Viðmiðunarreglur um greiðslur vegna nemenda sem stunda nám utan lögheimilissveitarfélags

Reglur þessar eiga eingöngu við þegar einstök börn sækja skóla í öðru sveitarfélagi en þau eiga lögheimili í. Ef sveitarfélag tekur að sér með reglubundnum hætti að vista nemendur annars sveitarfélags eða ef nemendur annarra sveitarfélaga eru vistaðir með reglubundnum hætti í tilteknum grunnskóla skal sérstaklega samið um greiðslur vegna þess á milli sveitarfélaganna.

Börn á grunnskólaaldri stunda að jafnaði nám í því sveitarfélagi sem þeir eiga lögheimili, hér eftir nefnt lögheimilissveitarfélag.

Frá þessu er vikið í eftirfarandi tilvikum:

1. Þegar lögheimili barns flyst í annað sveitarfélag á skólaárinu, eða barn sækir skóla í tveimur sveitarfélögum samtímis, sbr. 2. gr.
2. Þegar forsjáraðili barns óskar eftir að það fái að stunda nám í grunnskóla utan síns lögheimilis­sveitarfélags, sbr. 3.- 5. gr.
3. Þegar barni er ráðstafað í tíma­bundið fóstur til fósturforeldra sem eiga lögheimili í öðru sveitarfélagi, sbr. 6. gr.

Viðmiðunarreglur þessar gilda um samskipti sveitarfélaga í ofangreindum tilvikum og vegna þeirra barna sem hlut eiga að máli, hér eftir nefndir nemendur.

2. gr.

Flytjist lögheimili nemanda í annað sveitarfélag eftir að nemandi hefur byrjað skólagöngu í því sveitarfélagi, sem hann átti lögheimili í fyrir flutning, skal hann eiga rétt á að ljúka námi í þeim skóla sem hann stundaði nám í við flutninginn til loka skólaársins án þess að til komi greiðslur þess vegna frá hinu nýja lögheimilissveitarfélagi.

Að öllu jöfnu getur nemandi ekki sótt skóla í tveimur sveitarfélögum samtímis. Aðstæður nemandans geta hins vegar kallað á að frá þessu sé vikið með sérstöku samkomulagi. Ákvörðun í þessu efni er þó alltaf háð yfirlýstu samþykki beggja sveitarfélaga og að teknu tilliti til hagsmuna nemandans. Ekki er gert ráð fyrir að greiðslur fari á milli sveitarfélaga í þessum tilvikum, nema sérstaklega sé um það samið.

3. gr.

Forsjáraðili nemanda sem óskað er eftir að fái að stunda nám í grunnskóla utan síns lögheimilissveitarfélags skal senda inn umsókn þess efnis til lögheimilissveitarfélags nemandans fyrir 15. apríl.

Í umsókn skal upplýsa um ástæður umsóknarinnar og hvort foreldrar fara sameiginlega með forsjá en eiga ekki sama lögheimili.

Sé umsókninni synjað af lögheimilissveitarfélagi skal henni svarað sem fyrst með rökstuðningi. Hljóti umsóknin jákvæða afgreiðslu hjá lögheimilissveitarfélagi, skal senda hana til þess sveitarfélags þar sem óskað er eftir að nemandinn stundi nám, hér eftir nefnt viðtökusveitarfélag. Verði því við komið skal senda umsókn um skólavist fyrir 10. maí til viðtökusveitarfélags og skal þá svar berast lögheimilissveitarfélagi fyrir 1. júní.

Framangreindar dagsetningar eru meginregla þegar vitað er með löngum fyrirvara um óskir um skólavist utan lögheimilissveitarfélags. Komi óskir fram það seint að ekki er unnt að virða framangreindar dagsetningar skulu aðilar hraða afgreiðslu sem kostur er.

4. gr.

Þegar heimild er veitt skv. 3. gr. til náms í grunnskóla utan lögheimilissveitarfélags, skal samhliða og fyrirfram samið um greiðslur en Samband íslenskra sveitarfélaga ákveður sérstakt viðmiðunargjald. Viðmiðunargjaldið skal endurskoðað árlega og skal endurskoðun lokið fyrir 1. apríl ár hvert. Greiðslur vegna skólakostnaðar nemanda skulu inntar af hendi mánaðarlega eftir á fyrir hvern mánuð eða hluta úr mánuði, sem nemandi nýtur kennslu í skóla, nema að sveitarfélög semji sérstaklega um að hafa annan hátt á.

Í viðmiðunargjaldi er innifalinn allur almennur skólakostnaður annar en viðbótarkostnaður sem til fellur vegna nemandans sérstaklega.  

Ef barn þarfnast sérstakrar aðstoðar eða aukins stuðnings[1] skal samið sérstaklega um viðbótargreiðslur um leið og gengið er frá samkomulagi um skólagöngu nemanda milli lögheimilissveitarfélags og viðtökusveitarfélags. Með sama hætti skal semja um aðra liði sem eru sannarlega umfram viðmiðunargjaldið og framlag Jöfnunarsjóðs vegna nemandans sé um það að ræða[2]. Þetta gæti  m.a. átt við um fæðiskostnað og skólaakstur.

Að öllu jöfnu skal samkomulag um viðbótargjald tekið til endurskoðunar fari annað hvort sveitarfélagið fram á það. Verði ágreiningur um hvort endurskoðun gefi tilefni til breytinga á greiðslum er unnt að vísa ágreiningsefninu til umsagnar skólamálanefndar skv. 7. gr.

5. gr.

Í samskiptum sveitarfélaga skal það vera meginreglan að komi fram ósk frá lögheimilissveitarfélagi um skólavist í öðru sveitarfélagi skal orðið við slíkri ósk.

Til þess að auðvelda móttöku barns í viðtökusveitarfélagi skulu öll nauðsynleg gögn send milli hlutaðeigandi skóla. Persónuverndarsjónarmiða skal gætt í allri meðferð gagnanna.

Geti skóli/skólar viðkomandi sveitarfélags ekki veitt þeim nemanda sem óskað er eftir skólavist fyrir viðunandi þjónustu að mati sérfræðiþjónustu skóla skal slíkt koma fram sem rökstuðningur fyrir synjun á umsókn til lögheimilissveitarfélags.

6. gr.

Sveitarfélagi er skylt samkvæmt grunnskólalögum að sjá til þess að nemanda sem hefur verið ráðstafað í tíma­bundið fóstur til fósturforeldra sem eiga lögheimili í því, njóti skólavistar.

Um greiðslur lögheimilissveitarfélags vegna skólavistar barns í tímabundnu fóstri fer skv. ákvæðum barnaverndar­laga og gjaldskrá Sambands íslenskra sveitarfélaga, eftir því sem við á.

7. gr.

Komi upp ágreiningur um greiðslur fyrir skólavist, skv. 4. og 6. gr. og sveitarfélögin geta ekki leyst þann ágreining sín á milli er hægt vísa honum til skólamálanefndar Sambands íslenskra sveitarfélaga, sbr. 8. gr. til umsagnar. Til að nefndin taki mál til umfjöllunar þurfa báðir deiluaðilar að vera sammála um að vísa því til hennar.  Nemandi skal hefja skólagöngu í skóla viðtökusveitarfélags þó beðið sé eftir niðurstöðu nefndarinnar en hún skal leitast við að hraða vinnu sinni sem kostur er.

8. gr.

Skólamálanefnd tekur til umfjöllunar ágreiningsefni sveitarfélaga samkvæmt reglum þessum sem sveitarfélögin verða sammála um að vísa til hennar. Þegar nefndin fær mál til umfjöllunar aflar skólamálafulltrúi sambandsins nauðsynlegra gagna fyrir hönd nefndarinnar og kanna afstöðu viðkomandi sveitarfélaga til ágreiningsefnisins. Þar á meðal skal kanna hvort grundvöllur sé til sátta milli þeirra. Lýsi bæði sveitarfélögin því yfir að sættir hafi náðst eða samkomulag sé í augsýn getur nefndin lokið meðferð máls á þeim grundvelli. Það kemur þó ekki í veg fyrir að sama ágreiningsefni verði lagt fyrir nefndina á ný, sbr. 4. gr., ef úrlausn þess gengur ekki eftir.

Sé sáttagrundvöllur ekki fyrir hendi gerir skólamálanefndin tillögu til úrlausnar ágreiningsefnisins. Tillagan skal rökstudd og sett fram með nægilega skýrum hætti til að ljóst sé hvernig nefndin telur að leysa megi ágreininginn. Tillaga nefndarinnar er ekki bindandi fyrir hlutaðeigandi sveitarfélög.

Um hæfi nefndarmanna fer skv. 3. gr. stjórnsýslulaga, nr. 37/1993.

Gjaldskrá fyrir nemendur sem vistaðir eru utan lögheimilissveitarfélags

Gjald fyrir nemendur sem stunda grunnskólanám utan lögheimilis-sveitarfélags (viðtökunemendur skal miðast við þrjá gjaldflokka:

1. Nemendur vistaðir í skóla þar sem færri en 10 nemendur eru að meðaltali í hverjum árgangi.
2. Nemendur vistaðir í skóla þar sem nemendur eru 10 að 20 í hverjum árgangi.
3. Nemendur vistaðir í skólum með 20 nemendur í árgangi eða fleiri. Ætíð skal miða skólastærð við nemendafjölda áður en nemendur sem lögheimili eiga í öðrum sveitarfélögum eru taldir.

Viðmiðunargjald skal miða við 2/3 af meðalrekstrarkostnaði eins og hann er á landinu öllu að frádregnum húsnæðiskostnaði. Skólar með 20 nemendur eða fleiri í árgangi fái greitt grunngjald fyrir hvern nemanda. Skólar með 10 að 20 nemendum í árgangi fá 30% hærra gjald og skólar með nemendafjölda færri en 10 í árgangi fá 60% ofan á grunngjaldið. Við útreikninga skal ætíð miða við greiðslur í kennslumánuðum.