Innkaupamál
Um opinber innkaup gilda lög um opinber innkaup nr. 84/2007. Tilgangur laganna er að tryggja jafnræði fyrirtækja við opinber innkaup, stuðla að hagkvæmni í opinberum rekstri með virkri samkeppni og efla nýsköpun og þróun við innkaup hins opinbera á vörum, verkum og þjónustu.
Samkvæmt lögunum ber öllum sveitarfélögum að setja sér innkaupareglur. Lögfræðisvið Sambands íslenskra sveitarfélaga átti frumkvæði að því að semja drög að fyrirmynd að innkaupareglum sveitarfélaga. Allar sveitarstjórnir sem ákveða að byggja á fyrirmyndinni verða þó að laga reglurnar að stjórnsýslu sinni, auk þess sem sveitarstjórnir þurfa að ákveða hvaða fjárhæðir verði miðað við í reglunum. Jafnframt geta sveitarstjórnir sett sínar eigin reglur eða nýtt þau atriði úr fyrirmyndinni sem þær telja að henti sínum aðstæðum.
Viðmiðunarfjárhæðir
Fjármálaráðuneytið hefur gefið út nýja reglugerð um viðmiðunarfjárhæðir vegna opinberra innkaupa. Reglugerðin, sem er nr. 229/2010, tekur við af reglugerð nr. 807/2007, og felur í sér umtalsverða hækkun viðmiðunarfjárhæða vegna útboða á EES-svæðinu. Þær breytingar skýrast væntanlega að öllu leyti af breytingum á gengi krónunnar gagnvart evru.
Viðmiðunarfjárhæðir fyrir sveitarfélög, stofnanir þeirra, aðra opinbera aðila á þeirra vegum og samtök sem þessir aðilar kunna að hafa með sér eru sem hér segir frá því að reglugerðin tók gildi 17. mars sl.:
- Vörusamningar: 25.862.000,- ISk án vsk. (var áður 17.980.000)
- Þjónustusamningar: 25.862.000, ISk án vsk. (var áður 17.980.000)
- Verksamningar: 649.230.000, ISk án vsk. (var áður 449.490.000)
Sjá nánar á vef Ríkiskaupa.