Sveitarfélagaskólinn heim í hérað

Sveitarfélagaskólinn er stafrænn vettvangur námskeiða fyrir kjörna fulltrúa og starfsfólk sveitarfélaga sem hleypt var af stokkunum eftir sveitarstjórnarkosningar 2022. Sambandið hefur nú hannað vinnustofur fyrir kjörna fulltrúa með það að markmiði að  sveitarstjórnarfólk öðlist aukna þekkingu til að efla sig í árangursríkum samskiptum við úrlausn ágreiningsefna auk þess að reyna með raunhæfum hætti á þá þekkingu sem finna má í Sveitarfélagaskólanum.

Fyrri hluti vinnustofunnar er að þessu sinni tileinkaður samskiptum, samvinnu og sameiginlegri úrlausn verkefna. Þessi áhersla á samvinnu er nýmæli í fræðslu sambandsins en sú áhersla er sannarlega ekki úr lausu lofti gripin. Í skýrslu verkefnisstjórnar um starfsaðstæður kjörinna fulltrúa sem kom út í nóvember 2022 er sérstaklega fjallað um samskipti. Þar kemur meðal annars fram að samkvæmt könnun Félagsvísindastofnunar hafi þriðjungur kjörinna fulltrúa átt í samskiptavanda á tímabilinu. Athygli vekur að í langflestum tilvikum, átti kjörni fulltrúinn í samskiptavanda við kjörinn fulltrúa í eigin sveitarfélagi. Næst algengast er að hann hafi átt í samskiptavanda við æðstu embættismenn í eigin eða öðru sveitarfélagi en sjaldnast við almenna borgara. Ein af tillögum nefndarinnar var að sambandið hvetti sveitarfélög til að setja sér samskiptasáttmála þar sem lögð verði áhersla á virðingu og uppbyggileg samskipti kjörinna fulltrúa og að Sveitarfélagaskóli sambandsins veitti kjörnum fulltrúum fræðslu og ráðgjöf um þróun sáttmálans og eftirfylgni. Vinnustofan er því einn þáttur sambandsins í að fylgja þessari tillögu eftir.

Vinnustofur fara fram í öllum landshlutum og fær allt sveitarstjórnarfólk boð um að mæta á vinnustofu í sínum landshluta, með fyrirvara um skráningu. Nánari upplýsingar um tímasetningu og staðsetningu er að finna hér að neðan.

Dagskrá vinnustofanna

Dagsetningar vinnustofa