Vegna ályktana frá ársfundi Skólastjórafélags Íslands þann 13. október sl. og undirritaðar eru af Þorsteini Sæberg, formanni félagsins, vill Samninganefnd sveitarfélaga, SNS, að staðreyndum málsins verði haldið til haga.
![](https://www.samband.is/wp-content/uploads/media/_ORIGINALS/samband-islenskra-sveitarfelaga-850x600-c-default.jpg)
Vegna ályktana frá ársfundi Skólastjórafélags Íslands þann 13. október sl. og undirritaðar eru af Þorsteini Sæberg, formanni félagsins, vill Samninganefnd sveitarfélaga (SNS) að eftirfarandi staðreyndum sé haldið til haga:
- Í gildi er kjarasamningur milli Skólastjórafélags Íslands (SÍ) og Sambands íslenskra sveitarfélaga sem var niðurstaða kjaraviðræðna milli aðila og samþykktur var í atkvæðagreiðslu meðal félagsmanna SÍ.
- Kjarasamningur aðila gildir til 31. mars 2019 og fram til þess tíma ríkir friðarskylda milli aðila.
- Samningnefnd sveitarfélaga virðir gerða kjarasamninga þar með talin gildandi ákvæði um launasetningu og mat á menntun.
- Á gildistíma kjarasamnings aðila hafa hins vegar orðið breytingar á kjarasamningi við Félag grunnskólakennara sem valdið hafa misgengi á milli kjarasamninga grunnskólakennara og stjórnenda í grunnskólum.
- Til að bregðast við þeim aðstæðum voru gerðar breytingar á kjarasamningi aðila bæði 17. mars og 26. október árið 2017, þar sem laun skólastjóra, aðstoðarskólastjóra, deildarstjóra og starfsmanna skólaskrifstofa voru leiðrétt.
- Með sama hætti var félaginu boðin leiðrétting á launum félagsmanna í kjölfar nýs kjarasamnings við Félag grunnskólakennara sem undirritaður var þann 25. maí sl.
- Það tilboð var lagt fram á grundvelli samþykktar stjórnar sambandsins frá 26. júní sl. og fól í sér launaleiðréttingu er myndi tryggja að launabil milli kennara og stjórnenda haldist óbreytt út samningstímann.
- Einnig hefur SNS lýst áhuga á að ræða breytingar á menntunarkafla skólastjóra á samningstímanum þannig að sú breyting geti komið til framkvæmda með næsta kjarasamningi.
- Forysta SÍ hefur hafnað tilboði SNS, bæði um leiðréttingu launa skólastjórnenda og umræðu um breytingar á menntunarkafla kjarasamningsins.
Að þessu sögðu vísar Samninganefnd sveitarfélaga athugasemdum formanns stjórnar Skólastjórafélags Íslands um störf og viðhorf Samninganefndar sveitarfélaganna til föðurhúsanna og bendir á að samningsaðilar bera jafna ábyrgð á undirrituðum kjarasamningi.