Guðríður Aadnegard, námsráðgjafi og umsjónarkennari við Grunnskólann í Hveragerði, hlaut hvatningarverðlaun dags gegn einelti sem veitt voru 9. nóvember sl.
Forseti Íslands, Guðni Th. Jóhannesson, og Lilja Dögg Alfreðsdóttir mennta- og menningarmálaráðherra afhentu Guðríði verðlaunin við hátíðlega athöfn í Rimaskóla.
Góð fyrirmynd annarra kennara
Fagráð gegn einelti hjá Menntamálastofnun valdi verðlaunahafa úr innsendum tilnefningum og varð Guðríður fyrir valinu vegna þess ómetanlega starfs sem hún hefur unnið í eineltismálum undanfarin ár. Hún sé þar að auki góð fyrirmynd fyrir aðra kennara þegar kemur að samskiptamálum nemenda, að því er greint frá í tilnefningunni. Hún hafi í gegnum tíðina látið málefni nemenda sig sérstaklega varða og nálgast þau af mikilli hlýju og virðingu. Þá hefur Guðríður einnig látið til sín taka á vettvangi íþrótta þar sem hún starfaði í broddi fylkingar hjá HSK, UMFÍ og ÍSÍ. Þar hafi hún sem fyrr ávallt haft hag iðkenda að leiðarljósi og lagt ríka áherslu á góð samskipti innan vallar sem utan.