Með þessari breytingu koma sveitarfélög landsins fram sem sterkari heild í kjaraviðræðum. Sameiginlegt samningsumboð styrkir stöðu sveitarfélaganna, eykur samræmi í kjaramálum og skapar enn betri forsendur til að gæta hagsmuna þeirra gagnvart viðsemjendum.

Á undanförnum árum hefur samninganefnd Sambandsins byggt upp mikla þekkingu og reynslu á sviði kjaramála. Með samningsumboði Reykjavíkurborgar verður til öflug samninganefnd þar sem sameinast sérfræðiþekking og víðtæk reynsla af vinnumarkaðsmálum sveitarfélaga.

„Það er mikilvægt fyrir sveitarfélögin að koma fram sem ein sterk heild í kjaramálum. Með sameiginlegri samninganefnd Reykjavíkur og Sambandsins verður til sterk eining sem býr yfir mikilli þekkingu, reynslu og yfirsýn á kjaramálum sveitarfélaga, og mun styrkja faglega vinnu við kjarasamninga á komandi árum,“ segir Almar Guðmundsson, formaður Sambands íslenskra sveitarfélaga.

„Hagsmunir Reykjavíkurborgar liggja í þéttu og öflugu samstarfi á vettvangi kjaramála hins opinbera. Við trúum því að breytingin muni leiða af sér öflugri samninga og faglegri vinnu. Við berum fullt traust til Sambandsins í þessum mikilvægu verkefnum og hlökkum til áframhaldandi samstarfs,” segir Hildur Björnsdóttir, borgarstjóri Reykjavíkur.

Borgarstjórn hefur samþykkt að fela Sambandi íslenskra sveitarfélaga samningsumboð borgarinnar í kjaramálum. Með ákvörðuninni verður samningsumboð í kjaraviðræðum fyrir allt starfsfólk sveitarfélaga landsins undir hatti Sambandsins og markar það tímamót fyrir kjaramál sveitarfélaga á Íslandi.

Samningsumboð Reykjavíkurborgar færist til Sambandsins

Vitundarvakningin er unnin í samstarfi við Miðstöð menntunar og skólaþjónustu (MMS), Barna- og fjölskyldustofu, Embætti landlæknis, Netvís (Fjölmiðlanefnd), Heimili og skóla, Kennarasamband Íslands, Neyðarlínuna, Samband íslenskra sveitarfélaga, Samskiptaráðgjafa íþrótta- og æskulýðsstarfs og Taktu skrefið. Markmiðið er að fyrirbyggja stafrænt ofbeldi og að fagfólk, foreldrar og börn viti hvernig bregðast skuli við. 

Stafrænt ofbeldi er hluti af veruleika margra barna. Í Íslensku æskulýðsrannsókninni 2025 voru nemendur spurðir hvort þau hefðu einhvern tímann um ævina verið beðin um að senda af sér nektarmyndir. Í 10. bekk svaraði tæplega helmingur stúlkna (45%) og um einn af hverjum sjö drengjum (15%) játandi. Það samsvarar um þriðjungi alls árgangsins, eða 30%. Þá hafa 38% nemenda í 10. bekk fengið óumbeðin klámfengin skilaboð. Fram kemur í nýrri skýrslu ríkislögreglustjóra um kynferðisbrot á fyrri hluta ársins 2026 að lögreglu var tilkynnt um 93 brot vegna kynferðislegrar áreitni og stafrænna kynferðisbrota, sem er 60% fjölgun frá sama tímabili í fyrra. Um helmingur brotaþola í öllum tilkynntum kynferðisbrotum var undir 18 ára aldri. 

Í hverri viku nú í október verður nýr fræðslupakki fyrir efri bekki grunnskóla og framhaldsskóla kynntur á stoppofbeldi.mms.is. Pakkarnir eru ætlaðir kennurum og öðru fagfólki til notkunar með nemendum á efri stigum grunnskóla og í framhaldsskólum. Fyrsti pakkinn, sem birtist í dag, fjallar um deilingu nektarmyndefnis og kynlífskúgun. Síðan taka við neteinelti, gervigreind og djúpfalsanir og loks stafrænt öryggi í ungum parasamböndum. Frekari verkfæri fyrir fagfólk og foreldra bætast við á næstu vikum. Samfélagslögreglan mun fylgja eftir efninu í samstarfi við skóla og frístundastarf í sínum umdæmum og kynna stutta viðbragðsþjálfun. 

Sjá: Deiling nektarmyndefnis og kynlífskúgun – á stoppofbeldi.mms.is 

Vitundarvakningin er styrkt af Netöryggissjóði Eyvarar og er samþætt við aðgerðaáætlun stjórnvalda gegn ofbeldi meðal og gegn börnum 2025–2026. 

Börn og ungmenni sem verða fyrir stafrænu ofbeldi og öllum sem hafa áhyggjur af barni er bent á að 112 aðstoðar í neyð. Hjálparsími Rauða krossins, 1717, er opinn þeim sem vilja tala við einhvern. 

Ríkislögreglustjóri og lögregluembættin hefja í dag vitundarvakningu um stafrænt ofbeldi meðal barna og ungmenna.

Frá orðum til aðgerða: Vitundarvakning um stafrænt ofbeldi meðal barna og ungmenna

Fyrir framúrskarandi skólastarf eru þrjár tilnefningar:

Leikskólinn Gefnarborg í Garði í Suðurnesjabæ fyrir fjölbreytt og og markvisst þróunarstarf. Í skólanum hafa verið þróaðir starfshættir sem eru kenndir við læsistengda skynjun þar sem læsi, skynjun, leikur, sköpun og útinám fléttast saman með markvissum hætti.

Grundaskóli á Akranesi fyrir fjölbreytt, gróskumikið og margháttað þróunarstarf sem hefur m.a. beinst að því að koma sem best til móts við ólíkar þarfir nemenda. Grundaskóli er m.a. kunnur fyrir sveigjanlega kennsluhætti, fjölbreytt þemaverkefni og öfluga kennslu í list- og verkgreinum.

Starfsbraut Fjölbrautaskólans í Breiðholti fyrir að þróa einstaklingsmiðað nám sem hefur það að markmiði að þroska með nemendum hæfni sem gerir þeim fært að takast á við fjölbreytt viðfangsefni daglegs lífs - en þessi námsbraut er einkum ætluð nemendum sem hafa verið í námsverum eða sérskólum eða fengið verulegan stuðning í almennum bekk vegna fötlunar eða sérstakra námsörðugleika.

Fjórir kennarar eru tilnefndir fyrir framúrskarandi kennslu:

Halldór Baldursson, kennari við Myndlistaskólann í Reykjavík, fyrir framúrskarandi myndlistarkennslu, Jónína Lovísa Kristjánsdóttir, sérkennari við Egilsstaðaskóla og kennsluráðgjafi hjá Múlaþingi, fyrir einstakt framlag til menntunar, velferðar og farsældar barna og ungmenna, Ragna Gunnarsdóttir, kennari í Flataskóla í Garðabæ, fyrir framúrskarandi kennslu á yngsta- og miðstigi, og Sandra Ómarsdóttir, kennari í Seljaskóla í Reykjavík, fyrir framúrskarandi sviðslistakennslu.   

Þrjú verkefni eru tilnefnd í flokki þróunarverkefna:

Samkennd og sjálfræði – þróunarverkefni í Verzlunarskóla Íslands er verkefni sem byggist á því að nemendur á fyrsta ári vinna í teymum að verkefnum sem beinast að því að láta gott af sér leiða í samfélaginu með sjálfboðavinnu.

Stilla – hæglátt leikskólastarf, sem er samvinnuverkefni rannsakenda og starfsfólks í fjórum leikskólum, Aðalþingi í Kópavogi, Iðavöllum á Akureyri, Rauðhóli í Reykjavík og Uglukletti í Borgarnesi, um að gefa börnunum tækifæri til að sökkva sér í leik og gefa þeim meiri tíma til að kanna hugmyndir sínar.

Söngvavor: Samstarf um tónlistaruppeldi, málrækt og jöfn tækifæri barna. Söngvavor er samstarfsverkefni leikskóla og tónlistarskóla. Leikskólabörnin læra sönglög eftir íslensk tónskáld, heimsækja tónlistarskóla og æfa með hljómsveitum þeirra og þessu lýkur svo með mikilli tónlistarhátíð þar sem börnin koma fram fyrir áheyrendur.

Í flokki iðn- og verkmennta eru þrjár tilnefningar:

Menntaskólinn á Ísafirði er tilnefndur fyrir Tímatökuhúsið – verkefni sem sýnir hvernig iðnmenntun getur tengst samfélaginu á uppbyggilegan hátt – en þetta verkefni fólst í hönnun og smíði tímatökuhúss fyrir skíðafélagið sem síðar var flutt upp á skíðasvæðið í Tungudal til notkunar við tímatöku í alpagreinum.

Höfundar námsefnisins Matreiðsla eru tilnefndir fyrir framúrskarandi framlag til iðn- og verkmenntunar með því að semja heildstætt og vandað námsefni fyrir matreiðslunám á framhaldsskólastigi – en þetta eru rafbækur sem hafa reynst afar vel í kennslu. Höfundar eru matreiðslumeistararnir Hermann Þór Marinósson, Hinrik Carl Ellertsson, Ragnar Wessman, Sigurður Daði Friðriksson og Ægir Friðriksson.

Verkmenntaskólinn á Akureyri er tilnefndur fyrir sjálfbæra kennslustofu, nýsköpunarverkefni sem er til fyrirmyndar um markvissa umhverfismennt – en í Verkmenntaskólanum á Akureyri hefur verið sett upp sólarorkuver og aðstaða sköpuð til að fást við margs konar verkefni sem því tengjast.

Hvatningarverðlaun verða veitt við athöfnina á Bessastöðum án tilnefninga og koma oft í hlut frumkvöðla eða brautryðjenda!

Nánari upplýsingar er að finna á https://skolathroun.is/menntaverdlaun/

Íslensku menntaverðlaunin verða veitt á Bessastöðum þriðjudaginn 10. nóvember næstkomandi. Verðlaunin eru veitt í fjórum flokkum fyrir framúrskarandi skólastarf, kennslu, þróunarverkefni og iðn- og verkmenntun, auk sérstakra hvatningarverðlauna.

Íslensku menntaverðlaunin veitt þann 10. nóvember

Almar Guðmundsson, formaður Sambands íslenskra sveitarfélaga, setti ráðstefnuna og fjallaði í ávarpi sínu um mikilvægi þess að það ríki traust og gagnkvæmur skilningur í samskiptum ríkis og sveitarfélaga. Vísaði Almar jafnframt til þeirrar áherslu sem fram kom í ályktun landsþings Sambandsins á Akureyri í lok september, þar sem sveitarfélög landsins kölluðu eftir auknu samráði, skýrari verkaskiptingu og öflugra samstarfi ríkis og sveitarfélaga um lausn þeirra stóru verkefna sem blasa við í þjónustu við íbúa og uppbyggingu samfélagsins.

Þá sagði hann sveitarfélögin ætla að taka meira pláss í menntamálum en ríflega helmingur skatttekna sveitarfélaga fer í málaflokkinn, sem er gríðarlega mikilvægur. Hann snýst um framtíð barna og sveitarfélögin eiga að spila stórt hlutverk þar.

Daði Már Kristófersson, fjármálaráðherra, Eyjólfur Ármannsson, innviðaráðherra, og Ásgeir Jónsson, seðlabankastjóri, fluttu einnig erindi á ráðstefnunni. Að þeim loknum fóru fram pallborðsumræður undir stjórn Boga Ágústssonar. Þá er fjölbreytt dagskrá erinda og umræðna á dagskrá yfir daginn þar sem fjallað er um fjármál sveitarfélaga, efnahagsþróun, kjaramál, menntamál og uppbyggingu innviða.

Ráðstefnunni lýkur á morgun, föstudag, með málstofu þar sem sjónum verður beint að helstu áskorunum og tækifærum sveitarfélaga á komandi árum. Beint streymi er ráðstefnunni og hægt verður að nálgast upptöku eftir helgi. 

Fjármálaráðstefna sveitarfélaga hófst í morgun í Vör við Viðeyjarsund. Þar koma fulltrúar sveitarfélaga víðs vegar að af landinu saman til að ræða stöðu og framtíðarhorfur sveitarfélaga, fjármál, efnahagsmál, innviði og þau verkefni sem fram undan eru í íslensku sveitarstjórnarstigi. Dagskrá ráðstefnunnar stendur yfir í dag og á morgun.

Leitarniðurstöður

Fjármálaráðstefna sveitarfélaga hófst í Vör í morgun

Áhugaverðar pallborðsumræður

Leitarniðurstöður

Fjár­mála­ráð­stefna sveit­ar­fé­laga hófst í Vör í morg­un

Áhugaverðar pallborðsumræður

Fjármálaráðstefna sveitarfélaga hófst í Vör í morgun