Á vegum menningar- og viðskiptaráðuneytis er unnið að gerð aðgerðaráætlunar Ferðamálastefnu til 2030, til samræmis við áherslur í stjórnarsáttmála ríkisstjórnarinnar og á grundvelli stefnuramma ferðaþjónustu frá 2019.
Sjö starfshópar eru að störfum sem falið hefur verið að vinna tillögur að aðgerðum inn í aðgerðaáætlunina. Gert er ráð fyrir að stefnan og aðgerðaáætlunin verði lögð fyrir Alþingi í formi tillögu til þingsályktunar á vorþingi 2024. Verkefnið í heild er leitt af stýrihópi á vegum menningar- og viðskiptaráðuneytisins með lykil hagaðilum. Umræddir sjö starfshópar ná utan um eftirfarandi efnisatriði ferðamálastefnu:
- sjálfbærni og orkuskipti,
- samkeppnishæfni og verðmætasköpun,
- rannsóknir og nýsköpun,
- uppbygging áfangastaða,
- hæfni og gæði,
- heilsu-, veitinga- og hvataferðaþjónusta,
- menningartengd ferðaþjónusta.
Nýverið var opnuð sérstök vefsíða um verkefnið og vísast nánar til þeirra upplýsinga sem þar koma fram:
https://www.stjornarradid.is/verkefni/atvinnuvegir/ferdathjonusta/ferdamalastefna/
Samband íslenskra sveitarfélaga vill vekja athygli á þessu verkefni, og vefsíðunni sem vísað er í hér að framan, og hvetja alla hagaðila til að kynna sér verkefnið og senda inn, í gegnum vefsíðuna, ábendingar, hugmyndir og tillögur sem nýst gætu við vinnu við mótun aðgerðaráætlunar Ferðamálastefnu til 2030.