Um Skólavogina

Skólavogin er tilraunaverkefni á vegum Sambands íslenskra sveitarfélaga sem hefur verið í þróun frá árinu 2007.  Verkefnið felst í að kanna árlega viðhorf nemenda, foreldra og starfsfólks til nokkurra þátta í skólastarfinu auk þess sem safnað er ýmsum tölulegum og rekstrar­legum upplýsingum hjá skólastjórum.  Með niðurstöðum fylgir að auki samanburður á árangri nemenda í 4., 7. og 10. bekk í íslensku og stærðfræði í samræmdum prófum ásamt framfara­stuðli.  Að stofni til er um að ræða norska aðferðafræði sem hefur verið löguð að íslenskum aðstæðum.   

Skólavogin er ekki altækt matstæki fyrir sveitarfélög eða grunnskóla en nýtist vel sem einn þáttur í innra mati/eftirliti þeirra.  Skólum stendur til boða að leggja kannanir fyrir á íslensku, ensku og pólsku.

Fjöldi þátttökuskóla í mars 2010: 36

Þátttökusveitarfélög árið 2010.

Markmið Skólavogarinnar er að stuðla að bættri þjónustu og aukinni skilvirkni með því að:

·         bjóða upp á matstæki sem auðveldar sveitarfélögum að hafa eftirlit með skólum.

·         veita sveitarfélögum og skólum upplýsingar sem gerir þeim kleift að bera sig saman við önnur sveitarfélög/aðra skóla. 

·         láta skólum í té upplýsingar sem þeir geta notað við innra mat á skólastarfinu. 

Framkvæmd og fyrirlögn.  Fyrirlögn kannana er rafræn og á sér stað á tímabilinu febrúar til apríl ár hvert.  Fyrirlagnartími er ólíkur eftir skólum þar sem skólar hafa val um hvenær kannanir eru lagðar fyrir innan tímaramma.  Fyrirtækið Outcome sér um fyrirlögn, úrvinnslu gagna og skýrslugerð.  Skólum og sveitarfélögum býðst að bæta við 1-3 spurningum gegn umfram gjaldi.  Könnunin hefur verið lögð fyrir úrtak nemenda í 7. – 10. bekk.  Því hefur verið breytt þannig að könnunin verður í framtíðinni lögð fyrir efsta árgang á hverju stigi, þ.e 4. bekk, 7. bekk og 10. bekk.

Þátttökugjald.  Innheimtur  kostnaður  á þróunartímabilinu hefur verið  35.000 – 40.500 krónur á hvern þátttökuskóla.  Kjósi skóli/sveitarfélag að bæta við spurningum bætist við 5.000 krónur fyrir hverja spurningu. Hér er um algert lágmarksgjald að ræða og ljóst að gjaldið verður talsvert hærra þegar matstækið er tilbúið.

Viðhorfakönnun nemenda.  Könnun fyrir nemendur samanstendur af um 30 spurningum.  Spurt er um:  Áhuga á námi, viðhorfi til skóla og kennara, líðan í skóla, námsumhverfi, einelti, þátttöku og vinnulag nemenda, stuðning við nám og nemendaráð.

Viðhorfakönnun foreldra.  Könnun fyrir foreldra samanstendur af um 40 spurningum.  Spurt er um:  Viðhorf til skóla, líðan barns, samstarf og samskipti foreldra og skóla, þjónustu við foreldra og nemendur, upplýsingaflæði og námsumhverfi. 

Viðhorfakönnun starfsfólks.  Könnun fyrir starfsfólk samanstendur af um 50 spurningum.  Spurt er um:  Viðhorf til skóla, starfs og skipulags, vinnuaðstöðu, samvinnu og samskipti við vinnufélaga og stjórnendur, starfsþróun og viðhorf til frammistöðu sveitarfélags í skólamálum.

Nánari upplýsingar gefur Valgerður Freyja Ágústsdóttir hjá Sambandi íslenskra sveitarfélaga:  valgerdur.freyja.agustsdottir@samband.is