09. nóv. 2017

Málþing um flutningskerfi raforku

Endurnýjun á flutningskerfi raforku hefur ekki átt sér stað og illa hefur gengið að koma endurnýjun lína eða nýjum línuleiðum í gegnum umsóknarferli og á framkvæmdastig. Þessi staða kemur niður á atvinnulífi, ekki síst í landsbyggðunum. Raforkumál og flutningskerfi raforku verða til umfjöllunar á málstofu Byggðastofnunar 21. nóv. nk.

Umfjöllunarefnið er einkum flutningskerfi raforku hér á landi, að því er fram kemur í frétt á vef Byggðastofnunar. Atvinnufyrirtæki víða um land þurfa raforku til starfsemi sinnar, bæði til að fá hreina orku í stað þeirrar sem framleidd er með olíu og einnig vegna nýsköpunar og atvinnuþróunar.

Á hinn bóginn blasir sú staða við að orkuöryggi ekki nægjanlega tryggt á vissum landsvæðum. Þá hefur endurnýjun á flutningskerfi raforku ekki átt sér stað og illa hefur gengið að koma endurnýjun lína eða nýjum línuleiðum í gegnum umsóknarferli og á framkvæmdastig.

Skiptar skoðanir eru um hvar raforkulínur eigi að vera, hvort fara eigi um byggð eða yfir hálendið og hvort leggja eigi loftlínur eða jarðstrengi svo dæmi séu nefnd.

Sú staða sem nú er upp kemur harðast niður á atvinnulífi, ekki síst í landsbyggðunum.

Með málþingu er Byggðastofnun að skapa umræðuvettvang, þar sem aðilar sem hafa látið sig málið varða koma saman og gera grein fyrir sinni sýn á málin. Fulltrúar Orkustofnunar, Landsnets, Skipulagsstofnunar, Akureyrarbæjar, Ísfélags Vestmannaeyja, Landverndar og landeigenda munu hafa framsögur. Að framsögum loknum verða almennar umræður.

Málþingið verður eins og áður segir þriðjudaginn 21. nóvember nk. í Hofi á Akureyri, kl. 13:00 – 16:30. Boðið verður upp á léttan hádegisverð frá kl. 12:00.