15. mar. 2013

Sveitarstjórnarmenn eiga að hafa skoðun á skólamálum

  • Aldis

Aldís Hafsteinsdóttir, bæjarstjóri í Hveragerði, gerði breytingar í skólastarfi að umræðuefni í ræðu sem hún flutti á landsþingi sambandsins í morgun. Taldi hún ósanngjarnt þegar því væri haldið fram að sveitarstjórnarmenn hafi ekki vit á hinu eða þessu atriðinu af því að þeir væru ekki „fagmenn“ í viðkomandi grein. Sagði hún það rétt að sveitarstjórnarmenn væru fæstir fagmenn á öllum sviðum en þeir ættu að hafa skoðun á öllum þeim rekstrarþáttum sem lúta að starfsemi sveitarfélaganna og vera óhræddir við að tjá sig um þá.

Það er hættulegt lýðræðinu ef við ætlum að láta embættismenn alfarið sjá um stefnumörkun, aðgerðir og úrlausnir á þeim forsendum að við hin „höfum ekki vit“ á málaflokknum.

Það er athyglisvert að heyra um samstöðu ríkis og sveitarfélaga í Danmörku í þeirri deilu sem þar á sér stað um vinnutímaskilgreiningu kennarastarfsins, því „they can‘t succeed if we can‘t succeed“.

Það er auðvitað ekki skrýtið þó að við, rétt eins og aðrar Norðurlandaþjóðir, fylgjumst grannt með hverju fram vindur í Danmörku enda er þar stefnt á róttækar breytingar. Breytingar sem settar eru fram með það að markmiði að bæta skólana.

Aldís sagði miður að umræðan um jafn veigamikinn hlut og skilgreiningu vinnutíma stærsta vinnustaðar hvers sveitarfélags skuli vera í þeim farvegi að hana sé varla þorandi að ræða.

Það má varla minnast á það hvort að kennsluafsláttur eldri kennara sé með þeim hætti sem best er fyrir skólastarfið eða hvort betra væri að reynslumeiri kennara verðu meiri tíma með nemendum og yngri kennarar, sem eru að stíga sín fyrstu skref, fengju meira svigrúm heldur en nú er.

Við megum varla orða það hvort eðlilegra sé að stjórnendur skóla geti skipulagt starfið út frá aðstæðum á hverjum stað frekar en niðurnjörvuðum kjarasamningi.


Nánar verður fjallað um umræðuefni landsþingsins á næstu dögum.

Sýnt var beint frá fyrstu þremur erindunum í morgun en útsendingu er nú lokið. Upptökur eru væntanlegar inná vef sambandsins í næstu viku.