29. maí 2012

Aðgangur útlendinga frá ríkjum utan EES að Íslandi

  • SIS_Althjodamal_760x640

Aðgangur útlendinga frá ríkjum utan Evrópska efnahagssvæðisins að Íslandi verður til umfjöllunar á næsta fundi í fundaröð innanríkisráðuneytisins um mannréttindamál. Fundurinn verður haldinn í Iðnó miðvikudaginn 30. maí kl. 9 til 10.30. Þetta er sjötti og síðasti fundurinn að sinni í fundaröð innanríkisráðuneytisins um hin ýmsu svið mannréttindamála.

Á fundinum segir Halla Gunnarsdóttir, aðstoðarmaður innanríkisráðherra, frá starfi starfshóps um málefni útlendinga utan EES sem innanríkisráðherra setti á fót í júlí á síðasta ári. Hópurinn hefur fjallað um aðgengi útlendinga utan EES að Íslandi, jafnt þeirra sem óska eftir dvöl á Íslandi og þeirra sem sækja um hæli. Að loknu erindi hennar verða pallborðsumræður.


Dagskrá verður sem hér segir:

 

 09:00 Ávörp ráðherra

Ögmundur Jónasson innanríkisráðherra
Guðbjartur Hannesson, velferðarráðherra

09:10 Halla Gunnarsdóttir, formaður starfshóps um málefni útlendinga utan EES
09:40 Pallborðsumræður. Í pallborði eiga sæti fulltrúar frá:
  • Mannréttindaskrifstofu Íslands
  • Útlendingastofnun
  • Fjölmenningarsetri
  • No borders
  • Rauða krossi Íslands
  • Samtökum kvenna af erlendum uppruna
  • Sambandi íslenskra sveitarfélaga

 

Innanríkisráðuneytið hóf fyrir áramót fundaröð um mannréttindamál í tengslum við mótun landsáætlunar í mannréttindum. Haldnir hafa verið fundir í hverjum mánuði og kastljósinu beint að ýmsum sviðum mannréttinda, svo sem tjáningarfrelsi og lýðræði, trúfrelsi, mannréttindum  geðsjúkra og hatursáróðri. Fundaröðin er liður í viðleitni ráðuneytisins til að tryggja að stefnumótun í svo margþættum og mikilvægum málaflokki sem mannréttindi eru eigi sér stað í samstarfi og í beinum tengslum við hagsmunaaðila, fræðasamfélag og almenning.