29. jan. 2015

Dagur leikskólans 2015

  • dagur_leikskolans-1

Föstudaginn 6. febrúar nk. verður dagur leikskólans haldinn hátíðlegur í leikskólum landsins í áttunda sinn, en þann dag árið 1950 stofnuðu frumkvöðlar leikskólakennara fyrstu samtök sín. Leikskólar landsins hafa á undanförnum árum haldið upp á dag leikskólans með margbreytilegum hætti og þannig stuðlað að jákvæðri umræðu um leikskólastarfið.

Dagur leikskólans er samstarfsverkefni Félags leikskólakennara, Félags stjórnenda leikskóla, mennta- og menningarmálaráðuneytis, Sambands íslenskra sveitarfélaga og Heimilis og skóla – landssamtaka foreldra.

Í tilefni dagsins verður viðurkenningin Orðsporið veitt í þriðja sinn. Orðsporið eru hvatningarverðlaun sem veitt eru þeim sem þykja hafa skarað framúr í því að efla orðspor leikskólastarfs í landinu og hafa unnið ötullega í þágu leikskóla og leikskólabarna. Mun mennta- og menningarmálaráðherra afhenda viðurkenninguna Í Björnslundi, leikskólanum Rauðhóli, (Norðlingaholti, Reykjavík) á Degi leikskólans.

Allir sem koma að málefnum leikskólans á einn eða annan hátt, eru hvattir til að halda degi leikskólans á lofti og fylgjast vel með starfsemi leikskólanna þennan dag.

Látum dag leikskólans verða okkur hvatning til að kynna okkur það mikilvæga starf sem þar fer fram.