Nýjar sveitarstjórnir
Allnokkrar breytingar urðu á sveitarstjórnum víða um landið í nýafstöðnum sveitarstjórnarkosningum. Talsverð endurnýjun varð hjá nánast öllum framboðum, hvort sem þau voru ný eða ekki.
Út um allt land var venjulegt fólk valið til að stýra sveitarfélögunum. Undirritaður nefnir venjulegt fólk vegna þess að í fjölmiðlum mátti lesa um að venjulegt fólk hefði verið kosið í sveitarstjórnir af öðrum listum en hinum svokallaða fjórflokkslistum. En þannig hefur það ávallt verið. Í sveitarfélögunum hafa alltaf verið einhver sérframboð eða flokkar tekið sig saman og myndað lista. Oft eru óháðir tengdir listum og í mörgum sveitarfélögum, sérstaklega hér áður fyrr, voru einstaklingar kosnir til setu í sveitarstjórnum með þeirri aðferð sem kölluð er óbundin kosning.
Sums staðar komu alveg ný framboð til sögunnar. Í Reykjavík náði Æ-listinn eftirtektarverðum árangri og á Akureyri náði L-listinn, framboð sem átt hafði fulltrúa í bæjarstjórn á fyrri kjörtímabilum, hreinum meirihluta. Mun víðar náðu ný framboð talsverðum árangri og munu hafa áhrif á stjórn síns sveitarfélags í kjörtímabilinu.
Hagur kvenna í sveitarstjórnum vænkaðist enn. Það er ótrúleg staðreynd að árið 1958, fyrir einungis hálfri öld, var hlutur kvenna í sveitarstjórnum einungis 1%. Tuttugu árum síðar voru konur einungis 6% kjörinna fulltrúa en síðan þá hefur konum í sveitarstjórnum fjölgað jafnt og þétt. Þær voru 36% kjörinna fulltrúa fyrir kosningarnar í maí og það hlutfall hækkaði í 40% í nýafstöðnum kosningum. Sú niðurstaða er fagnaðarefni og er enn einn áfanginn á langri leið að auknu jafnrétti kynjanna á öllum sviðum. Í þeim efnum er Ísland framarlega í röðinni í alþjóðlegum samanburði eins og dæmin sanna.
Nýkjörinna sveitarstjórnarmanna bíða krefjandi verkefni. Framundan er erfitt kjörtímabil með aukinni þjónustuþörf, lækkun tekna – a.m.k. framan af kjörtímabilinu – en um leið auknum kröfum. Það hefur sennilega aldrei verið mikilvægara en nú að kjörnir fulltrúar nái samstöðu um helstu mál og sameinist um hver framtíðarsýnin á að vera. Taka þarf mið af aðstæðum og því sem hægt er að gera í dag og til framtíðar. En dagskráin framundan eru jafnframt mjög spennandi því í farvatninu er frekari flutningur verkefna frá ríki til sveitarfélaga. Þau stóru og mikilvægu verkefni sem flytjast munu á milli stjórnsýslustiga munu, ef vel verður að málum staðið, efla sveitarfélögin enn frekar og bæta nærþjónustu íbúanna.
Samband íslenskra sveitarfélaga mun hér eftir sem hingað til kappkosta að veita kjörnum sveitarstjórnarmönnum allan þann stuðning og ráðgjöf sem það getur og vera málsvari þeirra gagnvart ríkisvaldinu sem og á alþjóðlegum vettvangi.
Nýkjörnum fulltrúum í sveitarstjórnum er óskað til hamingju með árangurinn og þeim óskað alls hins besta í vandasömum störfum framundan.
Halldór Halldórsson
formaður