Fréttir og tilkynningar

Í morgun hófust kjaraviðræður samninganefndar sveitarfélaga að nýju eftir hlé sem gert var á viðræðum í júlí í samræmi við endurnýjaðar viðræðuáætlanir.

Í um frumvarpi um Húsnæðis- og mannvirkjastofnun, sem nú liggur frammi til umsagnar í Samráðsgátt, er lagt til að tvær stofnanir, Íbúðalánasjóður og Mannvirkjastofnun, verði lagðar niður en í þeirra stað muni Húsnæðis- og mannvirkjastofnun annast verkefni beggja stofnana.

Í morgun undirrituðu fulltrúar Sambands íslenskra sveitarfélaga og Verkalýðsfélags Akraness samkomulag um endurskoðun viðræðuáætlunar aðila.

Skrifstofa Sambands íslenskra sveitarfélaga verður lokuð frá 22. júlí til 6. ágúst vegna sumarleyfa starfsfólks. Við óskum sveitarstjórnarmönnum, starfsmönnum sveitarfélaga og landsmönnum öllum gleðilegs sumars.

Ný umferðarlög sem samþykkt voru á Alþingi í júní fela í sér mörg veigamikil nýmæli og breytingar á fyrri löggjöf. Meginmarkmið laganna er að vernda líf og heilsu vegfarenda með auknu umferðaröryggi þar sem jafnræðis er gætt milli vegfarenda. Lögin er afrakstur margra ára undirbúnings og heildarendurskoðunar á löggjöfinni í víðtæku samráði við almenning og hagsmunaaðila. Nýju lögin nr. 77/2019 taka gildi um næstu áramót eða 1. janúar 2020.

Með breytingu á lögum um persónuvernd og vinnslu persónuupplýsinga, nr. 90/2018 á málefnasviði félags- og barnamálaráðherra, þurfa sveitarfélög ekki lengur að leita eftir samþykki skjólstæðings fyrir öflun og vinnslu gagna þegar veitt er þjónusta á grundvelli laga um félagsþjónustu sveitarfélaga, þ.m.t. fjárhagsaðstoð, húsnæðismál o. fl.

Sveitarstjórnarvettvangurinn fundaði í nítjánda sinn í Hurdal í Noregi 27.-28. júní 2019. Hann tók til starfa árið 2010 til að gæta hagsmuna sveitarstjórnarstigsins í EES EFTA samstarfinu. Í honum eiga sæti sex kjörnir fulltrúar á sveitarstjórnarstigi frá Íslandi og Noregi og tveir áheyrnarfulltrúar frá Sviss. Samband íslenskra sveitarfélaga, Reykjavíkurborg og landshlutasamtök sveitarfélaga tilnefna fulltrúa af hálfu Íslands.

Hag- og upplýsingasvið sambandsins hefur tekið saman upplýsingar um tekjur sveitarfélaga af staðgreiðslu útsvars á fyrri hluta 2019 og borið hana saman við sömu mánuði í fyrra. Um er að ræða greidda staðgreiðslu útsvars frá febrúar til júní. Staðgreiðsla sem greidd er í janúar er að mestum hluta lagt á launagreiðslur ársins á undan og þess vegna er sá mánuður ekki tekinn með.

Jafnréttisstofa í samstarfi við Samband íslenskra sveitarfélaga og Garðabæ boðar til landsfundar um jafnréttismál sveitarfélaga dagana 4.-5. september 2019.

Í byrjun júlí mánaðar opnaði Verkefnastjórn stjórnvalda um heimsmarkmið Sameinuðu þjóðanna Heimsmarkmiðagátt þar sem fólki gefst kostur á að koma verkefnum tengdum heimsmarkmiðum Sameinuðu þjóðanna á framfæri.

Samninganefnd sambandsins hefur endurnýjað viðræðuáætlanir við flesta viðsemjendur og samið um eingreiðslur.

Afkoma sveitarfélaga var óvenju góð á árinu 2018 og fá dæmi eru um viðlíka afkomu á þessari öld. Rekstrarafgangur A-hluta nam tæpum 15 milljörðum króna eða 4,5% af tekjum, samanborið við 4,2% árið 2017 og 0,1% halla að meðaltali árin 2010-2016. Rekstur A-hluta skilaði veltufé sem nam 11,3% af tekjum árið 2018 en 10,5% árið áður og 11,9% 2016.

Forsætisráðherra, fjármála- og efnahagsráðherra, samgöngu- og sveitarstjórnarráðherra, Samband íslenskra sveitarfélaga, Alþýðusamband Íslands, Bandalag háskólamanna, BSRB, Kennarasamband Íslands, Samtök atvinnulífsins og Seðlabanki Íslands hafa undirritað samkomulag um hlutverk og umgjörð Þjóðhagsráðs.

Á meðal markmiða framkvæmdaáætlunar í barnavernd 2019-2022 er að efla grunnvinnslu barnaverndarmála á fyrstu stigum, stuðla að snemmtækri íhlutun, auka samvinnu ríkis og sveitarfélaga og fjölga gagnreyndum úrræðum. Gert hefur verið ráð fyrir 600 m.kr. fjáraukningu til þess að byggja upp og þróa úrræði og þjónustu í málaflokknum.

Félagsmálaráðuneytið, Kópavogsbær, hugbúnaðarfyrirtækið Kara Connect og UNICEF á Íslandi undirrituðu í dag samstarfssamning um þróun á samræmdu upplýsingakerfi vegna líðanar og velferðar barna. Samningurinn er liður í viðbrögðum stjórnvalda við könnun UNICEF á Íslandi sem bendir til, að 16,4% barna verði fyrir líkamlegu eða kynferðislegu ofbeldi hér á landi fyrir átján ára aldur.

Skútustaðahreppur hefur ákveðið að kolefnisjafna rekstur sveitarfélagsins. Jafnframt var á fundi sveitarstjórnar í gær, samþykkt að ganga til samninga við Landgræðsluna vegna árlegrar gróðursetningar á trjám til kolefnisbindingar á Hólasandi. Skútustaðarhreppur er fyrst sveitarfélaga á landinu til að kolefnisjafna rekstur sinn, næst á eftir Hafnarfjarðarbæ, sem undirritaði samning við Kolvið þann 19. júní sl. um kolefnisjöfnun vegna rekstrar á sveitarfélaginu og stofnunum þess.

Meirihluti fjárlaganefndar hefur lagt til að fallið verði frá svokallaðri tímabundinni frystingu á framlögum til Jöfnunarsjóð sveitarfélaga árin 2020 og 2021. Í því felst að framlög til sjóðsins hækka á þessu tímabili um 279 m.kr. árið 2020 og 1.404 m.kr. árið þar á eftir eða um 1.683 m.kr. alls. Með þessari tillögu meirihlutans hefur verið fallið frá þeim skerðingum sem sveitarfélögin í landinu mótmæltu harðlega sl. vor.

Stofnfundur um samráðsvettvang sveitarfélaganna vegna loftslagsmála og heimsmarkmiða Sameinuðu þjóðanna um sjálfbæra þróun fór fram í dag. Alls hefur 41 sveitarfélag gerst aðili að vettvangnum, en frestur til að tilkynna þátttöku á samráðsvettvangnum er til næstu áramóta.