05. júl. 2010

OPEN DAYS; Evrópuvika svæða og borga 4.-7. október

  • logo_opendays

Einn helsti viðburður sveitarstjórnarmanna í Evrópu, OPEN DAYS , fer fram í Brussel dagana 4. – 7. október nk.  Það eru Héraðanefnd (Committee of the Regions) og byggðadeild (DG Regio) Evrópusambandsins sem standa fyrir viðburðinum en hann er nú haldinn í áttunda sinn. Á annað hundrað uppákomur; málþing, vinnustofur, sýningar og viðburðir, verða fara fram í samvinnu héraða, borga og sveitarfélaga,  atvinnulífsins, alþjóðastofnana og háskólasamfélagsins. Íslensk sveitarfélög hafa tekið þátt í viðburðinum undanfarin ár, t.d. skipulögðu Samtök sveitarfélaga á Vesturlandi, Fjórðungssamband Vestfirðinga og Samtök sveitarfélaga á Norðurlandi málstofur árið 2008 og landshlutasamtökin sameinuðust um bás á vörusýningunni.

OPEN DAYS skiptist í tvo hluta, annars vegar málstofur, þar sem fjallað er um ýmislegt er lýtur að sóknarfærum í héruðum og sveitarfélögum og hins vegar nokkurs konar vörusýningu þar sem fjölmörg svæði kynna sig með það í huga að leita eftir samstarfsaðilum og fjárfestum.

Yfirskrift OPEN DAYS 2010 er „samkeppnishæfi, samvinna og samstaða (e. cohesion)“ en fjallað verður um fyrirmyndarverkefni og reynslu sveitarstjórnarmanna alls staðar að úr Evrópu. Að þessu sinni geta þátttakendur valið á milli viðburða sem skipt er í þrjá mismunandi flokka, þ.e.

  • Málþing um „samkeppnishæfi“ munu leggja áherslu á nýsköpun, byggðaþróun og „grænan hagvöxt“ og á árangur svæða sem studd hafa verið af uppbyggingarsjóðum ESB.
  • Vinnustofur um „samvinnu“ munu m.a. fjalla um innlenda svæðasamvinnu, samstarf héraða þvert á landamæri og sk. macro-regions.
  • Þemað „samstaða“ eða „samloðun“ mun beina sjónum að „svæðisbundinni samstöðu“ („samloðun“) og „félagslegri samloðun“ og því hvernig unnt er að koma ólíkum stefnumiðum í framkvæmd á sveitarstjórnarstiginu.

Í byggingu Héraðanefndarinnar verður að finna eins konar markaðstorg: The Meeting Place, þar sem fyrirtæki, svæði, borgir og fjármálastofnanir munu m.a. kynna fyrirmyndarverkefni á sviði svæðasamvinnu, samvinnu einka- og opinberra aðila og svæðasamstarf yfir landamæri. Þá mun OPEN DAYS Háskólinn, í samstarfi við alþjóðastofnanir og samtök, setja fram sjónarmið og rannsóknir háskólasamfélagsins varðandi byggðaþróunarmál í Evrópu og stefnu ESB.

Í september, október og nóvember verða svo haldnir á þriðja hundrað viðburðir um alla Evrópu undir yfirskriftinni Evrópa í bænum mínum. Innlendar stofnanir og samtök, s.s. héruð, sveitarfélög, umsjónaraðilar uppbyggingarsjóða, atvinnuþróunarfélög, samtök atvinnulífs, háskólar eru hvött til að taka þátt og til að leggja skipuleggjendum OPEN DAYS til hugmyndir að viðburðum.

Skráning á málstofur er hafin og eru þeir sem hafa áhuga á að sækja OPEN DAYS hvattir til að skrá sig snemma þar sem reynsla undanfarinna ára sýnir að viðburðir fyllast fljótt.  

Guðrún Dögg Guðmundsdóttir, forstöðumaður Brusselskrifstofu Sambands íslenskra sveitarfélaga, veitir einnig nánari upplýsingar.