Bið­laun

Lengd biðlaunaréttar:   

• 6 mánuðir, ef starfsmaður hefur starfað hjá sveitarfélögum í innan við 15 ár. 
• 12 mánuði, ef starfsmaður hefur starfað hjá sveitarfélögum í 15 eða lengur.  

Í ljósi þess að um sólarlagsákvæði er að ræða og það starfsfólk sem enn á rétt á biðlaunum hefur að jafnaði allt starfað lengur en í 15 ár er biðlaunarétturinn í raun 12 mánuðir.  

Rétturinn til biðlauna fellur niður ef starfsmaður hafnar sambærilegu starfi innan sveitarfélagsins.  

Við mat á biðlaunarétti skal telja allan þann tíma sem viðkomandi hefur verið í þjónustu sveitarfélags.  

Endurráðning:  

• Ef sama staða er stofnuð að nýju innan 5 ára, á viðkomandi starfsmaður sem fellur undir ákvæði um biðlaun, að öðru jöfnu, rétt á stöðunni. 
• Ef starfsmaður, sem fellur undir ákvæði um biðlaun, sækir um annað starf sem losnar hjá sveitarfélaginu, innan 5 ára frá starfslokum, og hefur ekki átt sök á uppsögninni, situr viðkomandi fyrir um starfið, að öllu jöfnu.  

Samanlagður starfsaldur:   

Starfsaldur fyrir og eftir slík starfslok  er lagður saman og veitir sömu réttindi eins og um óslitna þjónustu hafi verið að ræða.   

Nýtt starf á biðlaunatíma: 

Ef einstaklingur, sem þiggur biðlaun, tekur við nýju starfi hjá sveitarfélaginu, áður en 6 eða 12 mánaða tímabilið er liðið:   

• Biðlaun falla niður ef nýja starfinu fylgja jafn há eða hærri laun 
• Ef launin í nýju stöðunni eru lægri, skal sveitarfélagið greiða launamismuninn til loka 6 eða 12 mánaða tímabilsins.   

Hverjir eiga ekki rétt á biðlaunum?  

• Starfsfólk sem hóf störf hjá sveitarfélagi eftir 1. mars 1997   

Um sólarlagsákvæðið 

Ákvæðið mun með tíð og tíma falla úr gildi þar sem það takmarkast við starfsfólk sem hóf störf í þjónustu sveitarfélaga fyrir 1. mars 1997.   

Biðlaunaréttur og veikindi  

Biðlaunaréttur frestast ekki þó að viðkomandi starfsmaður sé veikur þegar starfið er lagt niður. Staðan er lögð niður og starfsmaðurinn fer á biðlaun þó svo að hann sé veikur og fær greidd biðlaun í sex eða tólf mánuði eftir því hve lengi hann hefur starfað í þjónustu sveitarfélags.  

Laun á biðlaunatíma 

Laun á biðlaunatíma eru að jafnaði föst laun er starfinu fylgdu.