Ekki verður af sameiningu fjögurra sveitarfélaga í Austur-Húnavatnssýslu en tillaga þess efnis var felld í kosningu á laugardag.
Tillagan var samþykkt í Blönduósbæ og í Húnavatnshreppi en í Sveitarfélaginu Skagaströnd var tillagan felld með afgerandi meirihluta en í Skagabyggð munaði aðeins fimm atkvæðum. Öll sveitarfélögin urðu að samþykkja tillöguna til þess að af sameiningunni yrði.
| Já | Nei | Auðir/ógildir | Alls | Kjörsókn | |
| Blönduósbær | 89,4% | 9,5% | 1,1% | 100,0% | 71,14% |
| Húnavatnshreppur | 56,6% | 41,8% | 1,6% | 100,0% | 85,33% |
| Skagabyggð | 45,3% | 54,7% | 0,0% | 100,0% | 76% |
| Sv. Skagaströnd | 28,7% | 69,2% | 2,1% | 100,0% | 84% |
Sveitarstjórnirnar fjórar hafa lýst því yfir að þær muni ekki nýta heimild í 2. mgr. í 120. gr. sveitarstjórnarlaga, komi til þess að sameiningartillaga verði samþykkt af íbúum í hluta sveitarfélaganna, nema að undangengnu samráði við íbúa. Í því felst að hafni íbúar einhvers sveitarfélaganna tillögu um sameiningu í kosningum, munu aðrar sveitarstjórnir ekki taka ákvörðun um sameiningu þeirra sveitarfélaga án þess að hafnar verði nýjar sameiningarviðræður og kosið að nýju.