30. sep. 2011

Aðstæður fatlaðs fólks: Aðbúnaður, þjónusta, viðhorf, líðan, sjálfræði

  • Hjólastóll

Miðvikudaginn 26. október nk. verður haldin opin ráðstefna á vegum velferðarráðuneytisins í samstarfi við Samband íslenskra sveitarfélaga, Félagsvísindastofnun, Rannsóknarstofnun í fötlunarfræðum og Stofnun stjórnsýslufræða og stjórnmála við Háskóla Íslands undir yfirskriftinni  „Aðstæður fatlaðs fólks: Aðbúnaður, þjónusta, viðhorf, líðan, sjálfræði“.

Á ráðstefnunni verður kynnt stöðuúttekt á þjónustu við fatlað fólk við tilfærslu á málaflokknum frá ríki til sveitarfélaga 1. janúar 2011 ásamt kynningu á niðurstöðum rannsóknarinnar „Lærdómur til framtíðar“.

 

Ráðstefnan verður haldinn í Norðurljósasal Hörpu og hefst kl. 13.00. Áformað er að ráðstefnunni ljúki kl. 16:45.  Aðgangur öllum opinn, en til hagræðis eru þátttakendur beðnir um að skrá sig á vef Stjórnsýslustofnunar HÍ.


Dagskrá:

 13:00 Ávarp
Guðbjartur Hannesson velferðarráðherra
13:10 Niðurstöður rannsóknar um flutning þjónustu við fatlað fólk frá ríki til sveitarfélaga
Dr. Guðbjörg Andrea Jónsdóttir, forstöðumaður Félagsvísindastofnunar og Dr. Rannveig Traustadóttir, prófessor í fötlunarfræðum HÍ.
14:00 Lærdómur sem sveitarfélögin geta dregið af niðurstöðum rannsóknarinnar.
Tryggvi Þórhallsson, lögfræði- og velferðarsvið Sambands íslenskra sveitarfélaga.
  Umræður í 15 mín og síðan kaffi í 15 mín.
14:45 Viðbrögð sveitarfélaga og hagsmunaaðila.
  • Frá sveitarfélagi sem tók við málaflokknum um síðustu áramót.
    Stella Víðisdóttir, sviðsstjóri velferðarsviðs Reykjavíkurborgar
    Ragnar Þorsteinsson, sviðsstjóri menntasviðs Reykjavíkurborgar
  • Frá sveitarfélagi með þjónustusamning um málefni fatlaðra.
    Soffía Lárusdóttir, framkvæmdastjóri búsetudeildar Akureyrarbæjar.
  • Frá sjónarhóli notenda.
    Hrefna K. Óskarsdóttir, verkefnastjóri Öryrkjabandalags Íslands .
    Friðrik Sigurðsson, framkvæmdastjóri Þroskahjálpar.
  • Frá sjónarhóli starfsmanna.
    Anna Lilja Magnúsdóttir, framkvæmdastjóri Þroskaþjálfafélags Íslands.
    Þórarinn Eyfjörð, framkvæmdastjóri SFR.
15:55 Freyja Haraldsdóttir, framkvæmdastjóri NPA miðstöðvarinnar  tekur saman niðurstöður ráðstefnunnar.
16:15 Umræður
16:40 Halldór Halldórsson, formaður Sambands íslenskra sveitarfélaga flytur lokaorð.

 

 Ráðstefnustjóri er Lára Björnsdóttir, sérfræðingur í velferðarráðuneytinu.

 

Um síðustu áramót var ábyrgð á þjónustu við fatlað fólk flutt frá ríki til sveitarfélaga.  Þessi tilfærsla á verkefnum milli stjórnsýslustiga átti sér nokkurn aðdraganda en endanleg ákvörðun var tekin í mars 2009 með undirritun viljayfirlýsingar milli ríkis og sveitarfélaga um að hún skyldi eiga sér stað 2011. 

Eitt af meginmarkmiðum tilfærslunnar er að bæta þjónustu við fatlað fólk og auka möguleika á að laga hana að þörfum notenda með hliðsjón af ólíkum aðstæðum. Til að meta hvort þetta markmið náist gerði velferðarráðuneytið samkomulag við Félagsvísindastofnun, Rannsóknarstofnun í fötlunarfræðum og Stofnun stjórnsýslufræða og stjórnmála við HÍ um að gera viðamikla úttekt á stöðu og þjónustu við fatlað fólk við flutning málaflokksins milli stjórnsýslustiga.  Ráðgert er að gera sambærilega úttekt á árinu 2014 til að meta faglegan ávinning af tilfærslunni.

Rannsóknin beindist að þjónustunotendum og aðstandendum þeirra, auk starfsmanna í þjónustu við fatlað fólk. Á ráðstefnunni verða niðurstöður hennar kynntar og ræddar.  Horft verður til framtíðar varðandi hugsanlegar breytingar á áherslum eða forgangsröðun með hliðsjón  af niðurstöðum rannsóknarinnar og lærdómi sem hægt er að draga af henni.