Námsleyfasjóður kennara og stjórnenda grunnskóla
Stjórn Námsleyfasjóðs er skipuð tveimur aðilum frá Kennarasambandi Íslands og þremur frá Sambandi íslenskra sveitarfélaga. Frá KÍ eru: Kristín Jónsdóttir og Sigríður Heiða Bragadóttir og frá Sambandi íslenskra sveitarfélaga eru: Lúðvík Hjalti Jónsson, Valgerður Janusdóttir og Guðfinna Harðardóttir. Formaður stjórnar er Lúðvík Hjalti Jónsson.
Stjórn Námsleyfasjóðs fer einnig með málefni Endurmenntunarsjóðs grunnskóla.
Starfsmenn sjóðsins eru Guðfinna Harðardóttir og Ragnheiður Snorradóttir.
Umsækjandi sem æskir námsleyfis skal að lágmarki fullnægja eftirfarandi skilyrðum og skuldbindingum sbr. reglur um Námsleyfasjóð:
- Hafa gegnt starfi í 10 ár samtals við kennslu, ráðgjöf eða stjórnun í grunnskóla, í eigi minna en hálfu starfi, og verið í starfi sl. fjögur ár.
- Vera fastráðinn starfsmaður sveitarfélags eða aðila sem stofnað er til með samstarfi sveitarfélaga og taka laun samkvæmt kjarasamningi Sambands íslenskra sveitarfélaga og Félags grunnskólakennara eða kjarasamningi Sambands íslenskra sveitarfélaga og Skólastjórafélags Íslands.
- Ljúka 60 ECTS eininga háskólanámi, eða sambærilegu námi, miðað við 1/1 námsleyfi, og skal námið miða að því að nýtast viðkomandi í því starfi sem hann er ráðinn til að sinna.
- Að loknu námsleyfi skal námleyfishafi senda stjórn sjóðsins innan fjögurra mánaða staðfest vottorð skóla um nám í námsleyfinu.
- Enginn getur fengið hærri fjárhæð í námsleyfi en sem nemur tveggja ára föstum launum á starfsævi viðkomandi.
- Námslaun skulu greidd samkvæmt starfshlutfalli námsleyfisþega næsta skólaár áður en námsleyfi hefst eða meðalstarfshlutfalli síðustu þriggja ára ef það er hærra
Úthlutun námsleyfa vegna skólaársins 2012-2013
Úthlutun námsleyfa vegna skólaársins 2012-2013 er lokið. Alls bárust Námsleyfasjóði 126 fullgildar umsóknir um námsleyfi skólaárið 2012-2013. Fjármagn til úthlutunar leyfði að veitt væru 34 námsleyfi. Aðeins var því hægt að fallast á tæplega 27% þeirra beiðna sem fyrir lágu og því ljóst að ýmsum hæfum einstaklingum, með áhugaverðar umsóknir varð að hafna.
Eins og fram kom í auglýsingu var ákveðið að allt að 1/3 leyfa yrði úthlutað sérstaklega vegna náms sem tengist skólaþróun og árangursríkri kennslu á unglingastigi og var 11 leyfum úthlutað til slíkra verkefna. Að öðru leyti var leyfum skipt á milli landshluta með hliðsjón af fjölda starfandi kennara og stjórnenda eftir landshlutum. Þá er námleyfi að jafnaði ekki veitt samtímis til tveggja eða fleiri starfsmanna sama skóla.
Tilkynning um niðurstöðu stjórnar Námsleyfasjóðs hefur verið send öllum umsækjendum bréfleiðis og ætti hún að berast þeim á næstu dögum. Hafi niðurstaðan ekki borist innan tveggja vikna er umsækjendum bent á að hafa samband við Guðfinnu Harðardóttur.