að þess sjáist stað í fjármálaáætlun og fjárlögum ásamt því að hugað verði að frekari stuðningi við sveitarfélögin, t.d. enn frekari endurgreiðslu útgjalda til fjárhagsaðstoðar.

Þóknun vegna innheimtu staðgreiðslu útsvars verði lækkuð til samræmis við raunkostnað við innheimtuna.
Sveitarfélögum verði tryggð aðkoma að upplýsingum um útsvarsálagningu.
Endurgreiðsluheimild VSK fyrir sveitarfélög verði útvíkkuð til að ná yfir öll mannvirki í eigu sveitarfélaga sem og til jarðvegsvinnu.

Sambandið gerir kröfu um að ríkið greiði til Jöfnunarsjóðs sveitarfélaga vegna sameininga sveitarfélaga á hverju ári fjármálaáætlunar.

Sambandið gerir kröfu um að komið verði til móts við Strætó bs. og tekjufall fyrirtækisins verði bætt að fullu.

Alþingi sýni aðhald gagnvart því að ríkisvaldið fari fram með íþyngjandi kröfur á hendur sveitarfélögum þegar kemur að framkvæmd brýnna innviðaverkefna á borð við fráveituframkvæmdir.
Sambandið leggur áherslu á að sóknaráætlanir landshluta og byggðaáætlun eru góður farvegur fyrir fjárveitingar til umhverfismála.

Lögð er áhersla á að nægilegar fjárveitingar fylgi verkefnum eins og Þjóðarátaki um læsi, ytra mat leik- og grunnskóla, starfsþróun kennara og skólastjórnenda og aukin gæði og stafræna þróun námsgagna..
Lagt er til að fjárheimild til tónlistarfræðslu hækki í samræmi við ábendingar samráðsnefndar.

Hækka þarf daggjöld hjúkrunarheimila án tafar um a.m.k. 2,5 ma.kr. Bæta þarf hjúkrunarheimilum þann kostnað og tekjutap sem þau hafa orðið fyrir vegna Covid-19.

Tryggja þarf aukin framlög á næstu árum til málefna fatlaðs fólks svo ekki þurfi að koma til þess að þjónusta við fatlað fólk verði skert.
Ganga þarf frá formlegu samkomulagi um ábyrgðarskiptingu og fjármögnun út innleiðingartíma NPA þjónustu, þar sem jafnframt verði lagðar línur um framtíðarfyrirkomulag frá og með árinu 2023.

Tryggja þarf fjármögnun í fjárlögum og fjármálaáætlun til innleiðingar fyrirhugaðra laga um samþættingu þjónustu í þágu farsældar barna.
Auka þarf gagnsæi í fjármögnun móttöku flóttafólks og ganga úr skugga um að sveitarfélögin fái það fjármagn sem þeim ber til að veita þá þjónustu sem þau inna af hendi í þágu flóttamanna og hælisleitenda.
Krafist er að ríkið komi með myndarlegum hætti að fjármögnun fjárhagsaðstoðar og að bótatímabil atvinnuleysisbóta verði lengt.