Viðburðir
03.04.2019 - 05.04.2019

Ráðstefna um snjóflóðavarnir

Verkfræðingafélag Íslands stendur fyrir alþjóðlegri ráðstefnu um snjóflóðavarnir dagana 3.-5. apríl 2019. Ráðstefnan verður haldin á Sigló hóteli á Siglufirði. Tilgangur ráðstefnunnar er að fræðast um uppbyggingu ofanflóðavarna á Íslandi síðastliðin 20 ár og kynnast því nýjasta sem er að gerast á sviði ofanflóðavarna annars staðar í heiminum. Ráðstefnan er ætluð fólki frá sveitarstjórnum, stjórnsýslu, rekstraraðilum skíðasvæða, vegagerð, mannvirkjahönnuðum, eftirlitsaðilum og fræðimönnum. Þá mun töluverður fjöldi erlends fagfólks sækja ráðstefnuna.

Þemu ráðstefnunnar eru:

  1. Áhættustjórnun
  2. Umhverfi og samfélag
  3. Skipulag, hönnun, uppbygging og viðhald varnarmannvirkja
  4. Virkni varnargarða byggt á reynslu, tilraunum og tölulegum hermunum.

Gestafyrirlesarar koma frá Noregi, Sviss og Englandi. Heimasíða ráðstefnunnar er http://snow2019.is/ og fer skráning fram í gegnum vefsíðuna. Dagskrá ráðstefnunnar er aðgengileg á vef ráðstefnunnar og í dreifiriti: Annað dreifirit.  Skoðunarferð verður farin um varnarvirkin á Siglufirði föstudaginn 5. apríl og fjallaskíðaferð 6. apríl.

Á Siglufirði hófst umfangsmikil uppbygging varnargarða árið 1998 og standa nú ofan byggðar um 3,5 km af misbröttum 2-18 m háum varnargörðum, um 4,5 km af stoðvirkjum í fjallshlíðinni og 4 vindkljúfar á fjallstoppi. Á næstu árum verður haldið áfram með uppbyggingu stoðvirkja í fjallinu.

Mannvirkjafulltrúar og tæknimenn sveitarfélaga eru hvattir til að skrá sig, sem og fulltrúar bæjarstjórna.

Að ráðstefnunni standa: Verkfræðingafélag Íslands, Ofanflóðasjóður, Samband íslenskra sveitarfélaga, Vegagerðin, Framkvæmdasýsla ríkisins, Landsvirkjun, Jöklarannsóknafélag Íslands, Alþjóða jöklarannsóknafélagið og Veðurstofa Íslands.