02. júl. 2019

Samningur um rekstur öldrunarþjónustu undirritaður á Akureyri

Öldrunarheimili Akureyrar (ÖA) hafa undirritað samning við Sjúkratryggingar Íslands (SÍ) um rekstur öldrunarþjónustu. Heilbrigðisráðherra staðfesti samninginn við undirritun hans á Akureyri á laugardag. Með samningnum er skapað svigrúm fyrir aukinn sveigjanleika þjónustunnar til að mæta betur þörfum notenda. Þess er vænst að samningurinn verði fyrirmynd að gerð sambærilegra samninga milli SÍ og annarra rekstraraðila hjúkrunarheimila um allt land.

Nýjar áherslur og breytt fyrirkomulag samninga

Um síðustu áramót rann út rammasamningur Sjúkratrygginga Íslands um rekstur dvalar- og hjúkrunarheimila sem gilt hafði frá 1. janúar 2016.  Með samningi SÍ og ÖA er brotið í blað þar sem gerður er sérstakur samningur á milli aðila í stað eins samnings fyrir alla rekstraraðila líkt og áður. Eins og fram kemur í samningnum er meginmarkmiðið að skapa svigrúm til sveigjanleika í öldrunarþjónustu sem gefur meðal annars kost á tímabundnum úrræðum og breytilegum þjónustutíma eftir þörfum.

Nýsköpun í öldrunarþjónustu

Öldrunarheimili Akureyrar óskuðu eftir og fengu á liðnu ári heimild heilbrigðisráðherra til að ráðast í nýsköpunar- og þróunarverkefni í öldrunarþjónustu sem í stuttu máli byggist á sveigjanlegri dagþjónustu í stað hvíldarinnlagna. Verkefnið hófst í byrjun þessa árs og hefur gefið góða raun. Eitt markmið samningsins er að með því að bjóða fjölbreyttari og meiri þjónustu yfir daginn fyrir fólk sem býr heima en þarf mikinn stuðning megi draga úr og/eða seinka þörf fyrir innlögn á hjúkrunarheimili.


 Á myndinni að ofan, sem er tekin af vef Stjórnarráðsins, má sjá Svandísi Svavarsdóttur heilbrigðisráðherra, Maríu Heimisdóttur, forstjóra Sjúkratrygginga Íslands, Halldór S. Guðmundsson, framkvæmdastjóra Öldrunarheimila Akureyrar, og Ásthildi Sturludóttur, bæjarstjóra á Akureyri.