Fréttir: maí 2018

Fjármála- og efnahagsráðuneytið kynnir um þessar mundir nýjan og stafrænan álagningarseðil. Þetta breytta verklag boðar byltingarkenndar breytingar hjá því opinbera á næstu árum með notendavænni, einstaklingsmiðaðri og snjallvæddri stjórnsýslu. Skattgreiðendur geta sem dæmi kallað fram nánari upplýsingar um einstaka liði álagningarinnar og séð hlutfallslega skiptingu staðgreiðsluskatta hjá sér í tekjuskatt annars vegar og útsvar hins vegar.

Úrslit í allsherjaratkvæðagreiðslu Félags kennara og stjórnenda í tónlistarskólum um nýjan kjarasamning við samninganefnd sveitarfélaga liggja fyrir.

Alvarlegar athugasemdir eru gerðar við skýrslu, sem Samtök Atvinnulífsins (SA) gáfu nýlega út um fjármál 12 stærstu sveitarfélaga landsins, í minnisblaði sem Sigurður Á. Snævarr, sviðsstjóri hag- og upplýsingasviðs hjá Sambandi íslenskra sveitarfélaga, hefur tekið saman.

Flugvéladekkjaskeið, sturtuhandklæðaskápur og hjálmalás voru þær uppfinningar sem hlutu aðalverðlaun Nýsköpunarkeppni grunnskólanna (NKG), sem fór nýlega fram í Háskólanum í Reykjavík.

Nýkjörnar sveitarstjórnir munu um land allt taka til starfa 15 dögum eftir kjördag og við það munu samtals 502 fulltrúar taka sæti í þeim 72 sveitarfélögum sem eru við lýði í landinu. Að síðustu sveitarstjórnarkosningum loknum tóku 504 fulltrúar sæti í 74 sveitarfélögum og hefur því bæði kjörnum fulltrúum og sveitarstjórnum fækkað frá því sem var.

Ársfundur Brúar, lífeyrissjóðs starfsmanna sveitarfélaga, fer fram í hádeginu mánudaginn 4. júní nk. Allir sjóðsfélagar, fulltrúar launagreiðenda og fulltrúar viðkomandi stéttarfélaga hafa málfrelsi og tillögurétt á ársfundum sjóðsins.

Samninganefndir Sambands íslenskra sveitarfélaga og Kennarasambands Íslands vegna Félags grunnskólakennara (FG) undirrituðu nú síðdegis nýjan kjarasamning.

Ný reglugerð um persónuvernd tekur gildi í dag innan Evrópusambandsins um vernd einstaklinga gagnvart vinnslu og frjálsri miðlun persónuupplýsinga. Áhersla er lögð á að reglugerðin verði leidd í lög hér á landi eins fljótt og unnt er og var frumvarp að nýjum persónuverndarlögum kynnt nýlega. Samband íslenskra sveitarfélaga hefur sett fram gátlista, sem nýkjörnar sveitarstjórnir eru hvattar til að kynna sér vegna málsins, strax að loknum kosningum.

Á ári hverju afgreiðir ESA – Eftirlitsstofnun EFTA frá sér fjölda mála sem snertir beint eða óbeint sveitarfélögin og rekstur þeirra. Hefur sem dæmi reynt á talsvert af slíkum málum hjá sveitarfélögum í Noregi.

Kínversku vináttusamtökin sóttu nýlega heim Samband íslenskra sveitarfélaga. Samtökin hafa það hlutverk, að efla vináttutengsl við önnur lönd, s.s. með vinbæjatengslum. Á fundinum kom fram að samtökin hafa með stuðningi kínverskra stjórnvalda, átt góðu gengi að fagna og eiga þau nú um 500 vináttufélög og 2500 vináttutengsl um heim allan.

Hagstofa Íslands hefur í tilefni af 100 ára fullveldisafmælinu veitt aðgang að sögulegu talnaefni í samfelldum tímaröðum. Kosningaþátttaka frá árinu 1938 og frambjóðendur og kjörnir fulltrúar í sveitarstjórnarkosningum frá árinu 1950 er á meðal þess efnis sem tengist sveitarstjórnarstiginu.

Meistarastyrkjum Sambands íslenskra sveitarfélaga vegna ársins 2018 var úthlutað í dag. Hnossið hrepptu þrír nemar sem ljúka senn meistaraverkefnum við Háskólann á Bifröst, Menntavísindasvið Háskóla Íslands og Félagsvísindasvið Háskóla Íslands.

Ársskýrsla Sambands íslenskra sveitarfélaga vegna ársins 2017 er komin út. Auk greinargóðs yfirlit yfir rekstur og helstu verkefni starfsársins, bæði innan lands og utan, geymir skýrslan yfirlit yfir starfsfólk, stjórnendur og skipan starfsnefnda hjá sambandinu.

Stjórn Sambands íslenskra sveitarfélaga telur óásættanlegt að skortur á þjónustu af hálfu sýslumanna verði til þess að draga úr kjörsókn í komandi sveitarstjórnarkosningum. Gerir stjórnin þá kröfu til dómsmálaráðuneytisins og sýslumannsembætta að þau tryggi að skipulag utankjörfundaratkvæðagreiðslu henti íbúum í hverjum landshluta, án þess að þeir þurfi að ferðast um langan veg.

Samgöngu- og sveitarstjórnarráðherra hefur samþykkt tillögu ráðgjafarnefndar Jöfnunarsjóðs sveitarfélaga um úthlutun sérstaks viðbótarframlags á árinu 2018 vegna þjónustu við fatlað fólk, alls 200 m.kr.

Innleiðing á nýjum lögum um persónuvernd kallar á nýtt verklag hjá sveitarfélögum, með umtalsverðum kostnaðarauka og áhrifum á stjórnsýslu þeirra. Þá veita lögin Persónuvernd heimild til álagningar ofursekta, sem eiga sér engin fordæmi hér á landi gagnvart opinberum aðilum, að því er segir í minnisblaði sviðsstjóra hag- og upplýsingasviðs til stjórnar Sambands íslenskra sveitarfélaga.

Samband íslenskra sveitarfélaga stóð að málþingi um samráð ríkis og sveitarfélaga 15. maí sl. í Brussel, í samstarfi við systursveitarfélagasambönd Austurríkis, Svíþjóðar, Skotlands, Hollands, Ítalíu og Danmerkur. 

Verkefnið Láttu þér líða vel, hlaut í gær foreldraverðlaun 2018 hjá landssamtökum foreldra, Heimili og skóli. Því var ýtt úr vör fyrir tveimur árum í Vogaskóla að frumkvæði Guðrúnar Gísladóttur, kennara við skólann. Var þetta í 23. sinn sem verðlaunaafhending samtakanna fer fram.