18. ágú. 2011

Yfirlýsing frá SNS

Samninganefnd Sambands íslenskra sveitarfélaga og samninganefnd Félags leikskólakennara hafa fyrir milligöngu ríkissáttasemjara reynt að ná samkomulagi um framkvæmd boðaðs verkfalls leikskólakennara þann 22. ágúst næstkomandi. Þær viðræður hafa ekki skilað árangri.

Samninganefnd Sambands íslenskra sveitarfélaga taldi mikilvægt að ná samkomulagi við Félag leikskólakennara um framkvæmdina til að koma í veg fyrir átök við leikskóla ef til verkfalls kemur.

Félag leikskólakennara hefur lýst því yfir að það muni beita öllum tiltækum ráðum til að knýja á um að farið verði eftir þeim einhliða viðmiðunarreglum sem stjórn félagsins hefur sent til stjórnenda leikskóla komi til verkfalls. Samninganefnd Sambands íslenskra sveitarfélaga  hefur mótmælt þeim reglum og því að stéttarfélag gefi stjórnendum í sveitarfélögum bein fyrirmæli.

Í ljósi þess að líkur eru á að leikskólakennarar grípi til aðgerða hefjist  verkfall  beinir samninganefnd Sambands íslenskra sveitarfélaga því til sveitarfélaga að þau  skipuleggi starfsemi leikskóla þannig að forðast megi  átök við verkfallsverði Félags leikskólakennara.

Þar sem enn er ágreiningur er um framkvæmd verkfallsins mun samninganefnd Sambands íslenskra sveitarfélaga, ef til verkfalls kemur, vísa málinu til úrskurðar félagsdóms.