Fréttir hag- og upplýsingasvið

Bæjarstjórn Álftaness hefur nú móttekið tilkynningu ráðherra samgöngu- og sveitarstjórnarmála. Í tilkynningunni kemur fram að ráðherra hefur tekið ákvörðun um að setja sveitarfélaginu fjárhaldsstjórn, sbr. 1. mgr. 76. gr. sveitarstjórnarlaga nr. 45/1998. Mun fjárhaldsstjórnin verða skipuð hið fyrsta og taka við fjárhaldsstjórn sveitarfélagsins.

Í ákvörðun ráðherra er aukinheldur lagt til að samkomulag verði gert milli fjárhaldsstjórnar og bæjarstjórnar Álftaness en ekki eru fordæmi fyrir slíku samkomulagi. Mikilvægt er að í samkomulagi þessu verði samstarf bæjarstjórnar og fjárhaldsstjórnar skýrgreint, svo vinna megi hratt og fumlaust í málefnum Álftnesinga.

Niðurstaða ráðherra kemur ekki á óvart enda hafði bæjarstjórn komist að þeirri niðurstöðu, í skýrslu sinni frá 27. janúar s.l., að sveitarfélagið myndi ekki vinna sig úr þeim fjárhagsvanda sem það stæði frammi fyrir án utanaðkomandi aðstoðar. Því miður er fjárhagsstaða sveitarfélagsins orðin slík að skipa þarf sveitarfélaginu fjárhaldsstjórn. Bæjarstjórn mun, þrátt fyrir erfiðar aðstæður, starfa af ábyrgð sem fyrr og vinna með fjárhaldsstjórninni að lausn á fjárhagsvanda sveitarfélagsins og gæta hagsmuna og velferð Álftnesinga í hvívetna.  

Álftnesingar munu vonandi ekki finna fyrir stjórnkerfisbreytingum við þessa tilhögun en áfram verður stjórnsýslan starfrækt með venjuhelguðum hætti.

Bæjarstjórn Álftaness hvetur Álftnesinga til bjartsýni og samstöðu, þrátt fyrir erfiða tíma.

8. febrúar 2010

f.h. bæjarstjórnar Álftaness
Pálmi Þór Másson, bæjarstjóri