Fréttir staðardagskrá 21

Mosfellsbær stendur fyrir málþingi um stöðu sjálfbærrar þróunar í sveitarfélögum á Íslandi nk. fimmtudag, 5. nóv. kl. 16:00-18:00. Málþingið verður haldið í Listasal Mosfellsbæjar, Kjarna, Þverholti 2 í Mosfellsbæ (innangengt frá bókasafni), og er öllum opið án endurgjalds.

Umhverfisráðherra boðar til VI. Umhverfisþings dagana 9.-10. október 2009. Þingið fer fram á Hótel Hilton Reykjavík Nordica. Sjálfbær þróun verður aðalumfjöllunarefni þingsins að þessu sinni. Kynntar verða tillögur að nýjum áherslum stjórnvalda á sviði sjálfbærrar þróunar næstu árin. Einnig verður kynnt ný skýrsla umhverfisráðherra um stöðu og þróun umhverfismála.

Á fundi sínum 28. júlí sl. samþykkti bæjarstjórn Kópavogs með öllum greiddum atkvæðum að fela bæjarstjóra að undirrita Ólafsvíkuryfirlýsinguna fyrir hönd bæjarstjórnar. Þar með hafa 45 af 78 sveitarfélögum landsins gerst aðilar að yfirlýsingunni, þar á meðal 12 af 15 fjölmennustu sveitarfélögunum.

Hreppsnefnd Kjósarhrepps samþykkti Staðardagskrá 21 fyrir sveitarfélagið á fundi sínum 5. mars sl. Kjósarhreppur er þar með 30. sveitarfélagið sem kemur sér upp formlega samþykktri Staðardagskrá, en tvö sveitarfélög til viðbótar eiga Staðardagskrá fyrir hluta sveitarfélagsins.

Ellefta landsráðstefnan um Staðardagskrá 21 verður haldin í Stykkishólmi dagana 20. og 21. mars nk. Staðardagskrárráðstefnurnar hafa jafnan verið vettvangur frjórrar umræðu um sjálfbæra þróun, og er þess að vænta að svo verði einnig nú. Meðal fyrirlesara á ráðstefnunni verður Leo Christensen, atvinnumálafulltrúi Lolland kommune í Danmörku, en starf hans að uppbyggingu atvinnulífsins hefur vakið mikla athygli víða um lönd. Skrá þarf þátttöku í ráðstefnunni í síðasta lagi fimmtudaginn 12. mars nk.

Sveitarstjórn Flóahrepps samþykkti Ólafsvíkuryfirlýsinguna á fundi sínum 7. janúar sl. Þar með hafa 55 sveitarstjórnir samþykkt yfirlýsinguna frá því að hún leit fyrst dagsins ljós haustið 2000.

Ellefta landsráðstefnan um Staðardagskrá 21 verður haldin á Hótel Stykkishólmi dagana 20.-21. mars 2009. Ráðstefnan hefst um hádegisbil föstudaginn 20. mars og lýkur um hádegi daginn eftir. Meðal fyrirlesara á ráðstefnunni verður Leo Christensen, atvinnumálafulltrúi á Lálandi í Danmörku, en hann hefur beitt frumlegum og afar árangursríkum aðferðum við að skapa ný atvinnutækifæri á eyjunni síðustu 10 ár, með sérstakri áherslu á vistvæna orkugjafa.

Verkefnisstjórar Staðardagskrár 21 í sveitarfélögum landsins líta björtum augum til framtíðar, ef marka má þann anda sem ríkti á árlegum fundum þessa hóps, sem haldnir voru norðanlands og sunnan í gær og í fyrradag. Ein helsta niðurstaða fundanna var sú, að aldrei hefði hugmyndafræði sjálfbærrar þróunar skipt meira máli en einmitt nú, enda hefði gagnsleysi skammtímalausna endurspeglast einkar skýrt í atburðum síðustu vikna.

Félag umhverfisfræðinga á Íslandi efnir til málþings þriðjudaginn 2. desember nk. undir yfirskriftinni Sjálfbærni á tímamótum. Á málþinginu verður fjallað um mikilvægi sjálfbærrar þróunar í uppbyggingu þjóðfélagsins eftir áföll síðustu vikna. Málþingið verður haldið í Yale-fundarsal á 2. hæð Hótel Sögu og hefst kl. 15:00 umræddan þriðjudag.

Landvernd stendur fyrir námstefnu um Vistvernd í verki á Sólheimum í Grímsnesi 3.-5. október nk. Leiðbeinendur verða m.a. Marilyn og Alexander Mehlmann, upphafsmenn Vistverndar í verki í Evrópu. Á námstefnunni gefst tækifæri til menntunar staðbundinna stjórnenda og leiðbeinenda Vistverndar í verki í einstökum sveitarfélögum, en allmörg sveitarfélög á Íslandi hafa gert samninga við Landvernd um vistverndarstarf í heimabyggðinni.