Kjörtímabil nýrra sveitarstjórna tók gildi 13. júní 2010
Sunnudaginn 13. júní tóku nýkjörnar sveitarstjórnir við störfum og þá lauk jafnframt kjörtímabili sveitarstjórna sem kjörnar voru í sveitarstjórnarkosningunum 27. maí 2006.
Samband íslenskra sveitarfélaga býður nýjar sveitarstjórnir í sveitarfélögunum 76 velkomnar til starfa og væntir þess að samstarf við þær verði farsælt og gott.
Í sveitarstjórnarkosningunum 29. maí 2010 var kosið í 72 sveitarfélögum en sjálfkjörið var í 4 sveitarfélögum þar sem aðeins kom fram einn listi í þeim. Í 54 sveitarfélögum fór fram hlutbundin listakosning en óbundið persónukjör fór fram í 18 sveitarfélögum.
Alls voru kjörnir 512 sveitarstjórnarmenn í kosningunum í maí eða 17 færri en í kosningunum 2006. Þar af voru konur 204 eða 39,8%, sem er hærra hlutfall en áður. Konur voru 35,9% af kjörnum fulltrúum í sveitarstjórnum eftir kosningarnar 2006.
Elsti sveitarstjórnarmaðurinn eftir kosningarnar er 71 árs og sá yngsti 23 ára. Skipting þeirra 512 sveitarstjórnarmanna sem kjörnir voru í kosningunum 29. maí í aldurflokka er eftirfarandi:
| Aldurshópur | Fjöldi | Hlutfall |
| 20 til 29 ára | 19 | 3,7% |
| 30 til 39 ára | 137 | 26,8% |
| 40 til 49 ára | 210 | 41,0% |
| 50 til 59 ára | 125 | 24,4% |
| Eldri en 60 ára | 21 | 4,1% |
| Samtals | 512 | 100,0% |
Á vef Sambands íslenskra sveitarfélaga er búið að uppfæra upplýsingar um kjörna sveitarstjórnarmenn í einstökum sveitarfélögum, en enn vantar upplýsingar um oddvita sveitarstjórna, formenn byggðaráða og framkvæmdastjóra sveitarfélaga í mörgum sveitarfélögum. Þær upplýsingar verða uppfærðar um leið og upplýsingar berast frá sveitarfélögunum um hverjir gegna þeim embættum.