Liðsstyrkur

Lidsstyrkur3Í lok ársins 2012 gerðu sveitarfélögin, ríkið og aðilar vinnumarkaðarins með sér samkomulag um átak til að mæta aðstæðum þess fólks sem hefur eða mun á árinu 2013 fullnýta rétt sinn til bóta í atvinnuleysistryggingakerfinu.

Stefnt er að því að öllum atvinnuleitendum sem fullnýttu eða fullnýta rétt sinn á tímabilinu frá 1. september 2012 fram til 31. desember 2013, samtals 3.700 manns, verði öllum boðin vinna eða starfsendurhæfing á árinu 2013 enda skrái þeir sig til þátttöku í átakið. Sköpuð verða 2.200 tímabundin ný störf fyrir langtímaatvinnuleitendur í þessum hópi á árinu 2013.

Sveitarfélög munu bjóða 660 störf, ríkið 220 störf og almenni vinnumarkaðurinn 1.320 störf. Til viðbótar verður þeim sem á þurfa að halda boðin starfsendurhæfing.

Allir atvinnuleitendur innan þessa hóps, sem skrá sig, munu fá tilboð um starf. Markmiðið er að enginn falli af atvinnuleysisbótum án þess að fá slíkt tilboð.

Atvinnuleysistryggingasjóður niðurgreiðir stofnkostnað atvinnurekenda við ný störf tímabundið og nemur styrkur með hverri ráðningu grunnatvinnuleysisbótum ásamt 8% framlagi í lífeyrissjóð, samtals kr. 186.417. á mánuði. Atvinnurekandi gerir síðan hefðbundinn ráðningarsamningi við atvinnuleitanda og greiðir honum laun samkvæmt kjarasamningi.
Þeim atvinnuleitendum sem þurfa á starfsendurhæfingu að halda verður vísað til VIRK, starfsendurhæfingarsjóðs og boðin starfsendurhæfing.

Sérstakur biðstyrkur er í boði fyrir þá at-vinnuleitendur sem hafa verið skemur en 42 mánuði á bótum þegar þeir missa bótarétt sinn. Sá styrkur er tímabundinn í allt að sex mánuði eða þar til viðkomandi fær tilboð um starf. Styrkfjárhæð svarar til fyrri bótaréttar einstaklings.
Verkefnisstjóri átaksins er Runólfur Ágústsson (runolfur.agustsson@vmst.is), en fulltrúar sveitarfélaga í nefndinni eru þær Sólveig B. Gunnarsdóttir, lögfræðingur á kjara- og starfsmannasviði sambandsins, og Helga Björg Ragnarsdóttir, skrifstofustjóri á skrifstofu borgarstjóra og borgarritara.

Nánari upplýsingar um átakið má finna á vef Liðsstyrks á slóðinni, www.lidsstyrkur.is.

Á myndinni með greininni má sjá Sólveigu B. Gunnarsdóttir, sem er fremst til vinstri, en hún er fulltrúi sambandsins í verkefnisstjórninni. Verkefnisstjórinn, Runólfur Ágústsson, er fremst til hægri. Myndin er tekin á kynningarfundi sem haldinn var í húsakynnum sambandsins í janúar.