Ný stjórn og kall­að eft­ir jafn­ræði í orku­kostn­aði á að­al­fundi SSKS

Á fundinum var samþykkt samhljóða ályktun þar sem lögð er áhersla á að jafna orkukostnað milli landsvæða og tryggja íbúum, fyrirtækjum og sveitarfélögum á köldum svæðum sambærileg búsetu- og rekstrarskilyrði og annars staðar á landinu.

Meðal þess sem kallað er eftir er að tekjur af jöfnunargjaldi raforkudreifingar skili sér að fullu til jöfnunar orkukostnaðar. Þá er lögð áhersla á stuðning vegna rafkyndingar hjá sveitarfélögum og fyrirtækjum, endurgreiðslu virðisaukaskatts vegna varmadæla og annarra orkusparandi lausna og aukinn stuðning við jarðhitaleit á köldum svæðum.

Aðalfundurinn lýsti jafnframt áhyggjum af fyrirhugaðri 40 milljóna króna lækkun framlaga til jöfnunar húshitunar og lagði áherslu á að tryggja þurfi raforkuöryggi heimila og sveitarfélaga bæði hvað varðar afhendingu og verð.

Fundurinn færði jafnframt Herði Arnarsyni þakkir fyrir gott og farsælt samstarf við samtökin og áherslu hans á afhendingaröryggi raforku og sanngjarnt orkuverð fyrir heimili um land allt.

Ný stjórn kjörin

Á fundinum var ný stjórn SSKS kjörin, og er hún skipuð eftirfarandi aðilum:

Aðalstjórn

• Íris Róbertsdóttir, Vestmannaeyjabæ, formaður
• Björn Ingimarsson, Vopnafjarðarhreppi
• Kristinn Jónasson, Snæfellsbæ

Varastjórn

• Gerður Björk Sveinsdóttir, Vesturbyggð
• Hjalti Þór Vignisson, Sveitarfélaginu Hornafirði
• Lilja Björg Ágústsdóttir, Dalabyggð

Frekari upplýsingar um aðalfundinn og nýja stjórn má finna á vef Samtaka sveitarfélaga á köldum svæðum.