08. ágú. 2013

Niðurstöður könnunar um húsaleigubætur

  • SIS_Felagsthjonusta_760x640

Í nýrri könnun um útgreiðslu húsaleigubóta, sem unnin var fyrir samráðsnefnd um framkvæmd laga og reglugerða um húsaleigubætur kemur m.a. fram að námsmenn, öryrkjar og launafólk eru stærstu hópar þeirra sem eru á leigumarkaði og fá greiddar húsaleigubætur. Fjórðungur húsaleigubótaþega býr í félagslegu leiguhúsnæði á vegum sveitarfélaga, helmingur er á almennum leigumarkaði en einnig er stór hópur sem býr í námsmannahúsnæði, s.s. stúdentagörðum.

Í könnuninni kemur einnig fram að hlutfall þeirra sem búa í félagslegu leiguhúsnæði á vegum sveitarfélaga er umtalsvert hærra meðal þeirra sem fá sérstakar húsaleigubætur en meðal húsaleigubótaþega almennt. Alls greiða um 40% sveitarfélaga sérstakar húsaleigubætur en þar búa um 83% íbúa landsins. Þá kemur einnig fram að það er ekkert sem bendir til þess að tengsl séu milli stærðar sveitarfélaga og fjárhæða sérstakra húsaleigubóta og ekki er mikill munur milli höfuðborgarsvæðis og landsbyggðar.