Nýr starfshópur um stefnumótandi áætlun ríkisins um málefni sveitarfélaga hélt sinn fyrsta fund í innviðaráðuneytinu þann 15. nóvember sl.
Hópnum er ætlað að skila tillögu til innviðaráðherra um stefnu stjórnvalda gagnvart sveitarfélögum til fimmtán ára 2024 til 2038 og aðgerðaáætlun til fimm ára 2024 til 2028 í byrjun næsta árs. Stefnumótunin byggir á ákvæði sveitarstjórnarlaga um að ráðherra leggi fram endurskoðaða stefnu í málaflokki sveitarfélaga á þriggja ára fresti. Stefnan tekur við af fyrstu stefnu og aðgerðaáætlun stjórnvalda í málefnum sveitarfélaganna í landinu á næsta ári.
Í hópnum eiga sæti:
- Stefán Vagn Stefánsson veitir starfshópnum formennsku fyrir hönd innviðaráðherra
- Rósa Guðbjartsdóttir bæjarstjóri í Hafnarfirði, skipuð af ráðherra
- Heiða Björg Hilmisdóttir, formaður sambandsins og borgarfulltrúi, f.h. sambandsins
- Jón Björn Hákonarson, varaformaður sambandsins og bæjarstjóri í Fjarðabyggð, f.h. sambandsins
- Aðalsteinn Þorsteinsson, skrifstofustjóri sveitarfélaga og byggðamála í ráðuneytinu - áheyrnarfulltrúi
- Karl Björnsson, framkvæmdastjóri sambandsins - áheyrnarfulltrúi
Fyrsta stefna og aðgerðaáætlun stjórnvalda í málefnum sveitarfélaganna fól m.a. í sér aukinn stuðning Jöfnunarsjóðs við sameiningu sveitarfélaga, átak í stafrænni umbreytingu sveitarfélaga, umbætur á starfsaðstæðum kjörinna fulltrúa og vinnu við fjármálaviðmið og endurskoðun tekjustofna sveitarfélaga. Endurskoðun stefnumótunarinnar felur m.a. í sér víðtækt samráð við sveitarfélögin í landinu, íbúa og aðra hagsmunaaðila um stöðu sveitarfélaga, áskoranir og tækifæri til framtíðar.
Á fyrsta fundi starfshópsins lagði innviðaráðherra áherslu á mikilvægi stefnumótunarinnar, sagðist hlakka til að taka á móti tillögum hópsins og óskaði honum velfarnaðar í vinnunni framundan.
Stefnt er að því að starfshópurinn skili tillögum til ráðherra í mars á næsta ári.