Viðbrögð við efnahagsvanda

Bæjarstjórn Álftaness hefur nú móttekið tilkynningu ráðherra samgöngu- og sveitarstjórnarmála. Í tilkynningunni kemur fram að ráðherra hefur tekið ákvörðun um að setja sveitarfélaginu fjárhaldsstjórn, sbr. 1. mgr. 76. gr. sveitarstjórnarlaga nr. 45/1998. Mun fjárhaldsstjórnin verða skipuð hið fyrsta og taka við fjárhaldsstjórn sveitarfélagsins.

Á vefsíðu forsætisráðuneytisins er sagt frá því að haldnir verði átta „þjóðfundir“ í öllum landshlutum á tímabilinu 30. janúar til 20. mars. Fundirnir eru hluti af sóknaráætlun 20/20 þar sem ætlað er að ná fram samstöðu um lykilákvarðanir og framtíðarsýn fyrir atvinnulíf og samfélag sem skili okkur til móts við bjartari og betri tíma eins hratt og örugglega eins og kostur er.  Þar munu koma saman fulltrúar landshlutanna, sérfræðingar og fulltrúar hagsmunaaðila ásamt jafnmörgum einstaklingum úr röðum heimamanna sem valdir verða með úrtaki úr þjóðskrá líkt og gert var fyrir Þjóðfundinn í Laugardalshöll yfir landið í heild. Búist er við 100 til 200 manns á hvern fund í landshlutunum.

Velferðarvaktin hefur skilgreint hvað felst í grunnþjónustu ríkis og sveitarfélaga og sett fram ábendingar um hvaða leiðir skuli fara til að verja grunnþjónustuna þegar teknar eru ákvarðanir um hagræðingu og niðurskurð. Skýrsla um málið var kynnt á fundi ríkisstjórnarinnar í gær.

Fjárhagsáætlun Bolungarvíkurkaupstaðar var samþykkt á fundi bæjarstjórnar þann 7. janúar sl. Skuldir Bolungarvíkurkaupstaðar munu lækka um ríflega 200 milljónir króna frá árslokum 2008 til ársloka 2010 gangi fjárhagsáætlun fyrir árið 2010 eftir.  Sé reiknað á föstu verðlagi nemur skuldalækkunin 33% eða 366 milljónum króna.  Gert er ráð fyrir lækkun skulda þrátt fyrir miklar fjárfestingar en meðal annars er áætlað að ljúka við endurbyggingu Félagsheimilisins á árinu. 

Gert er ráð fyrir að rekstrarniðurstaða bæjarsjóðs Reykjanesbæjar verði jákvæð um 47 milljónir kr. en samstæðan sem inniheldur framkvæmdir Reykjaneshafnar og félagslegar íbúðir verði  neikvæð um 653 milljónir kr. Heildartekjur bæjarsjóðs eru áætlaðar  7.924 milljónir kr. en útgjöld 7.877 milljónir kr. Gert er ráð fyrir að eiginfjárhlutfall bæjarsjóðs á árinu 2010 verði 39,9% en samstæðu 23,3%. Eignir bæjarsjóðs á hvern íbúa nema 1.639 þúsund kr. en skuldir 985 þúsund kr.

Bæjarstjórn Kópavogs hefur samþykkt fjárhagsætlun fyrir bæjarsjóð árið 2010 með 44 milljóna króna rekstarafgangi. Allir bæjarfulltrúar í bæjarstjórn Kópavogs undirrituðu eftirfarandi bókun á bæjarstjórnarfundi miðvikudaginn 30. desember. Vinna við fjárhagsáætlun Kópavogsbæjar var unnin af fulltrúum allra flokka í bæjarstjórn og standa þeir saman að henni. Í fjárhagsáætlun ársins 2010 felst málamiðlun ólíkra sjónarmiða flokkanna sem að henni standa, með það sameiginlega markmið að vernda grunnþjónustu við bæjarbúa og halda gjaldskrárhækkunum í lágmarki.

Fjárhagsáætlun Sveitarfélagsins Voga var lögð fram til fyrri umræðu þann 26. nóvember 2009 og seinni umræðu 17. desember 2009. Haldinn var opinn íbúafundur um fjárhagsáætlun og ráðstafanir í tengslum við hana þann 15. desember. Í áætluninni birtist sú stefna sem mörkuð var í  upphafi efnahagskreppunnar að tryggja grunnþjónustu sveitarfélagsins á sviði félags- og fræðslumála og leitast við að tryggja gott atvinnustig í Vogum og á Suðurnesjum. Skipaður var þverpólitískur vinnuhópur sem undirbjó áætlunina. Með hópnum vann bæjarritari. Fundurinn kom saman til fyrsta fundar þann 13. ágúst og hélt 12 fundi. Að loknum 6. fundi varð breyting á skipan fulltrúa í hópnum, en fulltrúar H -lista ákváðu að halda samstarfinu ekki áfram og voru formenn fagnefnda skipaðir í hópinn í þeirra stað.

Fjárhagsáætlun Hafnarfjarðarkaupstaðar fyrir árið 2010 ásamt þriggja ára áætlun fyrir árin 2011-2013 var samþykkt á fundi bæjarstjórnar þriðjudaginn 22. desember. Yfirskrift fjárhagsáætlunarinnar er: Stöndum áfram vörð um velferð og grunnþjónustu. Þrátt fyrir að fyrirséður sé umtalsverður samdráttur í tekjum bæjarsjóðs samhliða auknum útgjöldum vegna fjölskyldu- og velferðarmála, verður áfram lögð megináhersla á að ná fram hagræðingu og sparnaði í rekstri, stjórnsýslu og framkvæmdum án þess að skerða grunnþjónustu og velferð. 

Fjárhagsáætlun Langanesbyggðar fyrir árið 2010 var samþykkt á fundi sveitarstjórnar þann 17. desember sl. Áætlunin byggir á endurskoðaðri áætlun ársins 2009 sem hefur verið leiðrétt að raunkostnaði ársins 2009. Í áætluninni er gert ráð fyrir að skatttekjur verði 259,5 millj.kr. og hækki um  2,6% á milli ára þrátt fyrir að tekjur frá jöfnunarsjóði dragist saman um 20%.

Bæjarstjórn Bolungarvíkur vísaði fjárhagsáætlun ársins 2010 til síðari umræðu á fundi sínum þann 17. desember síðastliðinn.  Áætlunin gerir ráð fyrir að heildartekjur A- hluta verði 542 m.kr en heildartekjur A- og B-hluta verði 643 m.kr. auk 73 m.kr óvenjulegra tekna.  Gert er ráð fyrir að A-hluti bæjarsjóðs skili 52 m.kr hagnaði, en þar af eru 14 m.kr vegna sérstaks álags á útsvar.  Ennfremur er gert ráð fyrir að rekstur samstæðunnar A- og B-hluta skili 108 m.kr hagnaði, en hagnaður í félagslega íbúðakerfinu, sem er B-hluta fyrirtæki skýrist að mestu af niðurfellingu lána hjá Íbúðalánasjóði að fjárhæð 73 milljónir króna. 

Fjárhagsáætlun Stykkishólmsbæjar fyrir  árið 2010 var samþykkt á bæjarstjórnarfundi 17. desember sl. Fjárhagsáætlun gerir ráð fyrir að A-hluti bæjarsjóðs sé rekin með 17,5 m. kr. afgangi, en að halli A og B hluta Stykkishólmsbæjar fyrir árið 2010 verði 5,6 m. kr. Fjárhagsáætlun Stykkishólmsbæjar fyrir árið 2010 var eins og áætlanir fyrri ára unnin í góðu samstarfi meirihluta og minnihluta bæjarstjórnar Stykkishólmsbæjar. Áætlunin var unnin við mjög sérstakar aðstæður í þjóðfélaginu þar sem mikill samdráttur er í efnahagslífinu og óvissa er mikil.

Í tillögu að fjárhagsáætlun Kópavogsbæjar fyrir árið 2010, sem lögð er fram til fyrri umræðu í bæjarstjórn Kópavogs í dag, er gert ráð fyrir 25 milljóna króna rekstrarafgangi. Áætlunin er raunhæf og ábyrg. Með henni er frekari vexti á kostnaði hamlað en áfram staðinn vörður um grunnþjónustu og velferðarmál. Framkvæmdum er haldið í lágmarki en þó þannig að öllu nauðsynlegu viðhaldi verður sinnt. Beitt er auknu aðhaldi á öllum sviðum sem felur í sér minni sveigjanleika í rekstri en nýtur á uppgangstímum. Þrátt fyrir það heldur Kópavogsbær áfram að bjóða góða þjónustu.

Fræðslunefnd Fjallabyggðar hefur lagt fram tillögur að framtíðarskipan fræðslumála í sveitarfélaginu. Í þeim felst að grunnskólarnir á Siglufirði og í Ólafsfirði verði sameinaðir í eina stofnun, leikskólarnir í eina og tónskólar í eina. Tillögurnar hafa verið kynntar bæjarstjórn og á fundi hennar í gær var samþykkt að kynna þær fyrir almenningi. Stefnt er að kynningarfundum í fyrstu vikum janúarmánaðar á komandi ári.

Bæjarstjórn Fljótsdalshéraðs samþykkti á fundi sínum í gær, 16. desember, fjárhagsáætlun fyrir árið 2010. Áætluð afkoma samantekins A og B hluta er jákvæð um eina milljón króna á árinu 2010.  Endurskoðuð áætlun 2009 gerir ráð fyrir neikvæðri afkomu sem nemur 340 milljónir. Eigið fé er áætlað að nemi 879 milljónum í árslok 2010 og eiginfjárhlutfallið verði þá 15%.  Veltufé frá rekstri er jákvætt um 297 milljónir, sem er 209 milljónum króna betri niðurstaða en samþykkt áætlun 2009 gerir ráð fyrir.

Á fundi bæjartjórnar Mosfellsbæjar, sem haldinn var 16. desember sl., var fjárhagsáætlun fyrir árið 2010 samþykkt samhljóða.  Áætlun var unnin sameiginlega af öllum flokkum í bæjarstjórn líkt og gert var fyrir árið 2009. Megináherslur í fjárhagsáætluninni eru að standa vörð um fjölskyldur og velferð, en tryggja um leið að bæjarfélagið veiti áfram góða öfluga þjónusta. Yfirskrift fjárhagsáætlunarinnar er: Hagræðing - uppbygging - velferð.

Undanfarið hafa staðið yfir viðræður við mennta- og menningarmálaráðuneytið um mögulegar leiðir til þess að hagræða í grunnskólastarfi. Tilefni viðræðnanna er sá vandi sem mörgum sveitarfélögum er á höndum vegna alvarlegs tekjusamdráttar, en á yfirstandandi ári stefnir hann í að verða u.þ.b. 10 milljarðar króna. Samband íslenskra sveitarfélaga hefur nú lagt fram tillögur sem gera myndu sveitarfélögunum kleift að svara hagræðingarkröfu til grunnskólans á næstu tveimur skólaárum, einkum með tímabundnum breytingum á grunnskólalögum. Tillögurnar hafa verið sendar mennta- og menningarmálaráðuneytinu þar sem þær eru til nánari skoðunar. Jafnframt hefur sambandið óskað eftir fundi með forsvarsmönnum Kennarasambands Íslands til þess að kynna fyrir þeim inntak helstu leiða sem virðast færar við núverandi aðstæður.

Félags- og tryggingamálaráðuneytið, Samband íslenskra sveitarfélaga og Samtök félagsmálastjóra gerðu með sér samkomulag í desember 2007 um að ráðuneytið skyldi árlega uppfæra grunnfjárhæð vegna fjárhagsaðstoðar sveitarfélaga, í samræmi við hækkun á gengi neysluverðsvísitölu samkvæmt 21. gr. laga um félagsþjónustu sveitarfélaga, nr. 40/1991, og birta fjárhæðina í leiðbeiningum ráðuneytisins.

Fjárhagsáætlun Hafnarfjarðarkaupstaðar fyrir árið 2010 ásamt langtímaáætlun fyrir árin 2011-2013 var tekin til fyrri umræðu í bæjarstjórn Hafnarfjarðar þriðjudaginn 15.desember. Yfirskrift fjárhagsáætlunarinnar er „Stöndum áfram vörð um velferð og þjónustu“.  Þrátt fyrir fyrirséður sé umtalsverður samdráttur í tekjum bæjarsjóðs samhliða auknum útgjöldum vegna fjölskyldu og velferðarmála, verður áfram lögð megináhersla á að ná fram hagræðingu og sparnaði í rekstri, stjórnsýslu og framkvæmdum án þess að skerða grunnþjónustu og velferðarmál.

Fjárhagsáætlun Grundarfjarðar fyrir árið 2010 var lögð fram á fundi bæjarstjórnar þann 14. desember sl. Í bókun bæjarstjórnar segir að fjárhagsáætlunin sé „lögð fram eftir ítarlega umfjöllun í bæjarráði og hefur verið mótuð sameiginlega af bæði meirihluta og minnihluta bæjarstjórnar.  Eins og fyrir ári síðan hefur bæjarstjórn haft að leiðarljósi að standa vörð um grunnþjónustu við íbúa,  og gæta ýtrasta aðhalds á öllum sviðum.“

Fjárhagsáætlun Hvalfjarðarsveitar var tekinn til síðari umræðu í sveitarstjórn þann 8. desember sl og samþykkt samhljóða. Fjárhagsáætlunin fyrir árið 2010 er nú lögð fram við erfiðar aðstæður líkt og við síðustu fjárlagagerð. Nánast allar forsendur eru ófyrirséðar en áætlunin sem hér er lögð fram byggir að hluta til á upplýsingum frá Fjármálaráðstefnu Sveitarfélaganna og þeim gögnum sem þar voru lögð fram.  Jafnframt er horft til spár Seðlabanka Íslands.  Frumvarpið byggir á amk. 3% samdætti í útsvarstekjum,  óbreyttum Jöfnunarsjóðsframlögum og 3% samdrætti í fasteignagjaldastofni frá  áætlun ársins 2009.

Síðari umræða um fjárhagsáætlun Eyjafjarðarsveitar  fyrir árið  2010  var 11. desember sl. Fjárhagsáætlun ársins 2010 gerir eins og áætlun ársins 2009 ráð fyrir hallalausum rekstri  þrátt fyrir tekjusamdrátt. Þennan árangur má þakka  aðhaldi í rekstri svo og  virku og mjög góðu samstarfi allra sem að rekstri sveitafélagsins koma. Almennt er ekki gert ráð fyrir gjaldskrárhækkunum. Þó hækkar sorp- og rotþróargjald.      

Fjárhagsáætlun Akureyrarbæjar fyrir árið 2010 var lögð fram til fyrri umræðu í bæjarstjórn þriðjudaginn 8. desember. Áætlunin gerir ráð fyrir hallalausum rekstri samstæðunnar þrátt fyrir minni tekjur að raunvirði og aukin útgjöld á vissum sviðum. Þennan árangur má rekja til þess að ítrasta aðhalds verður gætt á öllum sviðum og allra leiða leitað til þess að draga úr útgjöldum. Áætlunin var unnin í samráði við oddvita allra flokka í bæjarstjórn og í þeirri vinnu var haft að leiðarljósi að verja grunnsþjónustu bæjarfélagsins, s.s. fræðslustarfsemi og félagslega þjónustu. Jafnframt var sérstaklega horft til þess að ekki þurfi að koma til uppsagna vegna þeirra aðgerða sem gripið verður til.

Frumvarp að fjárhagsáætlun Reykjavíkurborgar fyrir árið 2010 var lagt fram við fyrstu umræðu á fundi borgarstjórnar Reykjavíkur þann 3. desember sl. Markmið frumvarpsins er að standa vörð um þjónustu við börn og velferð. Þessi áhersla kemur skýrt fram í því að engin krafa um hagræðingu er gerð á Velferðasvið borgarinnar og er gert ráð fyrir að Menntasvið, Leikskólasvið og Íþrótta- og tómstundasvið hagræði aðeins um 4% í sínum rekstri.

Fyrri umræða fjárhagsáætlunar Dalabyggðar var í sveitarstjórn 8. desember sl. Samþykkt var að vísa áætluninni til annarrar umræðu sem stefnt er að fari fram þann 17. desember nk. Í áætluninni er gert ráð fyrir 9 milljóna króna afgangi af samstæðureikningi og að rekstrarniðurstaða fyrir fjármagnsliði verði jákvæð um 38,9 m.kr.

Í fjárhagsáætlun Garðabæjar fyrir árið 2010 er tekið mið af þeim áherslum sem fram komu á nýlegum íbúafundi um að standa vörð um skóla- og æskulýðsstarf. Sérstök fjárveiting er veitt til að styrkja barna- og unglingastarf hjá íþrótta- og æskulýðsfélögum í bænum og einnig er veitt sérstök fjárveiting til að styðja við sveigjanlegt skólastarf. Gert er ráð fyrir jákvæðri niðurstöðu að fjárhæð 67 mkr. Veltufé frá rekstri er 13,6% og er það til marks um trausta fjárhagsstöðu Garðabæjar.

Á vefsíðu Reykjanesbæjar kemur fram að samkvæmt í 10 mánaða árshlutauppgjöri endurskoðunarfyrirtækisins Deloitte á fjárhagsstöðu bæjarsjóðs Reykjanesbæjar 2009 sem lagt var fram í bæjarráði í gær sýnir afkoma bæjarsjóðs um 8 milljarða kr. hagnað. Miðað við uppgjör Deloitte, sem gildir tímabilið  1. janúar til 31. október, hækkar eigið fé bæjarsjóðs Reykjanesbæjar úr 2,4 milljörðum kr. árið 2008 í 11,0 milljarða kr. Eiginfjárhlutfall þessa tímabils fer úr 18,44% árið 2008 í 43,09%.  

Norræna ráðherranefndin boðar til ráðstefnu um Fjármálakreppuna, húsnæðismarkaðinn og heimilin. Ráðstefnan verður haldin á Hilton Hótel Nordica í Reykjavík, fimmtudaginn 26. nóvember 2009. Á ráðstefnunni verður leitað svara við ýmsum mikilvægum spurningum sem snerta húsnæðismarkaðinn og rætt um mögulega stefnumótun norrænu ríkjanna í húsnæðismálum í kjölfar breyttra forsendna. Varpað verður ljósi á sérstöðu norrænu ríkjanna í húsnæðismálum og það sem þau eiga sameiginlegt. Þá verður leitast við að sjá fyrir þróuina í nánustu framtíð.

Sveitarfélög um land allt leita nú allra leiða til að spara í rektri. Á vefsíðu Grundarfjarðarbæjar er auglýst eftir tillögum frá íbúum sveitarfélagsins og þeim boðið að senda inn hugmyndir ábendingar og tillögur um sparnað og/eða leiðir til þess að bæta starfsemi sveitarfélagsins. Allar hugmyndir eru vel þegnar og verða ræddar innan stjórsýslunnar.

Á fundi sveitarstjórnar Súðavíkurhrepps, sem haldinn var 19. nóvember sl., var m.a. farið yfir fyrri umræðu að fjárhagsáætlun Súðavíkurhrepps og stofnana hans fyrir árið 2010.  Með áorðnum breytingum á fjárhagsáætlun fyrir árið 2010 eru tekjur samstæðureiknings Súðavíkurhrepps, (A og B hluta), áætlaðar kr. 169.687.000 og útgjöld áætluð kr. 148.437.000.   Niðurstaða reksturs án fjármagnsliða og afskrifta er því jákvæð um kr. 21.250.000. Fjármagnsgjöld umfram fjármagnstekjur eru áætlaðar kr. 5.395.000 og afskriftir áætlaðar kr. 9.476.000.  Rekstrarniðurstaða samstæðureiknings Súðavíkurhrepps er því áætluð jákvæð um kr. 6.379.000.

Á fundi bæjarráðs Bolungarvíkurkaupstaðar, sem haldinn var 11. nóvember sl., var lagt fram árshlutauppgjör fyrir fyrstu 9 mánuði ársins. Uppgjörið sýnir að mikill viðsnúningur hefur orðið í rekstri sveitarfélagsins og skilar rekstur þess nú hagnaði. Í bókun bæjarráðs segir m.a.: „Bolungarvíkurkaupstaður var rekinn með 123 milljóna króna hagnaði fyrstu 9 mánuði ársins. Þannig var afgangur af rekstri A-hluta rúmlega 24 milljónir króna og afgangur af rekstri B-hluta rúmlega 98 milljónir króna.Rekstrarafgangur fyrir fjármagnsliði og afskriftir (EBIDTA) var 128 milljónir króna eða 11 milljónum króna betri en áætlun gerði ráð fyrir. Þar af var afgangurinn 83 milljónir króna hjá A-hluta og 45 milljónir króna hjá B-hluta.“

Bæjarstjóri Garðabæjar boðar til fundar með íbúum bæjarins miðvikudaginn 11. nóvember nk.  Á fundinum fá allir Garðbæingar tækifæri til að hafa áhrif á gerð fjárhagsáætlunar bæjarins fyrir árið 2010. Þetta er í fyrsta sinn sem boðað er til almenns íbúafundar í tengslum við vinnu við fjárhagsáætlun.

Samtök evrópskra sveitarfélaga og héraða (CEMR) hafa birt niðurstöður könnunar sem samtökin stóðu fyrir um áhrif kreppunnar á rekstrarumhverfi sveitarfélaga og héraða. Samband íslenskra sveitarfélaga tók þátt í könnuninni fyrir hönd íslenskra sveitarfélaga ásamt sveitarfélagasamböndum í 27 öðrum evrópuríkjum.

Á fundi byggðarráðs Dalabyggðar, sem haldinn var 3. nóvember sl., var endurskoðaðri fjárhagsáætlun sveitarfélagsins, vegna ársins 2009, vísað til afgreiðslu í sveitarstjórn. Niðurstaða endurskoðaðrar fjárhagsáætlunar er 12,1 m.kr. afgangur frá rekstri samstæðunnar. Um er að ræða viðsnúning upp á 49 m.kr. frá samþykktri áætlun ársins þar sem gert var ráð fyrir 37 m.kr. halla.

Á fundi stjórnar Sambands íslenskra sveitarfélaga, sem haldinn var föstudaginn 30. október, var eftirfarandi bókun samþykkt í framhaldi af umræðum stjórnarinnar um stöðugleikasáttmála ríkisstjórnar Íslands, sambandsins, Samtaka atvinnulífsins og launaþegasamtaka frá 25. júní 2009:

Rekstrarniðurstaða Reykjavíkurborgar (A-hluta) fyrir fyrstu sex mánuði þessa árs er mun betri en samkvæmt fjárhagsáætlun fyrir tímabilið eða sem nemur 227 milljónum króna. Rekstrarniðurstaðan fyrir fjármagnsliði eftir fyrstu 6 mánuði ársins er 1,2 milljörðum betri en endurskoðuð áætlun gerir ráð fyrir. Fjármagnsliðurinn skilar minni tekjum vegna meiri verðbólgu, veikara gengis og minni sölu skipulagseigna en skv. áætlun.  Þetta kemur fram í árshlutareikningi Reykjavíkurborgar fyrir tímabilið janúar til júní 2009 sem lagður var fram í borgarráði í dag. 

Hafinn er undirbúningur að gerð fjárhagsáætlunar Sveitarfélagsins Árborgar fyrir árið 2010. Áætlað er að tekjur sveitarfélagsins haldi áfram að lækka auk þess sem launahækkanir skv. kjarasamningum, hækkun á tryggingargjaldi launa, almennar verðlagshækkanir, verðbólga og lágt gengi krónunnar valda því að ekki verður hjá því komist að gera breytingar í rekstri, m.a. með breyttu fyrirkomulagi starfa og fækkun stöðugilda. Almennur rekstur sveitarfélagsins þarf að rúmast innan þess ramma sem tekjurnar, m.a. útsvar íbúa, skapa.

Samband íslenskra sveitarfélaga hefur látið þýða á  íslensku  útdrátt úr skýrslu Alþjóðagjaldeyrissjóðsins Strengthening the Budget Framework sem sjóðurinn sendi frá sér í mars 2009 vegna mikilvægrar umfjöllunar í skýrslunni um fjármálaleg samskipti ríkis og sveitarfélaga.

Gjaldskrá leikskóla Reykjavíkurborgar fyrir grunnþjónustu, 8 stunda vistun, mun haldast óbreytt og verða þannig gjöld fyrir grunnþjónustu leikskóla áfram lægst í Reykjavík. Áfram verður veittur 100% systkinaafsláttur en þess má geta að Fjarðabyggð veitir einnig slíkan afslátt. Allir aðrir afslættir fyrir einstæða foreldra, námsmenn og öryrkja haldast óbreyttir. Fæðisgjald er einnig óbreytt.

Rekstur sveitarsjóðs  Fljótsdalshéraðs  ásamt  undirfyrirtækjum fór ekki varhluta af breyttum aðstæðum í efnahagsmálum þjóðarinnar á árinu 2008.  Mestu áhrifin urðu á fjármagnsliðum sem hækkuðu gríðarlega miðað við áætlanir bæði vegna mikillar verðbólgu og gengishækkun erlendra lána. 

Á fundi bæjarstjórnar Grundarfjarðarbæjar þ. 19.  maí sl. voru ársreikningar 2008 fyrir bæjarsjóð og stofnanir bæjarins afgreiddir eftir síðari umræðu.  Afkoma bæjarsjóðsins var slæm á síðasta ári.  Reksturinn varð þyngri en fjárhagsáætlun gerði ráð fyrir og má rekja ástæðu þess að miklu leyti til hækkaðs launakostnaðar vegna breytinga á kjarasamningum og óðaverðbólgu.  Í sjóðstreymi kom fram að handbært fé frá rekstri varð rúmlega 80 milljón krónur en það dugði skammt þegar kom að fjármagnsgjöldunum.

Reykjanesbær fer ekki varhluta af gengishruni og fjármálakreppu fremur en fyrirtæki og heimili í landinu.  Reiknað tap í ársreikningi Reykjanesbæjar 2008 nemur rúmum 8 milljörðum kr.  7,5 milljarðar kr. eru vegna gengistaps og neikvæðra fjármagnsliða.

Bæjarráð Reykjanesbæjar tók þá ákvörðun á fundi sínum í gær að fela starfshópi um sumarvinnu ungs fólks frekari útfærslu á verkefnum fyrir samtals 26 milljónir króna til að skapa sumarstörf fyrir allt að 200 einstaklinga í 4 vikur. Verkefnin eru fyrir ungmenni 17 ára og eldri og fela í sér vinnu við fegrun umhverfis s.s. skógrækt, garðyrkju, hreinsun og fl.
Verkefnið er unnið í samstarfi við Vinnumálastofnun og Skógræktarfélag Suðurnesja sem og Reykjansehöfn og Þjónustumiðstöð Reykjanesbjæar.

Föstudaginn 3. apríl skrifuðu Fjarðabyggð, AFL starfsgreinafélag, VR, Reyðarfjarðardeild Rauða kross Íslands, Þekkingarnet Austurlands og Vinnumálastofnun undir samkomulag um rekstur miðstöðvar fólks í atvinnuleit í Fjarðabyggð. Þekkingarnet Austurlands mun leiða verkefnið hefur ráðið Guðrúnu Sælínu Sigurjónsdóttur starfsmann til miðstöðvarinnar.

Hag- og upplýsingasvið Sambands íslenskra sveitarfélaga hefur tekið saman vefrit sem fjallar um þriggja ára áætlanir sveitarfélaganna. Í því er farið yfir uppbyggingu þriggja ára áætlana, markmið með gerð þeirra og að síðustu eru dregin fram ýmis atriði sem skipta máli við vinnslu þeirra. Markmið vefritsins er að hafa aðgengileg á einum stað þau atriði sem mestu máli skipta við undirbúning og gerð þriggja ára áætlunar.

Nýlega gerði Seltjarnarnesbær samning við  World Class um þjónustu við atvinnulausa.
Í samningnum felst að þeim íbúum Seltjarnarness sem misst hafa vinnu mun standa til boða að stunda líkamsrækt í World Class þeim að kostnaðarlausu. Þá mun Seltjarnarnesbær einnig bjóða atvinnulausum upp á bókasafnskort á Bókasafni Seltjarnarness og sundkort í Sundlaug Seltjarnarness. Þjónustan er í boði þrjá mánuði í senn og er háð því að stéttarfélag viðkomandi bjóði ekki upp á sambærileg úrræði.

Stjórnendur sveitarfélaga leita nú allra leiða til að draga úr kostnaði og gæta aðhalds í rekstri sínum. Í gær, miðvikudaginn 1. apríl, kynntu stjórnendur Akureyrarbæjar hugmynd þess efnis að starfsmenn sveitarfélagins taki einn launalausan frídag í mánuði frá og með næsta ári. Með því er talið að unnt verði að spara 150-200 milljónir króna á árinu. 

Á fundi stjórnar Súðavíkurhrepps, sem haldinn var 26. mars sl., var m.a. lagt fram erindi samgönguráðuneytisins þar sem þess er  farið á leit við sveitarfélögin Bolungarvíkurkaupstað og Ísafjarðarbæ að þau hefji athugun á samfélaglegum ávinningi af mögulegri sameiningu þeirra sveitarfélaga vegna bættra samgangna um jarðgöng.  Jafnframt verði Súðavíkurhreppi boðin þátttaka í þeirri athugun.

Námsstefna verður haldin á Hótel Sögu þann 3. apríl næstkomandi þar sem fjallað verður um tækifæri og úrræði fyrir einstaklinga sem hafa misst atvinnuna. Fjallað verður um breytingar á löggjöfinni og hvaða möguleikar felast í þeim. Christer Gustafsson, stofnandi og stjórnarmeðlimur Hallander-verkefnisins sem gaf góða raun í Svíþjóð í byrjun níunda áratugarins, mun flytja fyrirlestur um verkefnið.

Snæfellsnes á tímamótum - hamingja í heimabyggð. Þetta er yfirskrift íbúafunda sem Kvarnir, áhugahópur um framtíðina á Snæfellsnesi, bjóða til á næstunni í samstarfi við sveitarfélögin.  Þar verður til umræðu, allt það sem íbúar telja að að hægt sé að gera til að láta hamingjuna blómstra hér á Nesinu, þrátt fyrir umrót í þjóðfélaginu.

Á fundi stjórnar Sambands íslenskra sveitarfélaga, sem haldinn var um sl. mánaðamót, var m.a. fjallað um húsaleigubætur og fjárvöntun vegna hlutar ríkisins í húsaleigubótum. Á fundinum var upplýst að fjárvöntunin vegna ársins 2008 er um 147 m.kr. og miðað við fjárheimildir í fjárlögum ársins 2009 mun vanta um 229 m.kr. upp á að ríkissjóður standi við samkomulag ríkissjóðs og sambandsins frá 7. apríl 2008 um fjárhæðir húsaleigubóta og greiðsluhlutfall ríkis og sveitarfélaga.

Fjárhagsáætlun Vesturbyggðar fyrir árið 2009 var samþykkt í bæjarstjórn þann 3. febrúar sl. Áætlunin hafði verið í vinnslu hjá bæjarráði síðan í nóvember 2008. Fór hún til fyrri umræðu á fundi bæjarstjórnar þann 17. desember 2008.

Veitt hefur verið heimild til styttingar útboðsferla við útboð vegna framkvæmda á EES fyrir árin 2009 og 2010. Þannig geta útboðsferlar styst úr allt að 87 dögum í 30 daga. Um er að ræða svokölluð lokuð hraðútboð, þar sem frestur til að leggja fram þátttökutilkynningar er 10 dagar að lágmarki í stað 37 daga og frestur til að skila tilboðum 10 dagar að lágmarki í stað 40 daga og síðan 10 daga biðtími frá tilkynningu um val tilboðs þar til tilboð er endanlega samþykkt.

Borgarráð samþykkti á fundi sínum þann 5. febrúar að fela aðgerðarteymi Velferðarsviðs að setja á fót samráðsteymi á hverri þjónustumiðstöð Reykjavíkurborgar í ljósi vaxandi atvinnuleysis og efnahagsþrenginga. Mikið starf hefur farið fram undanfarna mánuði á Velferðarsviði við að undirbúa og efla þjónustu við íbúa borgarinnar vegna efnahagsástandsins. Með samráðsteymunum er rennt enn styrkari stoðum undir möguleika borgarinnar til að mæta vel þörfum íbúa sem á aðstoð þurfa að halda.

Fjárhagsáætlun Borgarfjarðarhrepps fyrir árið 2009 var samþykkt á fundi hreppsnefndar þann 2. febrúar sl. Í áætluninni er gert ráð fyrir jákvæðri niðurstöðu A-hluta um rúmar 11 milljónir króna og er samstæðureikningur sömuleiðis réttu megin við núllið. Útsvar í sveitarfélaginu verður 13,28% en ekki er gert ráð fyrir hækkun þjónustugjalda í sveitarfélaginu.

Fjárhagsáætlun Sveitarfélagsins Voga var samþykkt við seinni umræðu í bæjarstjórn þann 29. janúar síðastliðinn. Í samræmi við stefnu bæjarstjórnar var þann 13. janúar haldinn fyrsti opni íbúafundur sveitarfélagsins um fjárhagsáætlun og ráðstafanir í tengslum við hana.

Sveitarstjórn Þingeyjarsveitar samþykkti fjárhagsáætlun fyrir árið 2009 á fundi sínum sem haldinn var þann 14. janúar sl. Í áætluninni er gert ráð fyrir aðhaldi í rekstri sveitarfélagsins á árinu og að hækkun gjaldskráa verði hófleg. Þá samþykkti sveitarstjórnin að leikskólagjöld yrðu óbreytt og einnig gjaldskrá vegna heimaþjónustu. Gert er ráð fyrir jákvæðri niðurstöðu aðalsjóðs um rúmar 16 milljónir króna en að rekstrarniðurstaða samstæðu verði neikvæð um rúmar 58 milljónir.

Rekstrarniðurstaða samstæðureiknings Tálknafjarðarhrepps er neikvæð um 8.840.000 krónur. Þetta kom fram þegar seinni umræða um fjárhagsáætlun Tálknafjarðarhrepps og stofnana hans fyrir árið 2009 fór fram þann 21. janúar sl. Með áorðnum breytingum á fjárhagsáætlun fyrir árið 2009 eru tekjur samstæðureiknings Tálknafjarðarhrepps, (A og B hluta), áætlaðar 183.819.000 kr. og útgjöld áætluð 179.802.000 kr. Niðurstaða reksturs án fjármagnsliða og afskrifta er því jákvæð um 4.017.000 kr. Fjármagnsliðir nettó eru áætlaðir neikvæðir um 12.857.000 kr. og afskriftir áætlaðar 15.067.000 kr.

Fjárhagsáætlun ársins 2009 var samþykkt á fundi sveitarstjórnar Súðavíkurhrepps, sem haldinn var 15. janúar sl. Niðurstaða reksturs sveitarfélagsins, án fjármagnsliða og afskrifta er jákvæð um rúmar 13 milljónir króna og er rekstrarniðurstaða samstæðunnar jákvæð um 3,6 milljónir. Í ljósi efnahagsaðstæðna í landinu samþykkti sveitarstjórn að hafa gjaldskrár sveitarfélagsins fyrir árið 2009 óbreyttar frá árinu 2008 en endurskoða þær í apríl nk.

Fjárhagsáætlun Skeiða- og Gnúpverjahrepps var samþykkt í sveitarstjórn þann 13. janúar sl. Samþykkt var að nýta hámarksálagningu útsvars sem verður 13,28% á árinu 2009. Gert er ráð fyrir hækkun tekna um 5%, lækkun fasteignagjalda um 4% og að rekstur leikskóla muni hækka um 3 milljónir króna.

Sveitarstjórn Skaftárhrepps samþykkti á fundi sínum þann 12. janúar sl. fjárhagsáætlun fyrir árið 2009. Í fundargerð sveitarstjórnar kemur fram að fyrirvari er gerður um tekjur sveitarfélagsins af framlögum úr Jöfnunarsjóði sveitarfélaga og verðbólguspá. Þá segir að nauðsynlegt sé að halda áfram aðgerðum til aðhalds og hagræðingar, m.a. í samstarfi við forsvarsmenn stofnana og nefnda sveitarfélagsins.

Fjárhagsáætlun Sandgerðisbæjar var samþykkt á fundi bæjarstjórnar þann 7. janúar sl. Í greingargerð með fjárhagsáætluninni kemur m.a. fram að útgjaldarammi verði því sem næst óbreyttur næstu árin að teknu tilliti til hækkunar á launum og aukins reksturs. Bæjarstjórn Sandgerðisbæjar er hinsvegar staðráðin í að tryggja velferð íbúa og grunnþjónustu samfélagsins eftir því sem hægt er. Því er lögð áhersla á að halda gjaldskrám sem mest óbreyttum og reyna að tryggja hátt atvinnustig á árinu 2009.

Fjárhagsáætlun Rangárþings ytra var samþykkt í sveitarstjórn þann 8. janúar sl. Í greingargerð með áætluninni segir m.a. að vinna við gerð fjárhagsáætlunar hafi verið með nýju og breyttu sniði. „Þrengingar í ástandi efnahagsmála þjóðarinnar í byrjun vetrar 2008 breyttu framtíðarhorfum í sveitarfélaginu. Síðastliðin ár hefur sveitarfélagið verið í öflugri sókn og framundan var fjöldi stórframkvæmda á vegum opinberra aðila, sem talið var að myndu auka sókn sveitarfélagsins enn frekar. Á skömmum tíma var fallið frá umræddum framkvæmdum og við blasti samdráttur. Fara þurfti úr langvarandi sókn í vel skipulagða vörn. Aðlaga þurfti rekstur sveitarfélagsins að nýjum og breyttum aðstæðum.“

Sveitarstjórn samþykkti fjárhagsáætlun Rangárþings eystra fyrir árið 2009 á fundi sínum þann 8. janúar 2009 en áætlunin er unnin í góðri samvinnu meiri- og minnihluta í sveitarstjórn. Fjárhagsáætlunin einkennist af því efnahagsástandi sem nú ríkir í þjóðfélaginu. Gert er ráð fyrir að framlag jöfnunarsjóðs til sveitarfélagsins dragist verulega saman á árinu og aukin verðbólga mun hafa í för með sér hækkun fjármagns- og rekstrarkostnaðar. Til að bregðast við þessu ástandi gerir sveitarstjórn kröfur til stjórnenda stofnana sveitarfélagsins um hagræðingu í rekstri og lækkun rekstrarkostnaðar.

Fjárhagsáætlun 2009 var samþykkt í Bæjarstjórn Hornafjarðar þann 28. janúar 2009. Fjárhagsáætlunin var unnin á miklum óvissutímum í efnahagsmálum þjóðarinnar. Tekjur ríkisins hafa dregist mikið saman og því er Jöfnunarsjóður sveitarfélaga ekki eins sterkur og undanfarin ár. Tekjur sveitarfélagsins Hornafjarðar dragast því saman sem nemur skerðingu úr jöfnunarsjóði.

Fjárhagsáætlun Fjallabyggðar fyrir árið 2009 var samþykkt á fundi bæjarstjórnar mánudaginn 26. janúar. Áætlunin einkennist af ströngu aðhaldi, en inniheldur þó framkvæmdarliði upp á tæplega 118 mkr. Sérstaklega var hugsað til þess að velja framkvæmdaliði sem væru mannfrekir, til eflingar atvinnulífs sveitarfélagsins.

Sveitarstjórn Húnavatnshrepps samþykkti fjárhagsáætlun fyrir árið 2009 þann 20. janúar sl. Áætlað er að framkvæmdir verði við lóð leikskóla, viðhald á húsnæði Húnavallaskóla, við rotþrær, tjaldstæði, að lagt verði stofnfé í félag um byggingu leiguíbúða, stofnframlag við stækkun Fjölbrautarskóla Norðurlands vestra á Sauðárkróki og hlutafjárkaup í Hveravallafélaginu ehf. Samtals er áætlað að fjárfestingar verði um 32 m. kr. Netto lántökur eru áætlaðar 8,7 m.kr. og fjármögnun af eigin fé 23 m.kr.

Fjárhagsáætlun Hörgárbyggðar fyrir árið 2009 var samþykkt á fundi sveitarstjórnar þann 19. desember 2008.  Áætlunin gerir ráð fyrir að skatttekjur verði 192,5 millj. kr., sem er 5,5% lækkun frá endurskoðaðri áætlun fyrir árið 2008. Áætlað er að rekstrargjöld (að frádregnum þjónustutekjum) verði samtals sama fjárhæð.

Fjárhagsáætlun Grýtubakkahrepps fyrir árið 2009 var samþykkt á fundi sveitarstjórnar þann 15. desember 2008. Í ávarpi á vefsíðu Grýtubakkahrepps segir Guðný Sverrisdóttir sveitarstjóri að mikill tími hafi farið í gerð fjárhagsáætlunarinnar. „Þegar áætlaðar tekjur lækka um 11% og allir kostnaðarliðir hækka mætti álíta að það væri ómögulegt að koma áætluninni saman. Með því að snúa við hverjum steini var þó mögulegt að skila áætluninni með hagnaði A hluta sveitarsjóðs upp á kr. 1.237.000,-.“

Fjárhagsáætlun fyrir árið 2009 var samþykkt á fundi sveitarstjórnar Grímsnes- og Grafningshrepps þann 18. desember 2008. Gert er ráð fyrir jákvæðri rekstrarniðurstöðu rekstrarsamstæðunnar um tæpar 9 milljónir króna. Í forsendum fjárhagsáætlunarinnar er ekki gert ráð fyrir að kostnaður við embætti byggingar- og skipulagsfulltrúa aukist og að hækkun álagningarhlutfalls fasteignagjalda leiði til hækkunar tekna.

Fjárhagsáætlun Flóahrepps fyrir árið 2009 var samþykkt á fundi sveitarstjórnar þann 21. janúar sl. Gert er ráð fyrir að rekstrarniðurstaða sveitarsjóðs verði neikvæð um tæplega 14 milljónir króna en sveitarstjórnin samþykkti að endurskoða áætluninna þegar ársreikningur fyrir árið 2008 liggur fyrir.

Fjárhagsáætlun Borgarbyggðar fyrir árið 2009 var samþykkt á fundi sveitarstjórnar þann 15. janúar sl. Áætlunin ber þess glöggt vitni að þær hremmingar sem íslenskt efnahagslíf hefur gengið í gengum undanfarið hefur veruleg áhrif á fjárhag sveitarfélaga.  Víða hefur verið hagrætt í rekstri Borgarbyggðar.  Reynt hefur verið eftir fremsta megni að vernda störf þó að ekki hafa verið komist hjá því að lækka starfshlutfall hjá hluta starfsmanna v/styttri opnunartíma einstakra stofnana eða samdráttar í þjónustu .  Það er ljóst að gæta verður ítrasta aðhalds í rekstrinum og eftirfylgni með fjárhagsáætlun verður að vera afar markviss. 

Fjárhagsáætlun Blönduóssbæjar var samþykkt á fundi bæjarstjórnar þann 13. janúar sl. Bæjarfulltrúar á Blönduósi tóku höndum saman um gerð fjárhagsáætlunar og voru samstíga í þeirri vinnu. Unnin var greining á öllum stofnunum og hagrækt í rekstri í samstarfi við starfsmenn deildanna. Náðist umtalsverður árangur af þeirri vinnu sem skilar sér í lægri rekstrarkostnaði. Markmiðið við gerð fjárhagsáætlunarinnar er að treysta stoðir samfélagsins og halda áfram með þau verkefni sem eru í vinnslu. 

Fjárhagsáætlun Bláskógabyggðar fyrir árið 2009 var samþykkt á fundi sveitarstjórnar þann 14. janúar sl. Í áætluninni er gert ráð fyrir að rekstrarniðurstaða samstæðureiknings sveitarfélagsins verð jákvæð að upphæð kr. 15.067.000. Ekki er gert ráð fyrir fjárfestingum á rekstrarárinu en að sá þáttur verði endurskoðaður við endurskoðun fjárhagsáætlunar í apríl 2009.

Í fjárhagsáætlun Skútustaðahrepps fyrir árið 2009 er gert ráð fyrir að heildartekjur sveitarsjóðs (samstæðunnar) verði 277,1 millj. og gjöldin 282,7 millj. Að teknu tilliti til fjármagnsliða er áætlaður tekjuafgangur 2,7 millj.  Heildarfjárfestingaráætlun fyrir 2009 hljóðar uppá 31 millj. Samkvæmt niðurstöðum fjárhagsáætlunar eru  rúmar 18 milljónir króna handbærar frá rekstri á árinu 2009. Framkvæmdum umfram það verður mætt með eigin fé.

Fjárhagsáætlun Akureyrarbæjar fyrir árið 2009 var samþykkt á fundi bæjarstjórnar þann 20. janúar sl. Áætlunin var unnin af oddvitum allra flokka í bæjarstjórn og ber vitni um kröftuga varnarbaráttu í þeim efnahagsþrengingum sem nú ríða yfir íslenskt þjóðfélag. Þar er haft að leiðarljósi að verja grunnstoðir í þjónustu bæjarfélagsins, halda vel utan um starfsemi grunn- og leikskóla bæjarins, sem og félagsþjónustuna, og einnig að verja störf og mannaflsfrekar framkvæmdir eftir því sem kostur er. Engar uppsagnir eru fyrirsjáanlegar hjá sveitarfélaginu en dregið verður úr yfirvinnu og reynt verður að forðast allar nýráðningar.

Á fundi sveitarstjórnar Djúpavogshrepps sem heldinn var 22. janúar sl. var fjárhagsáætlun sveitarfélagsins fyrir árið 2009 samþykkt. Samkvæmt áætluninni er áætlað að það verði 19 milljóna króna halli á rekstri sveitarsjóðs, sem stafar ekki síst af fjármagnsliðum sem eru áætlaðir um 71 milljón króna.  

Í ljósi þeirra breytinga sem hafa orðið í íslensku efnahagslífi á síðustu mánuðum hefur Samband íslenskra sveitarfélaga ákveðið að efla söfnun upplýsinga um fjárhagslega stöðu sveitarfélaganna. Mikilvægt er í því ótrygga efnahagsástandi sem landsmenn búa við næstu mánuði og misseri að geta fylgst vel með stöðu sveitarfélaganna og hvert stefnir í fjármálum þeirra. Sveitarfélögin eru undirstaða að velferðarkerfi þjóðarinnar og því skiptir miklu hvernig mál skipast hjá þeim.

Fimmtudaginn 15. janúar 2009 verður samstarfsverkefni sveitarfélaganna á Suðurnesjum, Vinnumálastofnunar, verkalýðsfélaga, fyrirtækja og menntastofnana á svæðinu sett á stofn. Verkefnið hefur hlotið nafnið Virkjun. Markmiðið með rekstri Virkjunar er að byggja upp starfsemi fyrir íbúa á Suðurnesjum sem leita nýrra tækifæra í atvinnu eða námi. Þá verður Virkjun ekki síður samkomustaður fólks sem vill breyta því áfalli sem atvinnuleysi er í ný tækifæri á atvinnumarkaði með námi, námskeiðum, tómstundum og menningarstarfsemi en hlutfall atvinnulausra á landinu er hæst á Suðurnesjum þar sem nú eru 1.400 einstaklingar á atvinnuleysisskrá.

Samband íslenskra sveitarfélaga hefur tekið saman leiðbeiningar fyrir sveitarstjórnir um skilgreiningu á grunnþjónustu á sviði félagsþjónustu sveitarfélaga. Þetta eru hliðstæðar leiðbeiningar og gefnar voru út rétt fyrir jól um grunnþjónustu á sviði fræðslumála.  Í leiðbeiningunum er leitast við að gefa heildstætt yfirlit yfir skyldur sveitarfélaga á sviði félagsþjónustu og að hvaða leyti um er að ræða ófrávíkjanlega lagaskyldu til að veita grunnþjónustu  og að hvaða leyti sveitarstjórnir hafa svigrúm til mats eftir staðbundnum aðstæðum og þörfum.

Sveitarstjórn Mýrdalshrepps vinnur sameiginlega að fjárhagsáætlun fyrir árið 2009 og var hún til fyrri umræðu á fundi sveitarstjórnar þann 18. desember. Vegna áfalla í efnahag þjóðarinnar er gert ráð fyrir töluverðri tekjuminnkun frá yfirstandandi ári samhliða almennum kostnaðarhækkunum og hárri verðbólgu.

Bæjarstjórn Bolungarvíkur hefur samþykkt að nýtt verði heimild til álagningar hámarksútsvars fyrir tekjuárið 2009, 13,28%. Auk þess samþykkir bæjarstjórn 10% álag á útsvar samkvæmt tillögu eftirlitsnefndar með fjármálum sveitarfélaga og heimild frá samgönguráðuneytinu. Útsvarsprósenta í Bolungarvík fyrir tekjuárið 2009 er því ákveðin 14,61%. Með þessari aðgerð ásamt þeirri aðgerðaáætlun sem lögð verður fram í tengslum við fjárhagsáætlun áranna 2009 og 2010, staðfestir bæjarstjórn Bolungarvíkur markmið samnings við Eftirlitsnefnd með fjármálum sveitarfélaga frá því í október um að stöðva hallarekstur og skuldasöfnun, bæta eiginfjárstöðu og styrkja rekstrargrundvöll sveitarfélagsins til framtíðar

Fjárhagsáætlun Dalabyggðar fyrir árið 2009 var lögð fram til seinni umræðu 30. desember 2008. Stefnt er að því að 3 ára áætlun liggi fyrir eigi síðar en 1. febrúar 2009. Vísað er til greinargerðar sveitarstjóra vegna fyrri umræðu en gert verður grein fyrir breytingum á milli umræðna.

Bæjarstjórn Snæfellsbæjar hefur, í ljósi þeirra aðstæðna sem nú eru uppi í samfélaginu, ákveðið að haga vinnu við fjárhagsáætlun 2009 út frá þeirri staðreynd. Lagt er upp með að hækka ekki gjaldskrár í grunnþjónustu sveitarfélagsins í bili, svo sem í leikskólum, mat í grunnskólanum, íþróttahúsi og í sundlaug svo eitthvað sé nefnt.

Ráðgjafanefnd Jöfnunarsjóðs sveitarfélaga hefur lagt fram tillögu sína um úthlutun útgjaldajöfnunarframlaga á árinu 2009. Alls leggur nefndin til að framlögin nemi 3.900 m. kr. Framlögin verða greidd mánaðarlega en 10% þeirra verður þó haldið eftir í varúðarskyni. Endanlegt uppgjör fer fram í desember nk. Jafnframt hefur nefndin lagt fram áætlun um heildarúthlutun framlaga á árinu 2009 vegna lækkaðra fasteignaskattsframlaga. Alls munu framlögin nema 2.288 m. kr. Jöfnunarsjóður greiðir 60% þeirra fyrirfram eða rúmar 1.300 m. kr.

Þann 18. desember 2008 fór fram síðari umræða um fjárhagsáætlun Vopnafjarðarhrepps A- og B hluta. Fyrri umræða fór fram 11. des. sl., og var henni þá vísað til endanlegrar afgreiðslu við síðari umræðu í hreppsnefnd. Milli umræðna var farið yfir áætlunina með forstöðumönnum viðkomandi deilda og stofnana, þar sem leitast var við að hagræða og lækka rekstrarkostnað eins og frekast er kostur. Vinna þessi var í samræmi við samþykkt hreppsnefndar frá síðasta fundi þar sem samþykkt var að fela sveitarstjóra í samráði við forstöðumenn deilda og stofnana að ná niður kostnaði um 2-4 %. Þrátt fyrir að verkefnið hafi verið erfitt þá var jafnframt ánægjulegt að finna fyrir áhuga allra sem að þessu verkefni komu og fyrir það ber að þakka. Víst er að bestu árangur næst ef allt liðið spilar vel saman.

Föstudaginn 19. desember var til síðari umræðu fjárhagsáætlun Eyjafjarðarsveitar fyrir árið 2009.  Þegar ljóst varð í hvað stefndi með tekjur sveitarfélagsins var ákveðið að kalla saman allar nefndir til vinnufundar og er fjárhagsáætlunin sem nú er lögð fram afrakstur þeirrar vinnu.

Fjárhagsáætlun Dalvíkurbyggðar fyrir árið 2009 var afgreidd 18. desember sl. Samstaða var um áætlunina sem var unnin sameiginlega af fulltrúum allra flokka í bæjarstjórn.

Alþingi samþykkti þann 20. desember sl. lög um ráðstafanir í ríkisfjármálum. Lögin fela meðal annars í sér hækkun hámarksútsvars um 0,25 prósentustig, þ.e. úr 13,03% af útsvarsstofni í 13,28%, sbr. 3. gr. laganna. Einnig felur 8. gr. laganna í sér hækkun tekjuskatts um 1,25 prósentustig.

Bæjarráð Fljótsdalshéraðs hefur verið með tillögur og starfsáætlanir nefnda til umfjöllunar á fundum sínum í nóvember og desember. Þar sem miklar sviptingar í efnahagsmálum þjóðarinnar hafa haft áhrif á áætlað vinnuferli við áætlunargerðina fyrir árið 2009, er fyrri umræða um fjárhagsáætlun næsta árs mánuði seinna en áður var búið að ákveða og síðari umræða mun fara fram á fyrsta fundi bæjarstjórnar á nýju ári. Áætluð áhrif efnahagskreppunnar hafa veruleg áhrif á útsvarstekjur sveitarfélagsins eða sem nemur 111 millj. kr. miðað við það sem gert var ráð fyrir í rammaáætlun sveitarfélagsins.

Fjárhagsáætlun Hafnarfjarðarkaupstaðar fyrir árið 2009 var tekin til fyrri umræðu í bæjarstjórn Hafnarfjarðar fimmtudaginn 11.desember. Yfirskrift fjárhagsáætlunarinnar sem er lögð fram sameiginlega af bæjarfulltrúum Samfylkingarinnar og Vinstri grænna er: Stöndum vörð um velferð og þjónustu. Þrátt fyrir fyrirséðan umtalsverðan samdrátt í tekjum bæjarsjóðs samhliða auknum útgjöldum vegna almennra launabreytinga, verður lögð megináhersla á að ná fram hagræðingu og sparnaði í rekstri, stjórnsýslu og framkvæmdum án þess að skerða grunnþjónustu og velferðarmál. Almenn þjónustugjöld munu verða óbreytt og vatnsskattur verður lækkaður um 13% eða niður í 0,1%. Til að mæta lækkun á fasteignamati fjölbýlishúsnæðis um 5% verður heimild til hækkunar útsvars nýtt og þær tekjur að hluta settar í sérstakan velferðarsjóð.

Bæjarstjórn samþykkti fjárhagsáætlun Hveragerðisbæjar fyrir árið 2009 á fundi sínum þann 18. desember síðast liðinn en áætlunin er unnin í góðri samvinnu meiri- og minnihluta í bæjarstjórn

Lögfræðisvið Sambands íslenskra sveitarfélaga hefur gefið út leiðbeiningar til sveitarfélaga um skilgreiningu grunnþjónustu á sviði fræðslumála. Leiðbeiningarnar ættu að geta nýst sveitarstjórnum við forgangsröðun útgjalda innan málaflokksins m.t.t. þess hvort um sé að ræða grunnþjónustu eða valkvæð verkefni.

Áætlað er að framlög Jöfnunarsjóðs sveitarfélaga til rekstur grunnskóla muni nema rúmlega 5,5 milljöðrum króna á næsta ári. Samgönguráðherra hefur samþykkt tillögur ráðgjafarnefndar Jöfnunarsjóðs sveitarfélaga frá 12. desember síðastliðinn um áætluð framlög á árinu 2009.

Samdrætti í tekjum Garðabæjar á árinu 2009 verður mætt með hagræðingu, sparnaði og lækkun launa. Útsvar verður áfram óbreytt, 12,46% sem er með því lægsta sem gerist, og gjaldskrár, þar á meðal leikskóla og tómstundaheimila verða óbreyttar, samkvæmt fjárhagsáætlun sem samþykkt var á fundi bæjarstjórnar í gær. Áætlunin gerir ráð fyrir jákvæðri niðurstöðu að fjárhæð 83 mkr og að veltufé frá rekstri verði 14%.

Fjárhagsáætlun Grundarfjarðarbæjar fyrir árið 2009 var samþykkt samhljóða á fundi bæjarstjórnar þ. 18. desember sl.  Fjárhagsáætlunin er í þetta sinn afgreidd með halla upp á tæpar 53 milljónir króna.  Tekjur bæjarins munu minnka á næsta ári frá því sem hefði átt að vera við eðlilegar aðstæður um 60 - 70 milljónir króna.  Fjármagnskostnaður hefur aukist verulega og sér ekki fyrir endann á því ef gengi krónunnar heldur áfram að falla og ef verðbólgan æðir áfram.  Þessi staða kallar óhjákvæmilega á það, að einhver niðurskurður verður á flestum sviðum.  Bæjarfulltrúar og nokkrir af embættismönnum bæjarins taka á sig beina kjaraskerðingu á bilinu 5 - 10%.  Draga þarf saman þjónustu í einhverjum mæli en þess var gætt að fara afar varlega í öllu sem lýtur að þörfum barna og fjölskyldna. 

Bæjarstjórn Kópavogs hefur samþykkt fjárhagsætlun fyrir bæjarsjóð árið 2009 með 200 milljóna króna rekstarafgangi. Allir bæjarfulltrúar í bæjarstjórn Kópavogs undirrituðu eftirfarandi bókun á bæjarstjórnarfundi  undir kvöld föstudaginn 19. desember sl.

Laugardaginn 6. desember sl. boðaði sveitarstjórn Húnaþings vestra atvinnurekendur og forsvarsmenn stofnana í sveitarfélaginu til viðræðna um stöðu atvinnumála í héraði. Mjög góð mæting var á fundinn þar sem flestir fundarmanna greindu frá stöðu og horfum í sínum atvinnurekstri á næstu mánuðum og misserum. Sem vænta mátti er staða atvinnufyrirtækja og stofnana í sveitarfélaginu afar misjöfn og almennt ríkir nokkur óvissa um áhrif breytinga í efnahagsumhverfinu á afkomu þeirra. Alls 12 manns eru nú skráðir án atvinnu í sveitarfélaginu en verktakar í byggingariðnaði hafa m.a. þurft að grípa til uppsagna á starfsmönnum.

Fjárhagsáætlun Stykkishólmsbæjar var samþykkt á bæjarstjórnarfundi í gær þann 18. desember með fyrirvara um að forsendur áætlunarinnar breytist ekki við afgreiðslu fjárlaga ríkisins fyrir 2009. Gert er ráð fyrir því að halli A og B hluta Stykkishólmsbæjar næsta ár verði 29,9 m. kr.

Í fjárhagsáætlun Sveitarfélagsins Ölfuss sem samþykkt var á fundi bæjarstjórnar 18. desember sl. kemur m.a. fram að helsta markmið áætlunarinnar sé að tryggja grunnþjónustu á sviði félags- og fræðslumála. Þá verða gjaldskrár grunnþjónustu ekki hækkaðar milli ára og stuðlað verður að því að börn njóti áfram óskerts leikskólanáms.

Fyrri umræða um fjárhagsáætlun 2009 fór fram í bæjarstjórn Hornafjarðar 18.des. sl. Helstu áherslur sveitarfélagsins á næsta ári eru að verja eftir mætti stöðu heimila og fyrirtækja á Hornafirði, halda vel utan um fjármuni og endurskoða fjárhagsáætlunina ársfjórðungslega.  Álagning fasteignagjalda verður óbreytt og útsvar verður 13,28%. Gjaldskrár þjónustugjalda sveitarfélagsins hækka ekki milli ára. Þá kom fram að fjárhagsstaða sveitarsjóðs er góð.