Þróunarsjóðir EFTA – Nýr samningur undirritaður
Ísland, Liechtenstein og Noregur hafa samið við Evrópusambandið um áframhald Þróunarsjóðs EFTA og Þróunarsjóðs Noregs. Tilgangur sjóðanna er að veita styrki til verkefna sem styðja við félagslega- og efnahagslega uppbyggingu 15 ríkja í Suður- og Austur-Evrópu. Upphæðin sem um ræðir er 1,79 milljarður evra á tímabilinu 2009-2014.
Þróunarsjóð EFTA var komið á fót árið 1994 sem framlagi aðila að EES-samningnum til að auka samleitni í Evrópu. Þessu nýja tímabili fylgir breytt fyrirkomulag styrkja sem hefur ný tækifæri í för með sér fyrir íslensk sveitarfélög. Aukin áhersla er nú lögð á rannsóknir, þróun, nýsköpun og menntun og sérstakir fjármunir eru eyrnamerktir í tvíhliða verkefni þeirra landa sem leggja fé í sjóðinn og styrkþega. Þá hefur fyrirkomulagi styrkjanna einnig verið breytt á þann veg að aðilar í EFTA-EES ríkjunum geta verið í forsvari fyrir verkefni í samstarfi við styrkþega.
Á tímabilinu verður áhersla lögð á styrki til verkefna er tengjast eftirfarandi sviðum:
· náttúruvernd.
· aðgerðir vegna loftslagsbreytinga og bindingar kolefnis.
· nýting endurnýjanlegrar orku og nýsköpun í tengslum við vistvæna framleiðslu.
· Stuðningur við frjáls félagasamtök og framfarir í tengslum við mannréttindi og félagslega þróun.
· varðveisla menningarverðmæta.
Þá verða einnig veittir náms- og rannsóknastyrkir
Íslensk sveitarfélög búa yfir þekkingu og reynslu er tengist ofangreindum sviðum og gætu hæglega tekið þátt í verkefnum með sveitarfélögum í styrkþegalöndunum. Sama gildir um fyrirtæki í eigu sveitarfélaga, t.d. hita- og vatnsveitur. Ljóst er að ýmis tækifæri eru fólgin í sjóðunum fyrir íslensk sveitarfélög en norsk sveitarfélög hafa tekið þátt í fjölda uppbyggingarverkefna sem styrkt eru af sjóðum EFTA.