Miðvikudaginn 5. febrúar sl. fór fram fyrsti sameiginlegi fundur tveggja fastanefnda hjá sambandinu, þ.e. félagsþjónustunefndar og fræðslumálanefndar. Nefndum sambandsins, sem skipaðar eru fag- og sveitarstjórnarfólki í bland, hafa það hlutverk með höndum að vera ráðgefandi við stjórn og starfsmenn sambandsins á þeim fagsviðum sem heyrir undir þær.
Miðvikudaginn 5. febrúar sl. fór fram fyrsti sameiginlegi fundur tveggja fastanefnda hjá sambandinu, þ.e. félagsþjónustunefndar og fræðslumálanefndar. Nefndir sambandsins, sem skipaðar eru fag- og sveitarstjórnarfólki í bland, hafa það hlutverk með höndum að vera ráðgefandi við stjórn og starfsmenn sambandsins á þeim fagsviðum sem heyrir undir þær.
Eins og alkunna er þá er mikil umræða meðal opinberra aðila um mikilvægi þess að samhæfa þjónustu mismunandi kerfa hins opinbera þvert á ráðuneyti, stjórnsýslustig og stofnanir hins opinbera í þágu barna, ungmenna, fjölskyldna og annarra sem þurfa þjónustunnar með. Það þótti því tilhlýðilegt að þessar tvær nefndir sambandsins stilltu saman strengi sína og á þessum fyrsta sameiginlega fundi var einmitt fjallað um drög að nýju frumvarpi, sem unnið er þvert á ráðuneyti og fjallar um samþættingu allrar velferðarþjónustu í þágu barna. Auk þess komu fulltrúar Rannsókna og greininga á fundinn og gerðu grein fyrir rannsóknum sínum á högum og líðan ungmenna s.l. 20 ár og hagnýtingu sveitarfélaga á þessum mikilvægu upplýsingum inn í stefnumótun og ákvarðanatöku. Loks var fjallað um stöðu og framgang máls er varðar breytt fyrirkomulag talmeinaþjónustu við börn og ungmenni og fyrirhugaðan fund með heilbrigðisráðherra um málið, sem fram fer í vikunni.
Ákveðið var að nefndirnar myndu funda sameiginlega með reglubundnum hætti þegar málefnin gæfu tilefni til þess og ljóst var af þessum fyrsta fundi að samlegðin er mikil.
Í félagsþjónustunefnd eiga sæti:
- Friðrik Már Sigurðsson sveitastjórnarfulltrúi í Húnaþingi vestra,
- Guðrún Sigurðardóttir, sviðstjóri fjölskyldusviðs Akureyrarbæjar,
- Heiða Björg Hilmarsdóttir, borgarfulltrúi og formaður velferðarráðs Reykjavíkurborgar,
- Ólafur Þór Ólafsson bæjarfulltrúi Suðurnesjabæjar og
- Rannveig Einarsdóttir sviðsstjóri barna- og fjölskyldusvið Hafnarfjarðar.
Félagsþjónustufulltrúi sambandsins er María Ingibjörg Kristjánsdóttir
Í fræðslumálanefnd eiga sæti:
- Anna Magnea Hreinsdóttir, sviðsstjóri fjölskyldusviðs í Borgarbyggð,
- Einar Már Sigurðarson, bæjarfulltrúi í Fjarðabyggð,
- Helgi Arnarson, sviðsstjóri fræðslusviðs í Reykjanesbæ,
- Herdís Á. Sæmundardóttir, sviðsstjóri fjölskyldusviðs í Sveitarfélaginu Skagafirði og
- Skúli Helgason, borgarfulltrúi og formaður skóla- og frístundaráðs í Reykjavík.
Skólamálafulltrúi sambandsins er Svandís Ingimundardóttir
Frá sameiginlegum fundi fræðslumálanefndar og félagsþjónustunefndar Sambands íslenskra sveitarfélaga, sem fram fór 5. febrúar 2020. Aftari röð frá vinstri: Rannveig Einarsdóttir, Ólafur Þór Ólafsson, María Ingibjörg Kristjánsdóttir, Skúli Þór Helgason, Heiða Björg Hilmisdóttir, Friðrik Már Sigurðsson og Guðjón Bragason, sviðsstjóri lögfræði- og velferðarsviðs sambandsins. Fremri röð frá vinstri: Anna Magnea Hreinsdóttir, Helgi Arnarson, Herdís Á. Sæmundardóttir, Einar Már Sigurðarson, Guðrún Sigurðardóttir og Svandís Ingimundardóttir.