Jafnrétti í sveitarfélögum

Málþing og námskeið

Jafnrétti í sveitarfélögum

Málþing 31. mars og námskeið 1. apríl 2016. Grand hóteli, Sigtúni 38, 105 Reykjavík

Málþingið og námskeiðið voru haldin með vísun til stefnumörkunar Sambands íslenskra sveitarfélaga kjörtímabilið 2014-2018 þar sem segir að sambandið skuli hvetja og styðja sveitarfélögin í því að ná fram jafnrétti kynjanna í reynd. Viðburðirnir voru haldnir í samstarfi við Jafnréttisstofu og jafnréttisráð með fjárstuðningi ráðsins. Í tengslum við þá var gefið út fræðsluhefti fyrir stjórnendur um jafnrétti í sveitarfélögum sem þátttakendur fengu í hendur.

Sérfræðingar frá sænska sveitarfélagasambandinu, SALAR,  voru með kynningu á málþinginu 31. mars og leiðbeinendur á námskeiðinu 1. apríl.  SALAR hefur um nokkra ára skeið, með fjárstuðningi frá sænska ríkinu, stutt sænsk sveitarfélög í að gera jafnréttismál sjálfbær innan sveitarfélaga. Áherslan hefur verið á að kynjasjónarmið séu samþætt inn í starfsemi sveitarfélaga og aðferðir kynjasamþættingar nýttar til að veita íbúum betri og skilvirkari þjónustu. Það er sænska reynslan, og reyndar alls staðar viðurkennd staðreynd, að lykillinn að árangri í jafnréttismálum er skilningur og áhugi yfirstjórnenda. Þess vegna var aðal markhópur málþingsins yfir- og millistjórnendur í sveitarfélögum, fulltrúar í sveitarstjórnum og jafnréttisnefndum og auðvitað líka starfsfólk sem fer með jafnréttis- og umbótamál. Á málþinginu voru einnig íslenskar kynningar og umræður um stöðu jafnréttismála í sveitarfélögum. Á námskeiðinu var farið dýpra ofan í hagnýta aðferðarfræði við beita kynjasamþættingu í starfsemi sveitarfélaga og á einstökum sviðum, svo sem í skipulagsmálum, félagsþjónustu, menningar- og tómstundamálum og skólamálum. Óhætt að segja að sænsku sérfræðingarnir hafi kynnt ferska og nýja nálgun fyrir íslensk sveitarfélög. Þær kynntu fjölmörg áhugaverð dæmi um kynjasamþættingu í málaflokkum sveitarfélaga, s.s. í skipulagsmálum og velferðarþjónustu, og hvernig hægt er að samþætta kynjasjónarmið inn í stjórnunarkeðjuna og nýta kynjasamþættingu sem gæðastjórnunartæki. Þátttakendur á málþinginu voru um 70 og þar af tæpur helmingur framkvæmdastjórar sveitarfélaga og kjörnir fulltrúar. Þátttakendur á námskeiðinu voru nokkuð færri.


Málþing um kynjaða fjárhags- og starfsáætlun

18. september 2015

Málþing um kynjaða fjárhags- og starfsáætlun var haldið í Ráðhúsi Reykjavíkur föstudagnin 18. september 2015.