Samband íslenskra sveitarfélaga - Áhugavert

Ný þjónusta fyrir sveitarfélög á Íslandi

Fri, 13 Jan 2012 11:38:00 +0000

Þjóðskrá Íslands mun eftir áramótin bjóða sveitarfélögum upp á nýja þjónustu við birtingu álagningarseðla vegna fasteignagjalda 2012 með rafrænum hætti. Markmiðið er m.a. að gera sveitarfélögunum mögulegt að spara sér útgjöld vegna póstsendinga, pökkunar og umslaga. Að lokinni álagningu verður í álagningarkerfinu unnt að velja að birta seðlana einstaklingum og lögaðilum á „Mínum síðum“ á Ísland.is þar sem þeir sækja seðlana á PDF-formi með því að skrá sig inn á Ísland.is með veflykli ríkisskattstjóra eða rafrænu skilríki.

Nýtt nám fyrir stjórnendur hjá sveitarfélögum

Tue, 20 Dec 2011 14:54:00 +0000

Háskólinn á Bifröst efnir til náms fyrir stjórnendur innan sveitarfélaga sem miðar að sterkari stjórnsýslu. Markmiðið með náminu er að auka þekkingu, hæfni og leikni stjórnenda innan sveitarfélaga til þess að takast á við krefjandi starfsumhverfi og auka samvinnu þeirra í milli.

Nýsettar fjármálareglur og staða sveitarfélaga

Mon, 19 Dec 2011 14:55:00 +0000

Fjárhagsleg staða sveitarfélaga á Íslandi er mjög mismunandi. Ástæður fyrir ólíkri fjárhagsstöðu þeirra geta verið mismunandi. Til glöggvunar og til að gera umræðu um þessi mál markvissari er mögulegt að skipa sveitarfélögum í flokka miðað við fjárhagslega stöðu þeirra. Fjárhagslegur vandi sveitarfélaga getur annað hvort verið rekstrarvandi eða skuldavandi. Í einhverjum tilvikum getur verið um vanda að ræða sem á bæði rætur að rekja til rekstrarerfiðleika og mikillar skuldsetningar

Frumvarp til sveitarstjórnarlaga og skýrsla stjórnlaganefndar

Fri, 15 Apr 2011 15:03:00 +0000

Í síðastliðinni viku lagði innanríkisráðherra fram á Alþingi frumvarp til nýrra sveitarstjórnarlaga. Um er að ræða heildarendurskoðun sveitarstjórnarlaga nr. 45/1998 sem felur í sér tillögur um ýmsar veigamiklar breytingar á þessum grundvallarlögum sem sveitarstjórnarstigið starfar eftir. Í sömu viku kom út skýrsla stjórnlaganefndar, sem næstu þrjá mánuðina verður til umfjöllunar í stjórnlagaráði. Mikilvægt er að sveitarstjórnir um land allt kynni sér þessar tillögur og taki afstöðu til þeirra.

Mikill munur á fjárframlögum sveitarfélaga til stjórnmálasamtaka

Fri, 8 Apr 2011 10:33:00 +0000

Í febrúar síðastliðnum gerði Samband íslenskra sveitarfélaga athugun á því hvernig sveitarfélög hér á landi haga þessum málum. Svör bárust frá 64 sveitarfélögum með u.þ.b. 95% íbúa landsins. Yfir 40% sveitarfélaganna styrkja ekki stjórnmálasamtök sem boðið hafa fram lista við sveitarstjórnarkosningar en 23 sveitarfélög sem svöruðu könnuninni voru undir 500 íbúum og því ekki skyldug til að styrkja stjórnmálasamtök.

Þegar niðurstaðan er greind frekar þá voru það frekar fámenn og millistór sveitarfélög sem styrktu ný framboð á meðan hin fjölmennari styrktu síður ný framboð.

Aðgát skal höfð...

Tue, 1 Feb 2011 10:35:00 +0000

Flest sveitarfélög hafa á síðustu misserum tileinkað sér upplýsingatæknina í ríkari mæli til þess að hafa samskipti við íbúa. Þróaðir hafa verið gagnvirkir vefir þar sem fylgjast má með stöðu einstakra mála í stjórnsýslunni, en jafnframt hafa allmörg sveitarfélög komið sér upp vettvangi á netinu þar sem íbúar, kjörnir fulltrúar og starfsmenn geta skipst á skoðunum um margvísleg samfélagsmálefni. Bæði þekkist að þessi vettvangur sé einn og hinn sami fyrir allt samfélagið en einnig geta þessir samskiptamöguleikar afmarkast við málaflokka eða stofnanir, og má þar nefna skólana sem dæmi.

Yfirfærsla á málefnum fatlaðs fólks frá ríki til sveitarfélaga

Tue, 7 Dec 2010 08:44:00 +0000

Með undirritun heildarsamkomulags milli ríkis og sveitarfélaga um tilfærslu á þjónustu við fatlaða er framundan metnaðarfullur og mikilvægur flutningur á stóru þjónustuverkefni sem varðar fatlaða einstaklinga í þessu landi og starfsfólk sem vinnur við málaflokkinn. Sveitarstjórnarfólk og starfsfólk sveitarfélaga nálgast nýtt viðfangsefni af auðmýkt og metnaði og býður fatlaða velkomna í þjónustu sveitarfélaganna og starfsfólk velkomið til starfa frá og með 1. janúar 2011 gangi nauðsynlegar lagabreytingar eftir á Alþingi Íslendinga.

Í langan tíma hefur staðið til að flytja heildarþjónustu við fatlað fólk frá ríki til sveitarfélaga. Ástæðan er sú að flestir telja að sveitarfélögin geti gert enn betur en ríkið í þjónustunni, enda sinna sveitarfélögin nærþjónustu við íbúana. Með því að hafa þjónustuna á einni hendi, í þessu tilfelli hjá sveitarfélögunum, er dregið úr hættu á því að hin svokölluðu gráu svæði séu til staðar en þau verða alltof oft til þar sem ríki annars vegar og sveitarfélög hins vegar vísa hvort á annað varðandi þjónustu.

Samkomulag um yfirfærslu á þjónustu við fatlaða

Tue, 23 Nov 2010 16:08:00 +0000

Þann 23. nóvember 2010 var undirritað heildarsamkomulag ríkis og sveitarfélaga um yfirfærslu á þjónustu við fatlaða. Með því hefur enn einum verkþætti yfirfærsluverkefnisins verið hrint í framkvæmd. Er nú hafið yfir allan vafa að frá og með 1. janúar 2011 munu sveitarfélögin í landinu taka við ábyrgð á framkvæmd þessa mikilvæga en um leið viðkvæma málaflokks. Samhliða undirritun heildarsamkomulagsins hefur verið gengið frá þeirri aðlögun á lagaramma um málaflokkinn, sem nauðsynleg er til þess að yfirfærslan geti átt sér stað. Ráðuneyti hafa fyrir sitt leyti gengið frá frumvörpum til þessara breytinga og hafa þau verið kynnt í ríkisstjórn, fyrir stjórn Sambands íslenskra sveitarfélaga og fyrir hagsmunasamtökum. Þessi frumvörp, auk fjárlaga fyrir árið 2011, munu festa í lög þann fjárhagsramma verkefnisins sem undirritaður var 6. júlí sl.

Námskeið fyrir sveitarstjórnarmenn

Wed, 3 Nov 2010 13:39:00 +0000

Samband íslenskra sveitarfélaga stendur fyrir námskeiðum í nóvember fyrir kjörna fulltrúa í sveitarstjórnum, í samvinnu við landshlutasamtök sveitarfélaga. Starfsmenn sambandsins eru leiðbeinendur og er megináherslan á þau úrlausnarefni sem sveitarstjórnir standa nú frammi fyrir vegna fjárhagsáætlunargerðar og kjarasamninga. Einnig verður fjallað um lagalegt umhverfi sveitarstjórna. Þegar hefur verið ákveðið að efna til námsskeiða í nóvember á starfssvæðum SSNV, SASS, SSV, FV, SSS og EYÞINGS.

Ríkið hefur fullnýtt alla skattstofna

Wed, 6 Oct 2010 11:29:00 +0000

Í setningarávarpi Halldórs Halldósrssonar, formanns sambandsins, á landsþingi þess í síðustu viku kom fram að hann teldi að þar sem ríkið væri því sem næst búið að fullnýta alla skattstofna sem finnast í þessu landi væri svigrúm sveitarfélaga til að auka tekjur sínar með skattahækkunum vart fyrir hendi. Nauðsynleg tekjuaukning verði því að felast að einhverju leyti í tilfærslu tekna frá ríkinu til sveitarfélaga, en fyrst og fremst þurfi hún að hafa uppruna sinn í auknum umsvifum í efnahagslífinu.

Ný skipulagslög samþykkt á Alþingi

Fri, 10 Sep 2010 13:14:00 +0000

Alþingi samþykkti í gær frumvarp til nýrra skipulagslaga. Umhverfisnefnd Alþingis lagði alls til rúmlega 40 breytingartillögur við frumvarpið og var fallist á allmargar breytingatillögur Sambands íslenskra sveitarfélaga við frumvarpið.

Samráðsfundur Skipulagsstofnunar og sveitarfélaga

Tue, 7 Sep 2010 14:48:00 +0000

Samráðsfundur Skipulagsstofnunar og sveitarfélaga verður haldinn í Reykholti, Borgarbyggð, 16. og 17. september nk. Fundurinn hefst kl. 13.00 með ávarpi Stefáns Thors skipulagsstjóra. Skráning á fundinn er hafin á vef Skipulagsstofnunar.

Námskeið um lýðræði í sveitarfélögunum

Fri, 16 Jul 2010 11:22:00 +0000

Samband íslenskra sveitarfélaga hyggst standa fyrir námskeiði um lýðræði í sveitarfélögum 6. september nk. Leiðbeinendur verða tveir danskir ráðgjafar sem hafa víðtæka reynslu af ráðgjöf í lýðræðismálum fyrir dönsk sveitarfélög. Þau eru Anne Torzen, blaðamaður, ráðgjafi og stjórnandi Miðstöðvar um íbúasamráð og Søren Frilander ráðgjafi hjá danska sveitarfélagasambandinu KL. Námskeiðið verður haldið á Reykjavíkursvæðinu en nánari staðsetning verður auglýst síðar. Það verður haldið á ensku.

Álit um rétt grunnskólabarna til náms í framhaldsskólaáföngum

Mon, 7 Jun 2010 08:11:00 +0000

Samband íslenskra sveitarfélaga (lögfræði- og velferðarsvið) hefur tekið saman álitsgerð um rétt grunnskólabarna til náms í framhaldsskólaáföngum. Tilefni álitsins er sú ákvörðun ríkisvaldsins, í fjárlögum ársins 2010, að greiða ekki fyrir einingabært nám í framhaldsskóla sem grunnskólanemendur stunda.

Ljóst er að ákvörðun ríkisvaldsins er til þess fallin að auka útgjöld hlutaðeigandi grunnskóla, sem gefa þarf kost á námsvali í stað þeirra framhaldsskólaáfanga sem synjun framhaldsskóla varðar. Óvíst er hver kostnaðaráhrifin nákvæmlega verða en fyrir hendi er farvegur fyrir mat á þeim.

Skýrsla um VSK-umhverfi sveitarfélaga

Wed, 19 May 2010 11:39:00 +0000

Á fundi stjórnar Sambands íslenskra sveitarfélaga þann 7. maí 2010 var lögð fram greinargerð til stjórnar sambandsins og endurskoðunarnefndar um tekjustofna sveitarfélaga um vsk-umhverfi sveitarfélaganna. Greinargerðin er unnin af lögfræði- og velferðarsviði sambandsins í samstarfi við skattasvið KPMG á Íslandi.

Í áfangaskýrslu tekjustofnanefndar dags. 21. desember 2009 segir m.a.:

Ýmis starfsemi sveitarfélaganna er undanþegin virðisaukaskatti, sbr. 2. gr. laga um virðisaukaskatt. Þá má nefna félagslega þjónustu, rekstur leikskóla, grunnskóla, skólamötuneyti og íþróttastarfsemi.

Utankjörfundaratkvæðagreiðsla hafin

Tue, 11 May 2010 08:44:00 +0000

Utankjörfundaratkvæðagreiðsla vegna sveitarstjórnarkosninganna þann 29. maí nk. hófst hjá sýslumönnum um land allt þann 6. apríl sl. og stendur til kjördags. Frá og með mánudeginum 10. maí, fer atkvæðagreiðsla utan kjörfundar á vegum sýslumannsembætta um land allt. Í Reykjavík fer atkvæðagreiðslan fram í Laugardalshöll og er opið þar alla daga frá kl. 10:00-22:00. Erlendis fer kjörfundur fram á skrifstofum sendiráða eða fastanefndar hjá alþjóðastofnun, í sendiræðisskrifstofu eða á skrifstofu kjörræðismanns samkvæt nánari ákvörðun utanríkisráðuneytisins.

Framboðsfrestur vegna sveitarstjórnarkosninga er til 8. maí

Mon, 3 May 2010 10:03:00 +0000

Frestur til að skila framboðslistum til yfirkjörstjórnar í viðkomandi sveitarfélagi er til kl. 12 á hádegi laugardaginn 8. maí 2010. Sveitarstjórnarmenn sem hyggjast skorast undan endurkjöri skulu tilkynna þá ákvörðun til yfirkjörstjórnar fyrir lok framboðsfrests.

Á kosningavef dóms- og mannréttindamálaráðuneytisins má finna leiðbeiningar fyrir þá sem hyggjast bjóða fram lista í sveitarstjórnarkosningunum.

Sameining samþykkt

Thu, 25 Mar 2010 09:32:00 +0000

Síðastliðinn laugardag, 20. mars, fór fram atkvæðagreiðsla í Hörgárbyggð og Arnarneshreppi um sameiningu þessara tveggja sveitarfélaga. Sameiningin var samþykkt í báðum sveitarfélögunum og var niðurstaða atkvæðagreiðslunnar þessi í hvoru sveitarfélagi fyrir sig.

Í Hörgárbyggð greiddu 149 atkvæði með sameiningu Arnarneshrepps og Hörgárbyggðar og 12 greiddu atkvæði gegn henni. Einn seðill var auður. Með öðrum orðum voru 92,0% þeirra sem kusu fylgjandi sameiningu, en 7,4% andvíg. 0,6% skilaði auðu. Af þeim sem tóku afstöðu voru 92,5% fylgjandi og 7,5% andvíg sameiningu.