Allar fréttir

Dreift hefur verið á Alþingi lagafrumvarpi til breytinga á sveitarstjórnarlögum sem felur í sér að sveitarfélögum verði gert að skila ársfjórðungslega upplýsingum úr bókhaldi og reikningsskilum til afnota fyrir samgöngu- og sveitarstjórnarráðuneytið, eftirlitsnefnd með fjármálum sveitarfélaga, aðra opinbera aðila og Samband íslenskra sveitarfélaga.

Aðalfundur Lánasjóðs sveitarfélaga ohf. fyrir árið 2009 verður haldinn föstudaginn 26. mars 2010 kl. 15:00 á Hilton Reykjavik Nordica hótelinu í Reykjavík. Framkvæmd á kjöri á aðalfundi fer samkvæmt ákvæðum hlutafélagalaga og samþykktum sjóðsins. 

Samtök atvinnulífsins efna til opins morgunverðarfundar föstudaginn 12. mars um stöðu atvinnumála og horfurnar framundan. Fundurinn fer fram á Hótel Nordica kl. 8:30-10:00.  Vilhjálmur Egilsson, framkvæmdastjóri SA, kynnir stefnumörkun samtakanna Atvinna fyrir alla - aðgerðaáætlun 2010 um uppbyggingu atvinnulífsins en auk hans flytja erindi  Steingrímur J. Sigfússon, fjármálaráðherra og Gylfi Arnbjörnsson, forseti ASÍ. Í kjölfarið fara fram umræður og fyrirspurnir.

Miðvikudaginn 17. mars nk. stendur úrskurðarnefnd um starfsmat fyrir ráðstefnu um framtíð starfsmatskerfisins SAMSTARFS. Ráðstefnan fer fram í BSRB húsinu, Grettisgötu 89, Reykjavík og hefst kl. 13:00.

Á þingfundi sem hefst kl. 15 í dag eru á dagskrá frumvarp til skipulagslaga, frumvarp til laga um mannvirki og frumvarp til laga um breytingar á lögum um brunavarnir. Vinna við gerð ofangreindra frumvarpa hófst árið 2002 og hefur Samband íslenskra sveitarfélaga átt bæði formlega aðkomu að gerð þeirra með setu í nefndum og óformlega aðkomu með viðræðum við umhverfisráðuneytið eftir að nefndavinnu lauk. Sambandið gerði allmargar athugasemdir við frumvörpin á fyrri stigum, ekki síst við ákvæði III. kafla frumvarps til skipulagslaga, sem fjallar um landsskipulagsstefnu.

Verkefnisstjórn 2. áfanga Rammaáætlunar um vernd og nýtingu náttúrusvæða með áherslu á vatnsafl og jarðhitasvæði boðar til opins kynningarfundar í Skriðu, húsakynnum Menntavísindasviðs HÍ við Stakkahlíð þriðjudaginn 9. mars kl. 14:00. Þar verða kynntar niðurstöður faghópa verkefnisstjórnar sem metið hafa svæði og virkjunarkosti, hver á síðu sérsviði. Fundurinn verður sendur út á netinu og er aðgangur að útsendingunni um vefsíðu rammaáætlunar, www.rammaáætlun.is

Forvarnardagurinn var haldinn í fjórða sinn miðvikudaginn 30. september 2009 að frumkvæði forseta Íslands í samvinnu við Samband íslenskra sveitarfélaga, Íþrótta- og Ólympíusamband Íslands, Ungmennafélag Íslands, Bandalag íslenskra skáta, Reykjavíkurborg, Háskólann í Reykjavík og Háskóla Íslands auk lyfjafyrirtækisins Actavis, sem er sérstakur stuðningsaðili verkefnisins.

Skipulagsstofnun hefur opnað svokallaða Skipulagsvefsjá sem er rafrænt gagnasafn skipulagsáætlana sem varðveittar eru hjá stofnuninni. Með tímanum verður hægt að nálgast þar allt deili- og aðalskipulag sem samþykkt og staðfest hefur verið samkvæmt skipulags- og byggingarlögum nr. 73/1997 og stofnunin hefur fengið til varðveislu. Í nokkrum tilfellum er einnig hægt að nálgast skipulagsáætlanir samkvæmt eldri lögum. Nánari leiðbeiningar eru að finna í Skipulagsvefsjánni.

Samkvæmt frétt Hagstofu Íslands um starfsfólk í grunnskólum haustið 2009 hefur hlutfall kennara með réttindi aldrei mælst hærra. Undanfarin 10 ár hefur hlutfall kennara með réttindi verið 80-87%. Haustið 2009 voru ríflega níu af hverjum tíu kennurum með kennsluréttindi. Haustið 2008 voru 776 manns við kennslu án kennsluréttinda en haustið 2009 er samsvarandi tala komin niður í 437. Hæst er hlutfall réttindakennara á landinu á höfuðborgarsvæðinu.

Miðvikudaginn 24. febrúar 2010 hélt Samband íslenskra sveitarfélaga vinnufund, í samvinnu við verkefnisstjórn um verkaskiptingu ríkis og sveitarfélaga á sviði velferðarmála, um tilfærslu þjónustu við fatlaða frá ríki til sveitarfélaga. Tilgangur fundarins var að miðla upplýsingum og leggja grunninn að öflugu starfi sveitarfélaga fram til þess tíma sem þau taka við þjónustunni. Á fundinum fór m.a. fram umræða í vinnuhópum um stærð þjónustusvæða og mismunandi rekstrarform þjónustunnar og einnig kynntu fulltrúar allra landshlutasamtaka stöðu vinnunnar á sínu svæði.