14. nóv. 2018

Vímuefnavandi ungmenna

Aukin neysla ungs fólks á ávana- og fíkniefnum og normalísering slíkrar neyslu var á meðal þess sem fjallað var um á fjölsóttum fundi Náum áttum hópsins, samstarfshópi um fræðslu- og forvarnarmál, nú í morgun. 

Yfirskrift fundarins var  Vímuefnavandi ungmenna - hvar getum við gert betur?  Mikill áhugi var á fundinum og var honum streymt beint á vef sambandsins. 

Erindi fundarins voru tvö. Það fyrra flutti Jón Magnús Kristjánsson, yfirlæknir bráðalækninga á Landspítala og fjallaði hann m.a. um þá normalíseringu sem er að eiga sér stað í neyslu ýmiss konar ávana- og fíkniefna og aukna útbreiðslu þessara efna á meðal ungs fólks sem fellur ekki undir hefðbundna áhættuhópa. 

Í síðara erindinu sagði Árni Einarsson, framkvæmdastjóri FRÆ, frá ungum fíkli sem féll nýlega fyrir eigin hendi og þann lærdóm sem mennta- og heilbrigðiskerfi geta dregið af átakanlegri sögu hans. 

Að erindum loknum voru pallborðsumræður þar sem eftirtaldir tóku þátt:

  • Karl Steinar Valsson, yfirlögregluþjónn hjá LHR,
  • Guðrún Marinósdóttir, deildarstjóri/félagsráðgjafi hjá Barnavernd Reykjavíkur,
  • Vilborg Grétarsdóttir, þroskaþjálfi/félagsráðgjafi hjá Barnavernd Reykjavíkur,
  • Kjell Hymer, unglingafulltrúi hjá Barnavernd Kópavogs,
  • Helgi Grímsson, sviðsstjóri skóla- og frístundasviðs Reykjavíkur og
  • Jón Magnús Kristjánsson, yfirlæknir bráðalækninga á Landspítala. 

Fundarstjóri var Ólöf Ásta Farestveit. Nálgast má upptökur af erindum og pallborðsumræðum á vef sambandsins.