Frestur til að sækja um styrk til fráveituframkvæmda er til 1. september nk. en opnað var fyrir umsóknir sveitarfélaga um styrki þann 13. júní sl. Samkvæmt upplýsingum frá umhverfis-, orku- og loftslagsráðuneytinu hefur aðeins eitt sveitarfélag skilað inn umsókn.
![](https://www.samband.is/wp-content/uploads/2023/08/nidurfall-edited.jpg)
Sambandið hvetur sveitarfélög til að skoða hvort styrkur til fráveituframkvæmda geti nýst þeim en umsóknarfrestur er til 1. september 2023. Umsækjendur geta nálgast rafrænt styrkumsóknarform á eyðublaðavef Stjórnarráðsins.
Þetta er í þriðja skipti sem fráveitustyrkir eru auglýstir til umsóknar. Samkvæmt reglugerð um úthlutun styrkja til fráveitna sveitarfélaga nemur styrkfjárhæð að jafnaði 20% af staðfestum heildarkostnaði styrkhæfrar fráveituframkvæmdar. Styrkfjárhæð skal þó aldrei verða hærri en 30% af heildarkostnaði og að jafnaði aldrei lægri en 15%.
Skilyrði fyrir styrkveitingu er að fráveituframkvæmdin sé áfangi í heildarlausn á fráveitumálum sveitarfélags í samræmi við áætlun sem hlotið hefur samþykki umhverfis-, orku- og loftslagsráðuneytisins. Í fjárlögum vegna ársins 2023 er gert ráð fyrir að 600 m.kr. verði varið til þess að styrkja sveitarfélög vegna fráveituframkvæmda.
Frétt sambandsins um styrkina.