Fréttir: jún 2018
Ársreikningar sveitarfélaga 2017
Niðurstöður liggja nú fyrir um ársreikninga 69 af 74 sveitarfélögum landsins fyrir árið 2017. Í þessum sveitarfélögum búa vel yfir 99% landsmanna. Fjallað er um fjárhagsstöðu sveitarfélaga eins og í hana má ráða út frá árseikningunum í Fréttabréfi Hag- og upplýsingasviðs sambandsins.
Samningur um eflingu heimagistingarvaktar
Ráðherra ferðamála, Þórdís Kolbrún Reykfjörð Gylfadóttir, og sýslumaðurinn á höfuðborgarsvæðinu, Þórólfur Halldórsson, undirrituðu í dag samkomulag um eftirlit með heimagistingu. Samningurinn kveður á um 64 milljóna króna fjárveitingu til embættisins en það fer með eftirlit með heimagistingu á öllu landinu.
Nýjar kynningar á heimasíðu sambandsins um persónuvernd
Sambandið hefur sett hér á vefinn eftirfarandi tvennar kynningar er varða nýsamþykkt lög um persónuvernd og meðferð persónuupplýsinga sem taka gildi 15. júlí n.k. Hvetur sambandið til þess að móttakendur sendi kynningar áfram til þeirra í sveitarfélaginu sem gætu haft hag af kynningunum og/eða þurfa á fræðslu að halda enda ekki nema 18. dagar þar til lögin taka gildi.
Ný skýrsla um Airbnb og húsnæðismarkaðinn
Tekjur af Airbnb-útleigu á Íslandi hafa vaxið hægar á fyrstu mánuðum ársins en á sama tímabili síðustu ár. Fjöldi gistieininga vex mun hægar en áður og hefur bókunarhlutfall verið lægra í upphafi þessa árs en á sama tíma í fyrra. Á hinn bóginn hefur Airbnb-íbúðum á landsbyggðinni fjölgað talsvert hraðar en á höfuðborgarsvæðinu undanfarin misseri. Sveitarfélög verða af umtalsverðum tekjum.
Öldungaráð og notendaráð í þjónustu við fatlað fólk
Ný og breytt lög um félagsþjónustu sveitarfélaga taka gildi þann 1. október nk. Meðal nýmæla er að öldungaráð taka við því hlutverki sem þjónustuhópum aldraðra hefur fram til þessa verið falið að sinna. Er ráð fyrir því gert að öldungaráð starfi í hverju sveitarfélagi eða á grundvelli samvinnu milli sveitarfélaga.
Sveitarfélögin og kynjajafnrétti, mannréttindi og samfélagsleg þátttaka
Ráðstefna sem Samtök evrópskra sveitarfélagasamtaka, CEMR, heldur fjórða hvert ár um kynjajafnrétti, mannréttindamál og samfélagsþátttöku allra fór nýlega fram í spænsku borginni Bilbao. Þátttakendur voru um 500 talsins, aðallega starfsmenn sveitarfélaga og svæða í Evrópu, kjörnir fulltrúar og fulltrúar frjálsra félagasamtaka. Framlag Íslands var kynning Halldóru Gunnarsdóttur, jafnréttissérfræðings Reykjavíkurborgar, á mannréttindastefnu borgarinnar.
Starfseminni skipt niður á báða staði
Sameinað sveitarfélag Garðs og Sandgerðisbæjar hefur nú tekið til starfa og hefur starfseminni verið skipt niður á báða staði, eins og ákveðið var. Stjórnsýsla, fjármál og umhverfis-, skipulags- og byggingamál eru í stjórnsýsluhúsinu í Garði, en félagsþjónusta og fjölskyldumál í stjórnsýluhúsinu í Sandgerði.
Hlutur kvenna hefur aldrei verið meiri
Nærri einn af hverjum tveimur sveitarstjórnarmönnum er kona og hefur hlutur kvenna aldrei verið meiri í sveitarstjórnum en nú eða 47,2% Til samanburðar má nefna að hlutfall kvenna var að sveitarstjórnakosningum afloknum árið 1998 einungis 28,2% og hefur hlutfall þeirra því nánast tvöfaldast á sl. 20 árum.
Persónuverndarlöggjöfin samþykkt þrátt fyrir annmarka
Ný persónuverndarlöggjöf, sem samþykkt var á Alþingi seint í gærkvöld, tekur gildi 15. júlí nk. Samband íslenskra sveitarfélaga gerði alvarlegar athugsemdir við frumvarp til laganna, m.a. fyrir skort á samráði um efni frumvarpsins, óhófleg sektarákvæði, mikinn innleiðingarkostnað hjá sveitarfélögum og afar nauman aðlögunartíma. Minnt er á tékklistann sem sambandið hefur gert fyrir sveitarstjórnir vegna málsins.
Nýsköpunarverðlaun 2018 í opinberri þjónustu og stjórnsýslu
Rafræna lyfjaumsjónarkerfið ALFA hlaut nýsköpunarverðlaunin 2018 í opinberri þjónustu og stjórnsýslu. Verðlaunin veitti Bjarni Benediktsson, fjármála- og efnahagsráðherra, í lokin á ráðstefnunni „Betri opinber þjónusta með öflugu samstarfi og nýtingu stafrænna lausna“. Ísafjarðarbær, Kópavogsbær, Skútustaðarhreppur og Vatnajökulsþjóðgarður hlutu sérstaka viðurkenningu fyrir nýsköpun.
Hvernig er að vera af erlendum uppruna á Íslandi?
Úthlutun úr þróunarsjóði innflytjendamála fór nýlega fram og hlaut að þessu sinni hæsta styrkinn Samband íslenskra framhaldsskólanema fyrir Culture Class. Verkefnið felst í framleiðslu á fræðslumyndböndum um íslenskt samfélag og hvers konar upplifun það er hér á landi, að vera af erlendum uppruna.
Málþing um vindorku og orkumannvirki
Samband íslenskra sveitarfélaga og Samtök orkusveitarfélaga gangast fyrir sameiginlegu málþingi um vindorku og orkumannvirki á Grand hóteli síðdegis í dag. Nálgast má upptökur af málþinginu hér.
Nýsköpun í opinberri þjónustu og stjórnsýslu 2018
Ráðstefnan Nýsköpun í opinberri þjónustu og stjórnsýslu 2018 fer fram í dag á Grand Hótel í Reykjavík. Yfirskrift ráðstefnunnar er „Betri opinber þjónusta með öflugu samstarfi og nýtingu stafrænna lausna“. Nálgast má upptökur af ráðstefnunni hér.
Kynningarfundir kjarasviðs vegna kjarasamnings við FG
Kjarasvið Sambands íslenskra sveitarfélaga boðar til funda á nokkrum stöðum á landinu þar sem kynntur verður kjarasamningur grunnskólakennara sem undirritaður var 25. maí sl. og samþykktur var í atkvæðagreiðslu félagsmanna sem lauk 5. júní sl.
Óhóflegar heimildir til að leggja sektir á opinbera aðila í persónuverndarfrumvarpi
Samband íslenskra sveitarfélaga gagnrýnir harðlega vinnubrögð við gerð frumvarps til nýrra persónuverndarlaga. Hörðust er gagnrýnin á sektarákvæði frumvarpsins, sem heimila Persónuvernd að leggja milljarða króna sektir á opinbera aðila vegna lögbundinna verkefna. Einnig sætir innleiðingarferli gagnrýni ásamt þeim mikla og óþarfa flýti sem einkennt hefur málið af hálfu ríkisvaldsins. Sambandið skorar á Alþingi að veita málinu eðlilega umfjöllun og tryggja að ákvæði þar sem val um innleiðingu er til staðar séu ígrunduð vandlega.
Kennarar heiðraðir fyrir framúrskarandi störf
Menntavísindasvið Háskóla Íslands veitti fimm kennurum viðurkenningar fyrir framúrskarandi störf við hátíðlega athöfn í Háskóla Íslands í dag. Verðlaunin eru afrakstur kynningarátakisins Hafðu áhrif sem Menntavísindasvið Háskóla Íslands stóð fyrir á vormánuðum og gaf almenningi kost á að tilnefna eftirminnilega kennara.
Dagsektir vegna vanrækslu sveitarfélaga
Drög að reglugerð um fjárhæð dagsekta vegna vanrækslu sveitarfélaga, sem samgöngu- og sveitarstjórnarráðherra hyggst setja á grundvelli 116. gr. sveitarstjórnarlaga, hafa verið birt í samráðsgáttinni. Tilgreindar eru lágmarks- og hámarksfjárhæðir sekta sem leggja má á sveitarfélög hvern þann dag sem þau vanrækja lögbundnar skyldur sínar. Fjárhæðir dagsekta geta orðið á bilinu 25 til 300 þ.kr.
Kerfisáætlun Landsnets í opnu umsagnarferli
Landsnet hefur sett í opið umsagnarferli tillögu að kerfisáætlun um uppbyggingu flutningskerfis raforku á Íslandi. Tillagan gildir fyrir tímabilið 2018-2027 og skiptist í tvo meginhluta eða langtímaáætlun um þróun meginflutningskerfisins og þriggja ára framkvæmdaáætlun fyrir tímabilið 2019-2021. Haldnir verða opnir kynningarfundir um land allt nu í júní.